Apii Mai Au Kia Akangateitei i te Vaine e Iaku Uaorai

TOKU ORAANGA I MUA ANA:

Kua anauia au i Mulhouse, i te tua apatokerau itinga o Varani, e oire e angaanga pakari ana te tangata e kua rongonui no te tu takinokino. Taku i maara mai i toku tamariki anga, ko te pekapeka maata i rotopu i te au kopu tangata i toku ngai. I to matou ngutuare tangata, e akavaavaaia ana te vaine e kare e manakoia ana no te tauturu. Kua apiiia au e ko te tuanga a te vaine i roto i te ngutuare, e tunu kai e te akono i te au tane e te tamariki.

Kare toku tamariki anga i te tupu anga meitaki. E tai ngauru oku mataiti, kua mate toku papa no te konā kava. E rima mataiti i muri mai, kua tamate toku tuakana iaia uaorai. I taua mataiti ra, kua kite au i tetai tangata tei tamateia no te pekapeka o te ngutuare e kua poitirere tikai au. Kua apii te au mema o toku ngutuare tangata iaku kia taangaanga i te matipi e te pupui ei tamaki atu me tupu mai te tā. Ei mapu taitaia, kua kotikoti au i toku kopapa e kua inu i te kava.

E 16 oku mataiti, e inu ana au e 10 ki te 15 moina kava i te rā okotai, e kare i roa ana kua akamata au i te kai i te apinga akakona. Ei tutaki i taku au peu viivii, kua oko au i te potonga auri e kua keikeia. I toku 17 mataiti anga, kua pei takereia au ki roto i te are auri. I te katoa anga, e 18 taime kua akautungaia au no te keikeia e te takinokino.

E 20 tuma oku mataiti, e tuatau kino roa atu te reira o toku oraanga. E 20 avaava maruana taku e kai ana i te rā okotai e kua kai katoa au i tetai atu apinga akakona. E maata te au taime, vaitata rai au i te mate no te kai maata i teia au apinga. Kua akamata au i te okooko i te au apinga akakona, no reira e apai ua ana au i te matipi e te pupui. I tetai atianga, kua tauta au i te pupui i tetai tangata, inara mea manuia kua u te katiriti ki runga i tona pakara piripou! I toku 24 mataiti anga, kua mate toku metua vaine, e kua tupu toku riri otooto. Me kite mai te tangata iaku e aere ra na runga i te mataara, ka mataku ratou e ka aere ki tetai tua i te mataara. No te mea e piri ana au ki roto i te tā, kua akapou au i te au openga epetoma i ko i te ngai o te akava e i roto i te aremaki i te tui i te au motumotu i runga i toku kopapa.

I toku 28 mataiti anga kua akaipoipo au. Mei taau e kite ra, kare au e akangateitei ana i taku vaine. E akakino ana au e te takinokino iaia. Kare maua e angaanga kapiti ana ei nga tokorua. Manako mai au ka meitaki ua i te oronga maata i te au apinga manea tei keiaia e au. E oti, kua tupu tetai apinga poitirere. Kua akamata taku vaine i te apii i te Pipiria ki te Au Kite o Iehova. I muri ake i tana apii mua, kua akamutu aia i te kai avaava, kare aia e āriki akaou i te au moni keiaia, e kua akaoki mai i te au apinga akamanea. Kua riri tikai au. Kua patoi au i tana apii Pipiria e kua pupui i te auai avaava ki roto i tona mata. Kua akakino katoa au iaia ki mua i te katoatoa.

I tetai po, konāia au e te kava, kua tutungi au i to matou apatimani ki te aʼi. Kua akaora taku vaine iaku e ta maua tamaine e rima ona mataiti no roto mai i te aʼi. Te ngaro anga toku konā kava, kua kinokino toku manako ngakau. I roto tikai iaku, kua manako au e kare rava te Atua e akakore mai i taku ara. Maara iaku toku akarongo anga i te orometua e tuatua ra e ka aere te aronga kino ki roto i te aʼi era. Akakite katoa te taote no te maki manako kiaku e: “Kua oti koe! Kare e rauka i te akaora ia koe.”

KUA TAUI TE PIPIRIA I TOKU ORAANGA:

Muri ake te kā anga to matou apatimani, kua neke matou ki te are o te nga metua o taku vaine. Te atoro anga te Au Kite i taku vaine, kua ui au kia raua, “Ka rauka ainei i te Atua kia akakore i taku au ara?” Kua akaari mai raua kiaku ia 1 Korinetia 6:9-11 i roto i te Pipiria. Te akaari ra taua irava i te au angaanga ta te Atua e rikarika ra, inara te akakite katoa ra e: “Mei te reira oki tetai papaki o kotou na.” Kua akapapu teia au tuatua kiaku e ka rauka iaku te taui. E oti, kua akapapu mai te Au Kite kiaku e te aroa maira te Atua iaku na te akaari mai anga ia 1 Ioane 4:8. Kua akamaroiroiia au, no reira kua pati au i te Au Kite kia apii i te Pipiria kiaku e rua taime i te epetoma, e kua akamata au i te aere ki ta ratou au uipaanga Kerititiano. E pure putuputu ana au kia Iehova.

E tai marama i pou, kua akamutu au i te kai i te apinga akakona e te inu i te kava. Kare i roa ana kua kite au e te tamaki nei a roto i toku kopapa! Kua kite au i te mamae e te moemoea kino, mamae toku mimiti, uti toku kopapa, e kua akamata i te kinokino. Inara i taua taime ra, kua kite mai au e te mou ua ra a Iehova i toku rima e te akamaroiroi mai iaku. Kua manako mai au mei te apotetoro ko Paulo rai. No runga i te tauturu ta te Atua i oronga kiaia, kua tata a Paulo e: “E tika iaku te au mea ravarai nei i te Mesia, ko tei akamaroiroi mai iaku nei.” (Philipi 4:13) I muri mai, kua rauka katoa iaku i te akamutu i te kai avaava.​—2 Korinetia 7:1.

Kapiti mai te tauturu tei orongaia mai kia akatere i toku oraanga, kua tauturu katoa te Pipiria i te akameitaki mai i toku ngutuare tangata. Kua taui toku tu ki taku vaine. Kua akamata au i te akangateitei maata iaia e te karanga e “ine” e te “meitaki maata.” Kua riro katoa au ei metua meitaki ki ta maua tamaine. I muri ake i te apiianga i te Pipiria no te tai mataiti, kua akatapu au i toku oraanga kia Iehova e kua papetitoia, te aru anga i te akaraanga o taku vaine.

KUA PUAPINGAIA AU:

Kua papu tikai iaku e kua akaoraia au e te au kaveinga Pipiria. Pera katoa kua kite toku ngutuare tangata kare i te Au Kite e ka mate au no te kai maata i te apinga akakona me kore ka mate i roto i te tā.

Kua taui takiri toku oraanga no te au apiianga Pipiria tei akaari mai i taku au apainga ei tane e ei metua. (Ephesia 5:25; 6:4) Kua akamata matou i te rave kapiti i te au angaanga ei ngutuare tangata. I teianei, kare au e akaruke i taku vaine kia tunu kai ua, mari ra te mataora nei au i te turuturu iaia i roto i tana angaanga ei vaine tutu evangeria. E te mataora nei aia i te turuturu iaku i roto i taku apainga ei tangata pakari i roto i te putuputuanga.

Kua riro te aroa e te takinga meitaki o te Atua ko Iehova i te akakeu maata i toku oraanga. E inangaro maata toku i te akakitekite i tona tu ki te aronga kare o ratou manakonakoanga, no te mea te maata anga kua manako akapera iaku. Kua kite au e mana to te Pipiria i te tauturu i tetai ua atu kia rauka te oraanga mā e te puapinga. Kua apii te Pipiria iaku kia inangaro e kia akangateitei i tetai ke, te tane e te vaine, pera katoa kia akangateitei iaku uaorai.