Ripoti a te Aronga Tutu Patireia

“Kua Inangaro Au i te Tavini i te Atua”

“KA AERE ke mai ana kotou ki vao, e aku au tangata.” E kapiki anga te reira na tetai angera tei akarongoia e te apotetoro ko Ioane i te anere mataiti mua T.N. I roto i to tatou tuatau e au mirioni ua atu te au tangata ngakau tika tei ariu mai e tei aere ke mai mei ia “Babulonia maata,” te patireia o te akonoanga pikikaa i te ao. (Apokalupo 18:​1-4) I roto ia ratou ko Wilner tetai mei Haiti mai, te akakite maira i tona kite anga.

“Kua anauia au i te 1956 i roto i tetai pamiri Katorika akono ua i roto i tetai taoni meangiti o St. Marc, i Haiti. Ka akamanako ana i te rekareka o toku pamiri i te iki angaia au, ma tetai e rua mei to matou taoni, kia aere atu ki te ngai apiianga akonoanga i St. Michel de l’Atalaye, i Haiti. E oti, i te 1980, kua tukunaia atu matou ki Stavelot, Belgium, no tetai atu terenianga. I reira kua aere katoa atu matou ki te apii teitei Katorika.

“I te akamata anga kua rekareka au i te akono atu i te taoonga ei orometua. I tetai ra i roto i te pia kaikai anga, kua pati mai te orometua tei akaaere i to matou pupu iaku kia noo mai no nga mea miniti no te mea e apinga tana i inangaro i te akakite mai kiaku. Ka akamanako ana i toku poitirere anga i te akakite mai anga aia i tona inangaro iaku i te pae ainga! Kua patoi atu au i tana i taiku maira e kua tupu te manako oripu ua kiaku. Kua tata atu au ki toku pamiri no runga i taua tupu anga e kua akaruke atu i te ngai apiianga akonoanga i nga mea marama i muri mai, noatu to ratou tu mareka kore. Kua kitea e au tetai ngai nooanga i roto i te vira e kua rave atu i te au apiianga i roto i tetai angaanga ke.

“I te oki anga atu au ki St. Marc, kare oku irinaki akaou i te Akonoanga Katorika. Noatu rai, te inangaro ra rai au i te tavini i te Atua, inara kare au i kite e eaa te ka rave. Kua aere atu au ki te akonoanga Ra Itu, te akonoanga Ebenezer, e te akonoanga Momani. Te aere ua ra au ma te kore e arataki anga i te pae vaerua.

“E oti kua maara mai iaku koi aere atu ei ki te ngai apiianga i Belgium, e tatau ana au i te Pipiria Crampon. I roto i te reira kua kite mai au e e ingoa to te Atua. No reira te tuatuaanga i tona ingoa kua pure akatenga atu au ki te Atua kia tauturu mai iaku i te kimi i te akonoanga mou.

“Kare i roa ana i muri mai i te reira, kua neke mai e rua Au Kite o Iehova ki toku ngai nooanga. E tu muteki ua to raua, te akangateitei, e te akateiteiia. Kua reka tikai au i to raua tu oraanga. I tetai ra, kua pati mai tetai o te nga Kite, iaku kia aere atu i te Akamaara Anga mataiti i te matenga o Karaiti. Kua reka tikai au i te uipaanga e kua akatika i te apii putuputu i te Pipiria ma te nga Kite. I roto i te ono marama, kua irinaki mai au e kua kitea e au te mataara tika i te tavini anga i te Atua. Kua akatapu au i toku oraanga kia Iehova e kua papetitoia ia Noema 20, 1988.”

Kare i roa ana, kua rave atu a Wilner i te angaanga tamou. I teia tuatau, te tavini nei aia ei tangata pakari i roto i te putuputuanga. Te tavini mataora ra aia e tana vaine, ma ta raua nga tamariki e rua, i roto i te putuputuanga.

[Tutu i te kapi 9]

Na te tatauanga i te Pipiria, kua kitea mai e Wilner to te Atua ingoa ko Iehova