“E Akavaitata Atu ki te Atua, e Nana e Akavaitata Mai kia Kotou Na”
I Mua e i Muri Ake—Akapeea te Pipiria i te Taui Anga i Teia Tangata
E PUAPINGA maata te akatangi imene i roto i to Rolf-Michael oraanga. E apinga inangaroia e ia te au apinga akakona. Ei mapu i Tiamani, kua inu maata aia i te kava e kua kai i te LSD, te kokaine, te hashish, e tetai atu au apinga akamaru i te manako.
Iaia e tauta ra i te apai atu i te au apinga akakona ki roto i tetai enua i Aperika, kua opuia a Rolf-Michael e kua akapou e 13 marama i roto i te are auri. Kua akariro taua tuatau i roto i te are auri iaia kia akamanako no runga i te akakoroanga tikai o te oraanga.
Kua kimi marie tikai a Rolf-Michael raua ko tana vaine, ko Ursula, i te aiteanga o te oraanga e kua kimi i te tuatua mou. Noatu te au tupuanga papu kore ki tetai au ekaretia Kerititiano tutu ua, kua inangaro tikai raua i te kite meitaki i te Atua. E au uianga ta raua kare ra i rauka ana te au pauanga merengo ua mei te au pupu akonoanga tuketuke. Pera katoa, kare teia au akonoanga i oronga mai i te akakoroanga ririnui kia akakeu ia raua kia taui i to raua oraanga.
I te openga ra kua aravei atu a Rolf-Michael raua ko Ursula i te Au Kite o Iehova. I muri mai i te akamata anga i te apii i te Pipiria, kua akakeu oonuia a Rolf-Michael e te akoanga: “E akavaitata atu ki te Atua, e nana e akavaitata mai kia kotou na.” (Iakobo 4:8) Kua tauta aia i te ‘kopae i te tuatua i muatangana ra i te tangata taito. E kia akatangata ou oki ko tei angaia kia tau i te Atua ra, i te tuatua-tika e te tapu mou.’—Ephesia 4:22-24.
Akapeea e rauka ei ia Rolf-Michael i te akatangata ou? Kua akaariia atu kiaia mei te Pipiria e na roto “i te kite” ka rauka to tetai tangata tu i te ‘akaouia mei te tu katoa o Tei anga iaia ra,’ koia, ko te Atua ko Iehova.—Kolosa 3:9-11.
Iaia e apii ra i te kite tika tikai, kua anoano atu a Rolf-Michael i te tarotai i tona oraanga ki te au kaveinga o te Tuatua a te Atua. (Ioane 17:3) Kua ngata tikai i te akaruke i te au apinga akakona, inara kua kite a Rolf-Michael i te puapinga no te aere atu kia Iehova na roto i te pure e te kite anga i tana tauturu. (1 Ioane 5:14, 15) Kua rauka mai tetai atu tauturu mei te kapitianga vaitata ki te aronga e Au Kite o Iehova, te angaanga pakari ra i te rave i to te Atua anoano.
Te kiteanga e ka takake teia ao e ko te aronga e rave ra i te anoano o te Atua ka ora ua atu kua tauturu katoa ia Rolf-Michael. Kua akariro te reira iaia kia iki, kare i te inangaro poto ua o te ao, mari ra te akameitakianga mutu kore no tetai pirianga vaitata ma tetai Atua aroa ua, ko Iehova. (1 Ioane 2:15-17) Kua akakeu oonuia a Rolf-Michael e te au tuatua a Maseli 27:11: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.” Kua tuatua ariki ua aia: “Te akaari mai nei teia irava i te oonu o to Iehova inangaro, mei te mea e te oronga maira aia ki te au tangata i te tuatau kia akarekareka i tona ngakau.”
Mei ia Rolf-Michael rai, e tana vaine, e ta raua tamariki e toru, e au anere tauatini ua atu tei puapingaia mei te aru anga i ta te Pipiria au kaveinga. Ka kitea taua aronga tataki tai i roto i te au putuputuanga a te Au Kite o Iehova takapini i te ao. Ma te mii ua, i roto i etai au enua te akaapa pikikaaia ra te Au Kite e e pupu kino te akatakake ra i te ngutuare. Te akapapu maira to Rolf-Michael tupuanga e kare i tau te reira.—Ebera 4:12.
Te akakite maira a Rolf-Michael e ko Mataio 6:33, te raurau maira ia tatou kia tuku i te au anoano o te pae vaerua ki te ngai mua, te “komopati” ia o tona ngutuare, te arataki ra ia ratou ki roto i te aratakianga tika. Te ariki oonu nei aia e tona ngutuare ia Iehova no te oraanga ngutuare mataora te kite ra ratou ei au Kerititiano. Te akatika ra ratou i te au tuatua a te tata taramo tei imene: “Eaa ra taku e apai atu na Iehova, i te au takinga-meitaki katoa nona iaku nei?”—Salamo 116:12.
[Tataanga i te kapi 9]
Te oronga maira te Atua ki te au tangata i te tuatau kia akarekareka i tona ngakau
[Pia i te kapi 9]
Au Kaveinga Pipiria e Angaanga Ra
Ko tetai au kaveinga Pipiria tei akakeu i te manganui kia akaruke i te au apinga akakona kino te aru mai nei:
“Ko kotou, tei inangaro ia Iehova, kia rikarika i te kino ra.” (Salamo 97:10) Te irinaki papu anga i te tu kino o te au raveanga matenga e te akatupu anga i te makitakita tikai no te reira, ka mama ua i tetai tangata i te rave i tei akamareka i te Atua.
“Ko tei kapiti katoa i tona aerenga ki to te aronga pakari ra, ka pakari katoa ïa: ko tei kapiti ra ki te aronga neneva ra, e mate ïa.” (Maseli 13:20) Kia tuatua kare ki te au apinga akakona e tetai atu au apinga kaki, ka anoanoia tetai tangata kia iki meitaki i tona au oa. Te tatanu anga i te pirianga oa o te au Kerititiano te ka tauturu iaia kia akakore i tetai apinga ka riro ei puapinga.
“Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako i te Mesia nei ia Iesu.” (Philipi 4:6, 7) Kare te au o te ngakau e te manako e rauka i te akaaiteia ki tetai apinga ke. E ka tauturu te irinakianga i te Atua na roto i te pure kia akono ua tetai i te au manamanata i te pae oraanga ma te kore e uri atu ki te au apinga akakona kakiia.