Ripoti a te Aronga Tutu Patireia
Arataki atu te Tu Akakoromaki ki ta te Atua Akameitakianga i Malawi
E TAVINI tiratiratu a Iosepha no Iehova. (Ebera 11:22) E tangata akakoromaki katoa tikai aia. Noatu kua pikikaaia aia e tona uaorai au taeake, e rua taime te oko angaia ki roto i te tuikaa, e i muri akera kua tiriaia ki roto i te are auri ma te au akaapa anga pikikaa, kare a Iosepha i topa ana. Mari ra, kua akakoromaki marie aia i te au mataiti tumatetenga, te tiaki akaaka ua anga i ta Iehova akameitakianga.—Genese 37:23-28, 36; 39:11-20.
Pera katoa i teia tuatau, kua tiaki ma te akakoromaki te Au Kite o Iehova i Malawi no te akameitakianga a te Atua. E 26 mataiti, kua akakoromaki teia Au Kite Kerititiano i te au arai anga kavamani, te patoi anga pakari, e te au tu kino e manganui. Inara kua tutakiia to ratou tu akakoromaki marie!
I te tupu anga te takinokino anga i Malawi i te openga o te 1967, te vaira e 18,000 au papuritia Patireia. Ka akamanako ana i te rekareka o te Au Kite i to ratou kite anga e kua akamata te mataiti angaanga 1997 ki tetai take ou e 38,393 au papuritia—e tere atu i te rua taime maata atu mei te akamata anga o te arai anga! Pera katoa, i te 13 au Uruoaanga Tapere “Au Karere o te Au Tu Atua” tei raveia i Malawi e tere atu i te 117,000 tei tae. E tikai, kua akameitaki a Iehova i to ratou akarongo e te tu akakoromaki.
Tetai akaraanga o teia akameitakianga ko te kite anga o tetai tamaiti e 14 mataiti ko Machaka tona ingoa. I te ariki anga a Machaka i tetai oronga anga apii Pipiria ki te Au Kite o Iehova, kua manata tikai tona nga metua. Kua karanga raua: “Me ka inangaro koe kia riro mai koe ei Kite, e akaruke atu koe i te kainga.” Inara kare teia tamataku anga i akamaroiroi kore ana iaia mei tana apii ua atu anga. Tei tupu, kua rave to Machaka nga metua i tona kakau pouroa. Kua ariu atu te au taeake na te oko akaou anga i tetai au kakau nona. I te kite anga to Machaka nga metua i teia, kua akakite raua kiaia: “Me ka turu te Au Kite ia koe, ka tau koe kia akaruke e e aere e noo ki ko ia ratou.” I muri ake i te uriuri manako meitaki anga i te au mea, kua akaruke a Machaka i te kainga, e na tetai ngutuare tangata Kite i roto i te putuputuanga o reira i apai iaia.
Kua riri tikai to Machaka nga metua e kua manako raua i te neke mamao atu mei te reira ngai e raukaʼi i te kopae takiri i te aravei anga i te Au Kite. E tikai, kua taitaia a Machaka i teia, inara kua kite aia i te akapumaana anga maata i te uriuri anga te au taeake kiaia ia Salamo 27:10, tei akakite ra: “Akaruke ua toku metua tane e toku metua vaine iaku, ei reirā Iehova e rave mai ei iaku.”
I muri akera, kua maru mai to Machaka nga metua, e kua manako aia i te oki mai ki te kainga. Tei tupu mai kua riro te tu tauta o ta raua tamaiti te tavini anga ia Iehova ei mea umere ririnui tikai kia raua no te mea kua inangaro katoa raua i tetai apii Pipiria ki te Au Kite o Iehova! Kua aere katoa raua ki te toru ra katoatoa o te Uruoaanga Tapere “Au Karere o te Au Tu Atua,” i muri akera kua akakeuia raua kia akakite: “E tikai, teia ta te Atua akaaerenga.”
Ae, penei ka riro te patoi anga ei mea timata anga, inara kare to te Atua au karere tiratiratu e tuku i te au. Ka aere ua atu ratou ma te mataku kore, te kiteanga “e, na te au tumatetenga e akatupu i te akakoromaki; e na te akakoromaki e akatupu i te kite.” (Roma 5:3, 4) Ka rauka tikai i te Au Kite o Iehova i Malawi i te akatika e ka arataki atu te tu akakoromaki ki ta te Atua akameitakianga.