Kua Akapapu Akaouia Mai te Tika ki te Tika Anga Akakiteia

TETAI utunga ou ua tei akakiteia e te Tiati no te au Kimikimi Anga Mua o te Ngai Akava Anga o Messina, Itale, kua akapapu akaou mai e ko te au mea i inangaroia i te pae rapakau e tetai tangata maki ka tau kia aruia e te au taote. Kua orongaia te tukuanga i tetai tupu anga tei o atu tetai o te Au Kite o Iehova.

Ia Tianuare 1994, kua apaina vivikiia atu a Antonino Stellario Lentini, e Kite e 64 mataiti e maki toto tona, ki tetai are maki i Taormina, Messina. Kua tou atu te vaine a Antonino, ko Catena, ki te aronga angaanga o te are maki e ei nga Kite no Iehova, kare aia e tana tane e akatika ki te ravenga rapakau o te pamu anga toto. (Angaanga 15:20, 28, 29) Kua akangateiteiia ta raua i inangaro.

Inara, i te tuatau e apainaia ra ki tetai ngai rapakau maki ke atu, kua uti te akaea o Antonino e kua tae atu ma te turanga kino. Kare i roa i muri mai, kua mate aia. Kua tumatetenga tikai a Catena, inara kua kitea e ia te akapumaana anga maata i roto i ta te Pipiria taputou no te akatu akaou anga. (Angaanga 24:15) I reira, i tona poitirere maata, te au akava maata​—penei kua akavareia e te au nuti tarevake tei akamataia e te ravenga akakitekite—​kua akaapa iaia te akatupuanga i te mate o tana tane no te mea kua patoi aia i te ravenga rapakau ta te au taote i manako e kua tau nona.

Tere atu i te mataiti i muri mai, ia Tiurai 11, 1995, kua tukunaia a Catena, i te mea e kare aia i rave i te kino. Ko te tika, kua tou mai te akakite anga a te aronga kite i te rapakau e, i te akamanakoanga atu i te turanga o te tangata maki, kare rai e puapinga me akaoia mai te ravenga rapakau.

Inara kua akataka mai ta te tiati au akakite anga i te tumu tikai. Kua tou mai aia e, e mea ngata i te ariki, i te manako e ka tau i te aronga rapakau i te akao mai me kua patoiia te ravenga rapakau e te tangata maki me kore ra e te au tangata tei tu mai nona. Kua kapiti mai aia e, i Itale ko te ture o te tu akono i te pae rapakau, “te kite ra i te mea tau tikai kia rauka mai te tika anga akakiteia a tetai tangata i mua ake i tetai ua atu akao anga.” No reira, i akakite ei aia “kia tau i te ture kua paruru a [Catena] i tana tane kia kore e na roto i te reira vai anga.”

Te akapapu akaou maira teia akava anga i te tika no tetai tangata maata i te patoi i tetai ravenga rapakau te patoi atura ki ta tetai tangata me kore ra vaine i inangaro.