Good News for People of All Nations
AKAARIIA i runga mai ko tetai puka rikiriki tukunaia mai i te 2004/05 “Aaere ma te Atua” Au Uruoaanga Tapere no te Au Kite o Iehova. Tetai tataanga o te reira koia oki ko tetai puka rikiriki e 96 kapi te vai ra tetai karere poto ua i roto e 92 reo, mei te reo Afrikaans ki te Zulu, e kua neneiia i te tauturu i te totoaanga i te tuatua meitaki no te Patireia ki te au tangata e manganui te ka rauka maata ia. (Mataio 24:14) Tei aru mai ko te au tupuanga matauia me taangaangaia te puka rikiriki.
• I muri ake i te rauka mai anga te puka rikiriki i ko i te uruoaanga, kua atoro atu tetai pamiri Kite e toru nga paka maata o te pa enua. I reira kua aravei atu ratou i te au tangata no Initia mai, te Neterani, Pakitana, e te Piripine. Kua akakite mai te tane: “Noatu e tuatua pouroa ana teia au tangata i te reo Papaa, kua umere ratou i to matou akaari atu anga kia ratou i te karere i roto i to ratou uaorai reo, mei te mea e e au tauatini e ara maire ratou mei te kainga. Te tu o ta tatou angaanga i te ao nei e pera katoa i to tatou taokotaianga kua kite meitaki ratou i teianei.”
• Kua akaari atu tetai Kite i te puka rikiriki ki tetai taeake angaanga mei Initia mai. Kua mataora tikai aia i te kite anga i te au reo katoatoa i roto i te reira e kua tatau atu i te karere i roto i tona uaorai reo. Kua taki atu teia ki te au pukapukaanga maata no runga i te Pipiria. Kua umere tetai taeake angaanga i Piripine i te kiteanga i tona reo tupuna i roto i te puka rikiriki e kua inangaro mai i te kite maata atu no runga i te Au Kite o Iehova.
• I Kanata, kua akatika tetai vaine i runga i te terepaoni mei Nepal mai i te apii i te Pipiria ma tetai Kite inara kua ekoko mai i te pati atu i te tuaine ki tona kainga. Inara, i te akakite atu anga te Kite ki te vaine no runga i te puka rikiriki ma tetai akakiteanga i roto i te reo Nepali, kua pati rekareka atu aia i te tuaine kia aere mai. Kua inangaro oki aia i te kite uaorai i te karere i roto i tona reo tupuna! Mei reira mai kua raveia te apii Pipiria i te are o te vaine.