Au Uianga a te Aronga Tatau

Kua akaipoipo ainei a Pharao ia Sara, te vaine a Aberama, mei te mama anga o tetai tukuanga ia Genese 12:19 i tetai atu au urianga Puka Tapu?

Kare, kua araiia a Pharao i te apaianga ia Sara (Sarai) ei vaine nana. E no reira, kare to Sara tu ngateitei e tona tu akono iaia uaorai i tuku ua ia atu.

Ka tauturuia tatou i te kite i teia na te akaraanga matatio i te turanga o teia akapapaanga. Kua oparaia a Aberahama (Aberama) e tetai onge kia kimi i tetai akapuanga i Aiphiti no tetai tuatau. Kua mataku aia i te manamanata no tona oraanga i reira no tana vaine purotu, ko Sara. Kare a Sara i anau ake i tetai tamaiti na Aberahama, no reira me mate aia i Aiphiti, ka motu te akapapaanga o te Ua, ko te Ua na roto mai te akameitaki anga te au kopu tangata o te enua katoa nei. (Genese 12:1-3) No reira kua karanga atura a Aberahama kia Sara kia akataka iaia ei tuaine nona, no te mea e koia tikai tona apa tuaine.​—Genese 12:10-13; 20:12.

Kare tona mataku anga e ma te kore e tumu. Ko tetai tangata Kite ko August Knobel tei akataka mai: “Kua pati a Aberama ia Sarai kia akaari iaia ei tuaine nona i Aiphiti no te mea kia kore aia e tamateia. Me kua manako ratou e e vaine akaipoipo aia, ka rauka i tetai tangata Aiphiti te rave iaia na te tamate anga i tana tane e te pu atu; me kua manako ratou e e tuaine aia, penei ka apai aia ma tetai mataara oaoa no tona tungane.”

Inara, kare te au ariki e o atu ki tetai tuatua anga ma Aberahama no runga i to Pharao akaipoipo anga kia Sara. Kua apai ratou ia Sara te purotu ki te kainga o Pharao, e kua oronga te tutara o Aiphiti ki tona tungane ko Aberahama i tetai apinga oronga ua. I muri ake i teia, kua tuku a Iehova te maki mate ki runga i te ngutuare tangata o Pharao. Mei te akakite anga i te turanga tika kia Pharao ma tetai mataara kare e kite, kua karanga aia kia Aberahama e: “Eaa koe i tuatua mai ei e, ‘e tuaine aia noku,’ e kua vaitata atu au i te apai iaia ei vaine naku? E i teia nei teia taau vaine, ka aere e apai iaia!”​—Genese 12:14-19, NW.

The New English Bible e tetai au urianga Puka Tapu e tuku te potonga irava araara i runga “kua rave au iaia ei vaine naku” me kare aiteite te tuatuaanga. Tera ra kare teia tukuanga i tona katoa anga e taravake, ka rauka teia tuatuaanga i te oronga i tetai akaraanga e kua akaipoipo a Pharao kia Sara, e kua oti takere to raua akaipoipo anga. I Genese 12:19 (NW) ka kite i reira te tukuanga o te verepa Epera “apai” i te tuku anga apa, tei akakite mai e kare i oti te angaanga. Kua tuku te New World Translation i teia verepa Epera i te tika anga ma te papaanga e i tetai mataara te ka akakite mai te tu o te verepa​—“e kua vaitata atu au i te apai iaia ei vaine naku.”a Me kua vaitata atu a Pharao i te apai ia Sara ei vaine nana, kare aia i rave ana i te angaanga me kore te raveanga no te reira.

E maata te taime kua akaapaia a Aberahama i tona mataara no te rave i te tupu anga, kareka ra kua angaanga aia i te inangaro o te Ua taputouia e pera te au tangata katoa.​—Genese 3:15; 22:17, 18; Galatia 3:16.

I tetai atianga aiteite e penei kua tupu te kino, kare a Isaaka i akatika e tana vaine ko Rebeka kia akakite i tona turanga akaipoipo. I te reira taime ta raua tamaiti ko Iakoba, na roto iaia te akapapaanga o te Ua te ka aere mai, e kua anau takereia e papu tikai e tamaiti mapu aia. (Genese 25:20-27; 26:1-11) No atu rai e, te manako anga i muri i teia rave anga tau penei kua aiteite mei to Aberahama rai. I roto i tetai tuatau onge kua noo a Isaaka e tona ngutuare tangata i te ngai o te ariki o te Philiseti koia oki ko Abimeleka. Me kua kite a Abimeleka e kua akaipoipo a Rebeka kia Isaaka, penei ake ka aru aia i tetai mataara i te tamate anga te katoaanga o te ngutuare o Isaaka, e penei ko te mate anga te reira o Iakoba. I teia turanga, kua tauru mai a Iehova i te paruru i tona au tavini e te papaanga o te Ua.

[Au Tataanga Rikiriki i Raro]