Eaa te Atua i Akatika ai te Aronga Mana Kia Takinga Kino i te Aronga Akaaka?

Te akakite maira te Pipiria i tetai au manamanata no runga i te takinga kino a te aronga mana taoonga i te aronga akaaka ua. Kua tupu teia tumatetenga kia Nabota.a I te ngauru o te anere mataiti M.T.N., kua akatika a Ahaba te ariki o Iseraela, e kia tamate tana vaine a Iezebela ia Nabota e tana puke tamariki, kia peke mai te kainga vine o taua tangata ra i te ariki. (1 Ariki 21:1-16; 2 Ariki 9:26) Eaa ra te Atua i akatika ai i teia ravenga kino kia tupu?

Ka akara ana tatou e tai mea puapinga: Kare e tika i te Atua kia pikikaa. (Tito 1:2) Eaa ra te pirianga o te reira ki te au ravenga kino? E mate, mei ta te Atua i akamatakite mai mei muatangana roa mai, e me ka meameaau te tangata iaia ka tupu te kino. Tika atura ki ta te Atua i akakite, kua riro te mate ei tuanga i roto i te oraanga o te tangata mei te taime mai i tupu ei te meameaau i roto i te aua i Edene. Ko te tangata mua tei mate, i tupu te reira no te takinga kino​—te tamate anga a Kaina i tona teina ia Abela.​—Genese 2:16, 17; 4:8.

No runga i te tuatua enua o te tangata mei taua taime mai, te akakite poto maira te Tuatua a te Atua e: “Te tutara ra tetai tangata ki rungao i tetai, ei mate nona uaorai.” (Koheleta 8:9) Kare ainei e kua tupu taua au tuatua ra? Kua akamatakite a Iehova i tona iti tangata ia Iseraela, e ka aue te iti tangata ki te Atua no te takinga kino a to ratou au ariki. (1 Samuela 8:11-18) Kua akateiaa roa atu te Ariki ko Solomona i te apainga ki runga i tona iti tangata. (1 Ariki 11:43; 12:3, 4) E e kino roa atu te takinga kino a te au ariki kino mei ia Ahaba rai te tu. Akamanako ana: Naringa te Atua i takore i taua au ravenga takinga kino, kare ainei e ka riro tana au tuatua ei mea pikikaa?

Akamaara katoa i te akaapaanga a Satani e te tavini ua ra te tangata i te Atua no to ratou uaorai anoano tika kore. (Iobu 1:9, 10; 2:4) Mei te mea e kua paruru te Atua i tona au tavini mei te au tu takinga kino, kare ainei te reira e akapapu mai e kua tika rai ta Satani akaapaanga? E mei te mea e ka paruru te Atua i te au tangata ravarai mei te au tu takinga kino, kare ainei e koia te pikikaa maata rava atu? I raro ake i taua paruruanga ra, penei ka manako te manganui o te tangata e kare e anoanoia te Atua, no te mea ka rauka ia ratou i te akatere ia ratou uaorai. Inara e apinga ke ta te Tuatua a te Atua e akakite maira​—kare takiri e rauka i te tangata i te akatere ia ratou uaorai. (Ieremia 10:23) Ka anoano tatou i te Patireia o te Atua kia tae mai; i reira ua rai e kore ei teia tu tika kore.

Ko te aiteanga ainei i reira e kare te Atua e inangaro i te rave i tetai mea i te takore atu i te takinga kino? Kare. Akamanako ana e rua nga apinga tana e rave ana: Mea mua, ka akakite mai aia i te au mea ravarai no runga i te takinga kino. Ei akaraanga, te akakite maira tana Tuatua i te au mea ravarai no runga i te ravenga kino a Iezebela ia Nabota. Akakite katoa maira te Pipiria e na tetai tutara mana ririnui, tei uuna i tona tu tikai, e akatupu ra i teia au angaanga kino. (Ioane 14:30; 2 Korinetia 11:14) Akakite atea ua maira te Pipiria iaia, e ko Satani te Tiaporo. Na te akaari pu ua mai anga i te angaanga kino e te takinga kino, e naai e akatupu ra i te reira, te tauturu maira te Atua ia tatou kia rauka i te kopae takiri atu i te angaanga kino. Na roto i te reira, te paruru maira aia i to tatou oraanga no te tuatau ki mua.

Te rua, te oronga maira te Atua i te manakonakoanga mou e ka ope te takinga kino. Te mataara i akakite pu mai ei aia i te kino o Ahaba e Iezebela, e i te akava anga e te akautunga anga ia raua e te manganui mei ia raua rai, kua riro ei akamatutu i to tatou irinakianga i roto i tana au taputou kia akautunga i te aronga rave kino a tetai ra. (Salamo 52:1-5) Oronga katoa mai te Atua i te manakonakoanga papu e kare e roa atu ka takore takiri aia i te au mea e akatupu ra i te kino ki te aronga tei inangaro iaia.b A taua tuatau ra, ka noo te tangata tiratiratu ko Nabota e tana puke tamariki ki roto i te enua parataito e mutu kore ua atu, kare e takinga kino akaouia.​—Salamo 37:34.