Au Tupuanga Mei te 2011 Yearbook

TOMINIKA REPAPURIKI

Kapi 59, parakarapa 1-2

Tarevake te Numero no te Tutuanga

Kua akakitekite atu tetai tuaine ki tetai aronga kua tarevake te ringi mai anga iaia. Muri ake i tetai au ra, kua manako aia e, ‘Ka rauka iaku i te taangaanga i teia tuatau i te tutu aere.’ Akapeea aia i te rave anga i te reira? Me pau atu aia e kua tarevake te numero, ka akakite aia i te reira ki te tangata, ma te tuatua katoa atu e, “Me ka tika kia ui atu au kia koe e, Kua tatau ainei koe i te Pipiria i teia ra?” Noatu e kua tuku tetai pae i te terepaoni ki raro, kua pau mai ra tetai pae e kare ratou i tatau ana i te Pipiria. E kua ui atu aia e, “Kua kite ainei koe i te puapinga o te reira?” Ei oronga anga i tetai pau anga Tuatua Tapu, ka tatau aia ia Salamo 1:1-3. Kua tuatua mai tetai opita no te kavamani ki te tuaine e kare ana Pipiria. Kua raveia tetai akanoonoo anga kia apaina ia atu tetai Pipiria e tetai au puka nana. E rua epetoma i muri mai kua ringi mai aia i te akameitaki i te tuaine no tei manako atu iaia e no te au puka.

Te ringi tarevake mai anga tetai vaine, kua ui mai aia e, “E Kite ainei koe no Iehova?” Te pau atu anga te tuaine e ae, kua aue taua vaine ra te akamarama mai anga e kare aia e maroiroi akaou ana i te pae vaerua. Kua akamaroiroi te tuaine iaia e kua akanoo i tetai tangata kia tauturu iaia i te pae vaerua. Kua maroiroi akaou mai teia vaine i teianei ei papuritia.

AUTIRERIA

Kapi 70, parakarapa 7

Kua Apai Aere Aia i te Aenga Pepa

Ko Nathan, e 12 ona mataiti, e apai aere ana aia i te au aenga pepa na roto i tana kiri puka apii e kua tutu aere ki tona au oa i te apii. Tetai ra, iaia e oki ra ki te kainga mei te apii mai, kua kite atu aia i tetai vaine pakari e tu ra i mua i tona kainga. Kua katakata mai taua vaine ra kiaia, e kua katakata atu a Nathan kiaia e kua oronga atu i tetai aenga pepa nana. Kua akakite mai te vaine kiaia e kua mate tana tane e toru mataiti i mua ana. E kua rave mai a Nathan i te aenga pepa Eaa te Manakonakoanga no te Akaperepereia Tei Mate Ra? Kua aue teia vaine te akakite anga a Nathan kiaia no runga i te tuakaou anga ka tupu mai, e ka kite akaou aia i tana tane i roto i te enua Parataito. Kua ui mai ra te vaine e, “Inara, aea te au mamae ravarai e ope ei?” Kua rave mai a Nathan i tetai aenga pepa akaou, Te Mamaeanga Katoatoa Kare e Roa Atu ka Ope! E kua ui atu taua vaine ra kia Nathan e eaa atu tetai tana e irinaki ana. Kua oronga atu aia i tetai aenga pepa akaou mei roto mai i tana kiri puka, Eaa te Irinaki o te Au Kite o Iehova? I muri mai kua akaruke a Nathan. Mei tetai au epetoma i muri mai kua aravei akaou aia i taua vaine ra i mua i tona kainga. Kua kapiki mai aia ia Nathan e kua takave mai iaia. “Kua kite koe eaa e Nathan?” i tuatua mai ei aia. “Muri ake te oronga mai anga koe i te au aenga pepa, kua atoro mai tetai nga vaine Kite iaku, e te apii nei raua i te Pipiria kiaku i teianei!”