Te Maara Ainei ia Koe?

Kua kite ainei koe i te au itiu i ou ake nei o Te Punanga Tiaki ei mea puapinga ma te tau noou? Ka kore i reira e timata i toou roro i te au uianga te ka aru mai:

▫ Eaa ra te Au Kite o Iehova i atoro tamou uaʼi i to ratou au tangata tupu?

Na roto i te Patireia taputouia, te inangaro ra te Au Kite o Iehova i te akameitakianga a te Atua no ratou uaorai, e no to ratou aroa i to ratou au tangata tupu, te inangaro ra ratou i taua akameitakianga rai no ratou. No reira, i te aruanga i ta Iesu akatauanga, na te aroa noinoi kore e akakeu ra ia ratou kia atoro i to ratou au tangata tupu. (Mataio 6:9, 10; 22:37-39)​—8/15, kapi 8, 9.

▫ Eaa ra te irinaki o te au mea tupu ua e mea akarongo ua?

Kare rava te au taineti i kite ana i te au taui anga​—noatu te au mea puapinga tikai​—i te akatupu anga i te au mea ora ou, inara te karanga ra te aronga irinaki i te au mea tupu ua e akapeia tikai te au mea ora ou i te tupu anga mai. Kare te aronga irinaki i te au mea tupu ua i kite ana i te tupu anga viviki o te ora; inara te maro nei ratou e akapera te ora i te akamata anga.​—9/1, kapi 5.

▫ Akapeea tatou i te autu tikai anga i te tu akamaroiroi kore te ka tupu mai mei te au arairai anga o te oraanga?

Noatu eaa to tatou turanga i te oraanga, me tamanako tatou i te ka rauka ia tatou i te rave i te mea e ka manamanata atu i te au mea kare e rauka ia tatou i te rave, ka riro te oraanga ei mea merengo anga maata, e ka kite tatou i te rekareka i roto i te angaanga a Iehova. (Salamo 126:5, 6)​—9/1, kapi 28.

▫ Eaa te au puapinga o te akakore anga?

Na te akakoreanga i tetai atu ka akamaata ia i te au pirianga meitaki (Ephesia 4:32); kare te reira e apai anake ua mai i te tu au ma te au taeake inara pera katoa te tu au o roto ra (Roma 14:19; Kolosa 3:13-15); na te akakoreanga i tetai ka akaatea te reira i te mataara no ta tatou au ara kia akakoreia mai (Mataio 6:14); pera katoa, ka tauturu te reira ia tatou kia maara e te anoano ra tatou uaorai i te akakore anga. (Roma 3:23)​—9/15, kapi 7.

▫ Akapeea te akaraanga o te peroveta ko Amosa te riro anga ei tauturu i roto i ta tatou angaanga tutu aere?

Mei ia Amosa rai, kare tatou e taui me kore te akameangiti mai i te tuatua na te Atua. Mari ra, ka akakitekite tatou i te reira ma te akarongo noatu eaa te tu o te aronga te ka akarongo mai.​—9/15, kapi 17.

▫ Eaa to te Atua au tu ka tau tatou kia aru?

E rua mea puapinga koia ko to Iehova kite i te akaaere e tona tu mataora. (1 Korinetia 14:33; 1 Timoteo 1:11) Te tau meitaki ra teia nga tu o te Atua, no reira kare tetai ia raua e akamaataia ei paruparu anga no tetai.​—10/1, kapi 10.

▫ Eaa etai au takainga papu ta te au metua i rave no te tauturu i ta ratou tamariki i te tavini ia Iehova?

Ko tetai ravenga puapinga koia oki kia akamata vave i te reira. Ko te au tuatua tei rauka e te au apiianga tei apiiia i te au mataiti ou ra ka ope te reira no tetai tuatau roa. (Maseli 22:6) E mea puapinga i reira i te apii kia ratou i te akarongo e te ngateitei no Iehova e tana akamorianga i te au uipaanga katoatoa. Ka apii te au metua autu ra kia kite ratou i te au inangaro tarevake, e ka tauturu ratou i ta ratou au tamariki i te akatikatika anga ia ratou. (Maseli 22:15) I te openga, e akamata vave i te akanoo i te au akakoroanga teokaratiki no taau tamaiti te ka rauka iaia i te itae ma te tau.​—10/1, kapi 27-8.

▫ Eaa te akara anga tuke o ta Iehova akakoreanga i te apa e tau tatou kia tauta i te taangaanga?

Ka akakore e ka akangaropoina a Iehova. (Ieremia 31:34) E mea ngata teia i te au tangata no te rave. Ko te puapinga o te raveanga i teia kua tuatua pakariia e Iesu, mei tei papaia ia Mataio 6:14, 15.​—10/15, kapi 25-6.

▫ Eaa te tapupu anga e toru te ka arai ia tatou mei te rauka anga te tu ngakau aroa?

No to tatou tu ara ua ei tangata, ka tupu mai te au manako ngakau makitakita. Me makitakita tatou i tetai atu, akapeea tatou i te akono atu anga iaia ma te ngakau aroa maru? Ko tetai mea na te maeu anoano kore ua anga ki te ta ua. Ka akariro teia ia tatou kia manako kore i te mamae o tetai atu. Pera katoa, ko te tangata manako ua iaia uaorai kare ona tu ngakau aroa. (1 Ioane 3:17)​—11/1, kapi 19, 20.

▫ Eaa te au apiianga te ka apiiia mei te papaanga Tuatua Tapu no runga ia Iobu?

Ka akamatakite maata mai te papaanga o Iobu ia tatou no runga i te au ravenga kikite a Satani e te tauturu ia tatou kia kite i te pirianga o to Iehova ngateitei i te ao katoa e pini ua ake e te tu tiratiratu o te tangata nei. Mei ia Iobu rai, ko te aronga katoatoa tei aroa i te Atua ka timataia ratou. Ka rauka katoa ia tatou i te tamou marie mei ta Iobu i rave ra, te akapapu ia Satani ei pikikaa, e te rekareka i te au akameitakianga o te Patireia o te Atua.​—11/15, kapi 20.

▫ Akapeea te tiamana o tetai pupu aronga pakari i te akaari anga i te tu kite tau no te tangata pakari tataki tai?

I te ngai ka rauka e tau te tiamana kia oronga i tetai papaanga parani i mua rava ake ei tuku taime no tetai atu aronga pakari kia akamanako meitaki ma te pure no runga i tetai tumu manako tei akakiteia. I te uipaanga a te aronga pakari kare aia e tauta i te tapupu i te manako o te aronga pakari mari ra ka akamaroiroi aia ia ratou kia taangaanga i te “tuatua mataratara ua” no runga i te au mea te uriuriia ra. (1 Timoteo 3:13, NW)​—12/1, kapi 30.