Pia Uianga

◼ Aea e tau ei i te akatupu i tetai pupu reo ke?

Me kapitiia mai tetai pupu tangata reo ke maata ki roto i te ngai e angaanga ra te putuputuanga, kia rave te aronga pakari i ta ratou ka rauka i te akaaere i te angaanga tutu anga i roto i tera reo. (km 7/02 kapi 1; km 2/98 kapi 3-4) Penei e atea te totoa anga o te au tangata reo ke na roto i te au ngai e rua me kore e maata atu te au putuputuanga i te pae mai. I taua tu ra, ka oronga te (au) akaaere kotinga i te aratakianga ka anoanoia, i te tauturu anga atu i reira i te au putuputuanga tei kapitiia mai kia taokotai i roto i te angaanga tutu aere. Tetai au taime, penei ka akanooia tetai tuatua na te katoatoa me kore te Apii Punanga Tiaki i te akapapu i te maata o te turuturuanga no te au uipaanga i roto i te reo ke.

Ka rauka kia akatupuia tetai pupu reo ke me akonoia te au umuumuanga ka aru mai: (1) E au papuritia me kore e aronga inangaro tetai ko te ka marama tikai i te tuatua meitaki i roto i te reo ke. (2) E tangata pakari tau tetai me kore e tavini tauturu te vai ra i te arataki e kia rave mei te okotai uipaanga i te epetoma. (3) E pupu aronga pakari tetai e inangaro ra i te akono i te pupu. Me oti ana teia au umuumuanga i te aruia, kia akakite te aronga pakari ki te opati manga kia ariki tau tikaia atu i reira te pupu e kia orongaia tetai au ikuikuanga akaou atu.

E akamata ana te maataanga o te au pupu na te rave anga i te Apii Puka a te Putuputuanga i te au epetoma tataki tai. I muri mai, penei ka akatika te aronga pakari i te kapiti mai i tetai atu au uipaanga ke, mei te Uipaanga na te Katoatoa e te Apii Punanga Tiaki. Te au Tuanga Apii Nu. 2, 3, e te 4 i roto i te Apii Orometua Teokaratiki penei kia raveia ki roto i tetai pia apii ke mai me ka rauka i tetai tangata pakari tau me kore i tetai tavini tauturu tei kite i te reo kia tu ei tangata ako. Inara, ka piri atu te pupu ki te putuputuanga no te tuatua i te tu o te tuatuaanga, te tuatua ikuikuanga, te au manako maata o te Pipiria, e te Uipaanga Tavini. Te au uipaanga no te tavinianga koro penei kia akanoo katoaia no te pupu.

Te katoatoa o roto i te pupu ka angaanga vaitata tikai i raro i te akaaereanga a te pupu o te aronga pakari. Kia oronga te aronga pakari i te aratakianga tau e te akaari i te inangaro maroiroi i te akono anga i te au anoano o te pupu. Me atoro mai te akaaere kotinga i te putuputuanga e akono ra i te pupu, ka akanoo katoa aia kia angaanga kapiti ki te pupu i te akamatutu atu i te reira i te pae vaerua. Ma te akameitakianga a Iehova, penei i te taime ka aereia ka riro mai te pupu ei putuputuanga.