Au Uianga a te Aronga Tatau

E tika ainei e kia karangaia e te akamaru ra te akaaroa o Iehova i tana tuatua tau?

Noatu e kua taangaangaia teia tuatua, e mea meitaki kia kopae i te reira i te mea i te akara anga te karanga ra e te akamaru ra te akaaroa o Iehova me kare te akakoromaki ra i tona tuatua tau, mei te mea rai e teitei atu tona akaaroa i te tu pakari o te tuatua tau ra. Kare teia i te tika.

Te tuatua Epera no te “tuatua tau” te rauka katoa ra te aite anga e “akava anga.” Te piri vaitata ra te tuatua tau ki te tuatua tika. Inara, e au tumu anga ture tei matauia ki te tuatua tau. Kare ki te tuatua tika. E tika tikai e ka piri atu te tuatua tau o Iehova ki te akaoko anga i te utunga tau, inara ka piri katoa atu i te orongaanga i te ora no te aronga tau. (Genese 18: 20-32; Isaia 56:1; Malaki 4:2) No reira, kare e meitaki kia manakoia te tuatua tau o Iehova e e kino me kare te anoanoia ra kia akamaruia.

Te tuatua Epera no te “akaaroa” ka rauka i te taikuia ki te akono anga i te akakoromaki i te orongaanga i te akava anga. Ka rauka katoa i te taikuia ki tetai tuatua oraora no te tangi aroa, i te apai mai anga i te akaora anga ki te aronga kare i puapingaia.​—Deuteronomi 10:18; Luka 10:​29-37.

E Atua a Iehova no te tuatua tau e te akaaroa. (Exodo 34:​6, 7, NW; Deuteronomi 32:4; Salamo 145:9) E tu apa kore tana tuatua tau e tona akaaroa, e te angaanga kapipiti rotai ra raua. (Salamo 116:5; Hosea 2:19) Te akatau apa kore ra nga tu me kare te tauturu ra i tetai e tetai. No reira, me te karanga ra tatou e te akamaru ra te akaaroa o Iehova i tona tuatua tau, ka tau katoa tatou kia tuatua e te akamaru ra tona tuatua tau i tona akaaroa.

Kua totou mai a Isaia: “E tapapa rā Iehova, kia takinga-meitaki aia ia kotou, e e tu aia ki runga kia aroa aia ia kotou: e Atua tuatua-tau oki a Iehova.” (Isaia 30:18) Te akaari ra a Isaia i konei e te akakeu ra te tuatua tau o Iehova i te angaanga o te akaaroa kare te aite anga e te akamaru ra me kare te akakoromaki ra tona tu akaaroa i tana tuatua tau. Te akaari ra a Iehova i te akaaroa no te mea e tau tikai aia e no te mea oki e aroa aia.

E tika, kua tata te tangata tata Pipiria ko Iakobo: “E vi ra te akaapa i te aroa.” (Iakobo 2:13e) Inara, i roto i te tata anga kare a Iakobo e tuatua ana no Iehova mari ra no te au Kerititiano tei akaari i te akaaroa​—ei akatauanga, ki te aronga akaaka e te putaua. (Iakobo 1:27; 2:​1-9) Me apainaia mai taua aronga tu akaaroa ki roto i te akava anga, te akara ra a Iehova i to ratou tu e te akakore aroa ra i ta ratou ara i runga i te tumu anga o te atinga o tana Tamaiti. I reira, ka vi ei to ratou tu akaaroa ki runga ake i tetai ua atu akava anga te ka tutaki atu ratou.​—Maseli 14:21; Mataio 5:7; 6:12; 7:2.

No reira, kare e tika i te karangaia e te akamaru ra te akava anga a Iehova i tona akaaroa mei tera te tu e te anoanoia ra tana tuatua tau kia tamaruia e te akaaroa. Kia Iehova e turanga apa kore te nga tu e rua. Te akaaiteiteia ra raua ki tetai e tetai mei ia raua ra e akaaiteite ra​—e te akaaiteiteia ra​—ki tetai atu au tu o Iehova, mei te aroa e te pakari.