E Manganui te ka Ora i te Openga​—E Koe Katoa

Te akakite maira te Pipiria kia tatou e ka tupu te akapouanga i te openga: “E mate maata tei te reira tuatau, kare ïa mei muatangana mai i teianei ao, e tae rava akenei i teianei rā . . . Naringa oki kare taua au rā i tapotoia, kare rava tetai tangata e ora.” (Mataio 24:21, 22) Inara te taputou maira te Atua e e maata te au tangata te ka ora mai: “Te ngaro ke nei teianei ao, . . . , ko tei akono ra i to te Atua ra anoano, e tika ïa i te ora anga e tuatau ua atu.”​—1 Ioane 2:17.

Me inangaro koe kia akaoraia mai me ngaro ke teianei ao e kia ‘ora e tuatau ua atu,’ eaa taau ka rave? Ka akaputu ainei koe i te au apinga no te oraanga me kore te akapapa anga i te au apinga i te pae kopapa? Kare. Te akamaroiroi maira te Pipiria ia tatou kia akanoo i te au akakoroanga ke. Te tatau nei: “E teianei ka pou anake taua au mea katoa nei, mei te aa ra to kotou tu e tikaʼi i te tuatua tapu e te akono i te Atua; I te tatari anga, e te rapurapu anga atu, kia tae mai taua rā o te Atua ra.” (2 Petero 3:10-12) Te akaari maira te aerenga tuatua e ko “taua au mea katoa nei” te ka akapouia, ko te au tutaraanga o teianei ao kino e te aronga pouroa te turu ra i taua tutaraanga ra, kare i to te Atua. Te taka ua ra, e me akaputu tatou i te au apinga i te pae kopapa, kare te reira e akaora ia tatou mei te akapou anga.

E tika, ka akaoraia tatou na te akarongo anga ki te Atua e te apii anga i te au tu e te au angaanga te akamareka ra iaia. (Zephania 2:3) Auraka e aru i te maataanga o te tangata i teia tuatau na te kopae anga i te au akairo taka meitaki e te noo nei tatou i tetai tuatau puapinga tikai, mari ra kia akamanako ua rai i “taua rā o te Atua.” Ka rauka i te Au Kite o Iehova i te akaari atu kia koe e akapeea koe e ora ai mei taua rā ra e tu mai nei.