Tamateia te Au Kite o Iehova kua Akamaaraia

IA Mati 7, 2002, kua akaariia tetai papa auri akamaara anga i roto i te taoni o Körmend i Ungari opunga. Kua akamaara te reira i te matenga o nga Kite e toru o Iehova tei tamateia e te Nazi i te 1945.

Kua tamouia te papa auri ki runga i te patu o te au opati maata o teia tuatau o te are tipatimani tamate ai i runga i te Mataara Hunyadi, te ngai i raveiai te au tamateanga. Kua akatapuia te papa auri ei akamaara anga i te ‘au Kerititiano tei tamateia ei aronga patoi akava ngakau i roto ia Mati 1945. Ko Antal Hőnisch (1911-1945), ko Bertalan Szabó (1921-1945), ko János Zsondor (1923-1945), 2002, e Au Kite o Iehova.’

Kua raveia te au tamate anga e rua marama i mua ua ake te openga o te Tamaki II o te Ao. Eaa ra teia au Kerititiano i tamateiai? Kua akataka mai te nutipepa Ungari Vas Népe e: “I muri ake i te kake anga a Hitler ki te mana taoonga i Tiamani, kare ko te au ngati Iuda ua mari ra ko te aronga tiratiratu katoa o te Au Kite o Iehova tei akaputuia mai no te tamamae anga e te takinokino anga, te puakapa tapeka anga e te mate me kare ratou e akakore i to ratou irinaki anga akonoanga. . . . Ia Mati 1945, kua tupu tikai te tamataku anga i roto i te tuanga opunga o Ungari. . . . Ko tetai tuanga o teia tamataku anga kia akaatea e kia tamateia te au mema o te Au Kite o Iehova.”

Te porokaramu te kapiti atura ki te papa auri kua akatakakeia i roto i nga tuanga e rua. Kua raveia te mea mua ki te are teata o te Punanga Batthyány, kua kapitiia mai te au vaa tuatua ko Poropeta Szabolcs Szita, te tangata maata no te Ngai Pepa Akanooanga Orokoti i Budapest; ko László Donáth, e mema no te Kumiti Paramani o te Au Tika Anga Tangata, te Meangiti e te Au Angaanga Akonoanga; e Kálmán Komjáthy, ko tetai tei kite mata i te au tamate anga koia i teianei te tangata tuatua enua no te taoni. Kua tere atu i te 500 tangata tei tae mai kua aere tika atu ki te taoni no te tuanga rua o te porokaramu​—te akaariangaia te papa auri e te akaaere maata o te oire ko József Honfi o Körmend.

I roto i tana reta openga, kua raurau atura te Kite ko Ján Žondor (János Zsondor) i tona au taeake Kerititiano e te au tuaine e auraka e aue. Kua tata aia: “Te mou nei rai iaku i roto i toku manako i te au tuatua a Ioane te kitea ra ia Apokalupo 2:10 e: ‘Kia mou marie ra koe e tae ua atu ki te matenga.’ . . . E akakite atu ki te aronga i te kainga e auraka e aue, kua mate oki au no te tuatua mou kare ra ei tangata rave kino.”

[Tutu i te kapi 32]

Ko Bertalan Szabó

[Tutu i te kapi 32]

Ko Antal Hőnisch

[Tutu i te kapi 32]

Ko Ján Žondor