Ka Puapinga Maata Atu Ainei Toou Oraanga?

KARE te puapinga tikai i te akaraanga e ko te mea tika tikai. Te moni pepa teitei roa atu te puapinga tei orongaia i Marike e $10,000 te puapinga. Inara, ko te pepa tei neneiia te reira ki runga e iti ua te puapinga.

I manako ana ainei koe e me ka rauka i tetai au pepa e iti ua te puapinga i te oronga mai i te puapinga tikai ki toou oraanga? E manganui te tangata te manako ra e ka rauka i te reira. E mirioni ua atu te angaanga ra i te po e ao kia maata te moni. Tetai taime te aite anga o te aruaru anga i te moni koia oki ko te akaatinga anga i to ratou oraanga kopapa, to ratou au oa, e pera to ratou pamiri. Eaa ra te puapinga? Ka rauka ainei i te moni​—me kare ta tatou i oko i te reira​—te apai mai i te merengo anga tika tikai e te mutu kore?

Kia tau ki te aronga kimikimi, te maata o ta tatou kimi anga i te akamerengo anga tei akanooia ki runga i te au apinga, e meangiti ua ka kiteia e tatou te reira. Kua taopenga te tangata tata tianara ko Alfie Kohn e “kare te akamerengo anga e oko ia. . . . No te au tangata te ngai mua ka rauka te apinganui i te oraanga te kite ra i te tu apiapi e te taitaia tuke ua ake e pera katoa te akaaka ra i te turanga tu tangata.”​—International Herald Tribune.

Noatu te kite ra te aronga kimikimi e te umuumu ra te oraanga puapinga i tetai atu apinga kare te moni, e manganui te tangata te manako tuke ra. Kare teia i te mea poitirere, mei te mea te akakeukeuia ra te aronga e noo ra i te au enua Opunga e te au akakitekite anga okooko e maata atu i te 3,000 i te ra. Me e au akakitekite anga no te motoka me kare kai venevene, te manako maata koia oki: ‘E oko i teia apinga, ka mataora ua atu koe.’

Eaa ra te tupu anga no te akakitekite anga putuputu o te au puapinga materia? Eaa ra, kua kopaeia te au puapinga i te pae vaerua! Kia tau ki tetai ripoti i roto i te makatini Newsweek, kua akakite te epitekopo o Cologne, Tiamani, i ou ua ake nei “i roto i to matou taiate, kare te Atua i te tumu tuatua maata.”

Penei kua akanoo koe i te katoa anga o toou au tu maroiroi i te akono anga i tetai oraanga. Penei te manako ra koe kare e maata ana toou taime no tetai atu apinga ke. Inara, i tetai atianga, penei ka kite koe e e maata atu tei te oraanga i te oro ope kore ua anga e tae ua atu i te kino anga o toou oraanga kopapa me kare kua tapu toou mataiti i te reira.

Ka apai mai ainei te akara maata anga i te au mea pae vaerua i te akamerengo anga maata? Eaa te ka oronga mai i te puapinga maata atu ki toou oraanga?