PAUIA TE AU UIANGA PIPIRIA

Koai te ingoa o te Atua?

E ingoa to te au mema tataki tai o to tatou pamiri. E ingoa katoa to te au manu angai! Kare ainei i te mea tau e e ingoa katoa rai to te Atua? I roto i te Pipiria, e maata te au taoonga o te Atua, mei te Atua Mana Katoatoa, Atu Ngateitei, e Tei Anga mai, inara, e ingoa katoa tona.​—E tatau ia Isaia 42:8.

Tei roto te ingoa o te Atua i te maataanga o te urianga Pipiria i roto ia Salamo 83:18. Ei akaraanga te tuatua ra te irava i roto i te Bibilia Tapu e: “Ko Iehova toou ingoa, e ko koe anake Tei Teitei i te enua katoa nei.”

Eaa ra tatou ka taangaanga ai i te ingoa o te Atua?

Te inangaro ra te Atua ia tatou kia taangaanga i tona ingoa. Me tuatua tatou ki te aronga e akaperepere ana tatou, mei to tatou au oa piri vaitata rai, e kapiki ana tatou i to ratou ingoa mua. Ka tuke ainei te reira me tuatua tatou ki te Atua? Tei maata atu, kua akamaroiroi mai a Iesu Karaiti e kia taangaanga tatou i te ingoa o te Atua.​—E tatau ia Mataio 6:9; Ioane 17:26.

Inara, e riro ei tatou ei oa no te Atua, ka anoanoia tatou kia kite maata atu no runga iaia, kare i tona ingoa ua. Ei akatauanga, eaa ra to te Atua tu? Ka rauka ainei i te akavaitata atu ki te Atua? Ka kite koe i te au pauanga no taua au uianga ra i roto i te Pipiria.