PAUIA TE AU UIANGA PIPIRIA

Eaa ra a Iesu i kapikiia ai e ko te Tamaiti a te Atua?

Kare a te Atua vaine kia anau mai i tana au tamariki. Koia Tei Anga mai i te au mea ora ravarai. Kua angaia mai te au tangata kia aru i to te Atua au tu. No reira rai i kapikiia ai te tangata mua ta te Atua i anga mai ko Adamu e ko te tamaiti “na te Atua.” Kua kapiki katoaia a Iesu e ko ‘te Tamaiti a te Atua,’ no te mea kua angaia mai aia kia akaata mai i te au au tu o tona Metua.​—E tatau ia Luka 3:38; Ioane 1:14, 49.

Inaea a Iesu i angaia mai ei?

Kua anga mai te Atua ia Iesu i mua ake te anga mai anga aia ia Adamu. Tika rai, kua anga te Atua ia Iesu e kua taangaanga iaia kia maani i te au mea ravarai, kapiti mai i te au angera. No reira rai te Pipiria i kapiki ei ia Iesu e ‘ko te Tama mua o te au mea ravarai i angaia ra’ e te Atua.​—E tatau ia Kolosa 1:15, 16.

I mua ake ka anauia ai aia i Betelehema, kua noo ana a Iesu ei angera i runga i te rangi. Te tae anga te tuatau, kua tuku atu te Atua i te oraanga o Iesu mei runga i te rangi ki roto i te kopu o Maria, kia anauia mai aia ei tangata.​—E tatau ia Luka 1:30-32; Ioane 6:38; 8:23.

Eaa ra te Atua i akatika ai ia Iesu kia anauia mai i runga i te enua ei tangata? Eaa te angaanga puapinga ta Iesu i akatupu? Ka kite mai koe i taua au pauanga ra no runga i teia nga uianga i roto i te Pipiria, e ka akamaata atu te reira i toou marama e ka ariki rekareka atu koe i ta te Atua e ta Iesu i rave noou.