Te Ingoa o te Atua

“Kia kore a Iehova e patu i te are ra, e angaanga puapinga kore ta te aronga i patu ra.” I tatau ei teia tataanga Ratini. Kua akatumuia teia au tuatua ia Salamo 127:1 i roto i te Puka Tapu, e kua mou te reira i tetai tuatua mou oonu: E puapinga kore tikai te au angaanga taki tai aere me kare ta Iehova akameitakianga.

Tei runga i teia tata anga, no te mataiti 1780, i tetai are i Colombo, Tiri Ranaka, e mea puapinga teia no te mea te vaira to te Atua ingoa, ko Iehova. (Akara i te tutu.) I te au anere mataiti i topa ake nei kua taangaangaia te reira ingoa i te au ngai katoatoa. Kua tataia ra i te maata anga o te taime ki runga i te au are, te au are pure, e pera katoa te au moni ra. Kua taangaanga te au mitinari i to te Atua ingoa i te apaianga ratou i te Puka Tapu ki te au enua mamao, no reira te tupuanga i teia tata anga i Tiri Ranaka.

Mei teaa ra te tuke i te au mea i teia tuatau nei! E iti ua te au Kerititiano tikai te kea atura i to te Atua ingoa. E pera katoa te aviri ra tetai aronga apii i te Au Kite o Iehova no te taangaanga maata anga i te reira. Eaa ra? I tau ki etai pae, no te mea kare tona tangi anga Epera i kitea tikaiia. Tera ra eia tei kite i te tangi anga Epera tikai o to Iesu ingoa? Inara, kua taangaangaia e kua akangateiteiia e te katoatoa tona ingoa.

E mea puapinga rava te ingoa o te Atua kia Iesu ra. Koia tei apii ra ia tatou kia pure: “Kia tapu toou ingoa.” (Mataio 6:9) I mua ua ake i tona matenga, kua karanga aia ki te Atua e: “Kua akakite atu au i toou ingoa i te au tangata o teianei ao, taau i o mai noku ra.” (Ioane 17:6) E au pipi aru takainga vaevae o Iesu te au Keretitiano mou. Kare ainei e e tau katoa ratou kia ‘akakite atu i to te Atua ingoa’? Te rave ra te Au Kite o Iehova i te reira, e kua akameitaki puapinga tikai a Iehova to ratou “are.” E tika te taramo no ratou e: “E ao to te aronga, ko Iehova to ratou Atua.”​—Salamo 144:15.