Te Au Metua e Akaki i tei Umuumuia e Taau Tamariki!

TE UMUUMU ra te tamariki i te arataki anga e te ako anga aroa ua, koia tikai mei to ratou nga metua. No teia, kua tuatua tetai vaine apii i Brazil, ko Tania Zagury, e: “Ko tei matauia e tetai tamaiti koia oki ko te kimi anga i te mataora. Te anoanoia ra kia akanooia te au kotinga. Na te au metua teia e rave. Me kare ratou e pera, kare te tamariki e rauka i te akaaereia.”

Inara, i roto i te au enua e manganui te akariro ra te mana akakeu a tetai taiate akatika ua i te akateitei i to tetai uaorai tu rangatira ei mea ngata no te aru i te ako anga i runga akenei. Ka uri, i reira, te au metua no te tauturu kiea? Te kite ra te au metua mataku i te Atua no ta ratou au tamariki e “e tuanga ïa no ko ia Iehova ra.” (Salamo 127:3) No reira, te akara atura ratou ki te Tuatua a te Atua, te Pipiria, no te arataki anga i te utuutu anga ia ratou. Ei akaraanga, te na ko ra a Maseli 13:24: “Ko tei vaoo ua i te pāpā ra, kua riri ïa i tana tamaiti: ko tei aroa ra iaia, e ako ïa iaia i reira ra.”

Te taangaanga ra te Pipiria i te tuatua “pāpā” kare e kia marama anake uaia no te papaanga kopapa; te akakite maira i te aite anga o te akatikatika, noatu e eaa te tuke o te reira. E tika, penei i te maata anga o te taime te anoano uaia ra te tuatua kia akatikatika i tetai aerenga kino o tetai tamaiti. Te na ko ra a Maseli 29:17: “E ako atu koe i to tamaiti, e mareka koe iaia i reira: koia rai ïa, e rekareka to ngakau iaia.”

Te umuumu ra te tamariki i te ako anga aroa ua kia akakore i te au tu tau kore. Te akapapu maira te akatikatika anga ngaueue kore e te takinga meitaki e te manako meitaki ra tetai metua i tana tamariki. (Maseli 22:6) No reira e te au metua, e akamaroiroi! Na te aruanga i te ako anga tau e te meitaki a te Pipiria, ka akamareka koe i te Atua ko Iehova e ka rauka katoa te akangateitei anga a taau tamariki.