Isaia

7 I TE au rā o Ahaza, te tamaiti a Iotama, te tamaiti a Uzia, ariki no Iuda, kua aere maira te ariki no Arama ko Rezina, e ko Peka te tamaiti a Remalia, ariki no Iseraela, e kaitamaki kia Ierusalema, kare akera i rauka ia raua.

2 E kua akakiteia te ngutuare o Davida, i te na ko anga e, Kua tauturuia Arama e Epheraima: te ngaueue ua ra tona ngakau, e te ngakau o tona au tangata ra, mei te au rakau o te vaorakau i ngaueue ua i te matangi ra.

3 Kua tuatua mairā Iehova kia Isaia, E aere koe i tenana e aravei ia Ahaza, ko koe ma to tamaiti ra ia Sare-iasuba, ki te openga mai o te vai ko ra o te roto ki runga ra, ki te arataa o te kainga o te tamā kakau ra;

4 E karanga atu oki koe kiaia, Kia matakite, e akatupua ua; auraka e mataku, auraka oki e parukaua to ngakau, i nga aveave o eianei puke komotu ka nei, i te riri maata o Rezina, ma Arama, e to te tamaiti a Remalia ra.

5 No te mea kua akakoro Arama i te kino ia koe, Epheraima, e te tamaiti a Remalia, i te na ko anga e,

6 Aere mai ka aere tatou ki runga e rave ia Iuda, e tamanamanata atu, e kokoti mai i tetai pae no tatou uaorai; e ko te tamaiti a Tabeala nei, ta tatou ïa e akaiki, ei ariki i reira:

7 Te na ko maira te Atu ra ko Iehova, Kare ïa e mou, kare oki e tupu.

8 Upoko ua rai Damaseko no Arama, upoko ua rai oki Rezina no Damaseko; kare e ope te mataiti okotoru ma rima, e ngaangaaʼi Epheraima, kare atura e karangaia e tangata:

9 Upoko ua rai oki Samaria no Epheraima, upoko ua rai te tamaiti a Remalia no Samaria. Kia kore kotou e akarongo ra, kare rava kotou e akatinamouia.

10 Kua tuatua akaou maira oki a Iehova kia Ahaza, na ko maira,

11 E pati koe i tetai akairo ki to Atua ra kia Iehova; e pati ki raro roa ra, e kare ra, ei runga rava.

12 Kua karanga aturā Ahaza, Kare au e pati, kare oki au e akakoko atu ia Iehova.

13 Kua tuatua maira aia, E tenana, e akarongo mai, e te ngutuare o Davida e; E apinga iti ainei kia tamanamanata kotou i te tangata, ka tamanamanata katoaʼi kotou i taku Atua?

14 E tenana, na te Atu uaorai e oronga i tetai akairo no kotou; i na, e nui te paretenia, e e tamaiti tana e anau, e e tapaia tona ingoa ko Imanuela.

15 Kia kite aia i te kopae atu i te kino, e te rave i te meitaki, e kai ei aia i te bata, e te meli.

16 Kare oki te tamaiti e kite i te kopae i te kino e te rave i te meitaki, e akarukeiaʼi taua enua, taau i akapou ra, e nga ariki toko rua nona ra.

17 E rokoia mairai koe e Iehova, e toou katoa ra au tangata, e te ngutuare katoa o toou ra metua, i te au rā kare i kitea mai, e mei te rā mairai i akaruke ei Epheraima ia Iuda ra; koia te ariki o Asura.

18 E i taua rā ra, e mitimiti ei a Iehova ki te rango, i te openga mai o te au kauvai i Aiphiti ra, e te rango meli, i te enua ra i Asura:

19 E tae anake mai oki ratou, e ka to anake ratou ki rungao i te aronga o i akarukeia ra, e ki roto i te au ruarua mato ra, e ki runga i te au rakau taratara ra, e ki runga i te ngangaere ra.

20 Kia tae ki taua rā ra, e varu ei te Atu ki te varu ouia ra, ki te au tangata i tetai pae vai ra, ki te ariki no Asura ra, i te upoko, e te uruuru vaevae; e te kumikumi katoa ra, i te pakoko katoa anga.

21 E kia tae ki taua rā ra, kia angai te tangata i te tinana puakatoro ou okotai ua ra, e nga mamoe e rua ra;

22 No te rai o te u ta ratou e o maira, e kai ei aia i te bata: ko te bata oki e te meli ta ratou katoa e kai, ko tei toe i rotopu i te enua nei.

23 E te au kainga vine katoa ra, okotai tausani te vine ki roto, okotai oki tausani i te manga ario e oko naʼi ra, e riro ïa, kia tae ki te reira rā, ei rakau taratara, e ei tataramoa.

24 Ma te kakao katoa e te ana kia aere mai ratou ki reira; e riro oki te enua katoa ra, ei rakau taratara e ei tataramoa.

25 E te au tuaivi katoa e tika kia kenu i te ko one ra, kare koe e tae ki reira i te mataku i te rakau taratara e te tataramoa ra; e riro ïa ra, ei aerenga no te puakatoro; ei takatakai anga oki no te au mamoe.