Ariki Mai ia Ratou!
1. Eaa te akakoroanga e oronga maira i tetai tikaanga kia rave i tetai akakitekiteanga, e eaa te tumu?
1 Oronga mai te Akamaaraanga i te tikaanga meitaki roa atu no tatou kia rave i tetai akakitekiteanga. Akamanako ana: Teia mataiti tere atu i te tai ngauru mirioni tangata e tapapaia atu nei kia tae mai ki te Akamaaraanga, e kia akarongo no runga i nga akaraanga maata rava atu o te aroa tei akaariia mai na roto i te ravenga oko. (Ioa. 3:16; 15:13) Ka akarongo ratou no runga i te au akameitakianga ka rauka ia ratou na roto i ta Iehova apinga aroa. (Isa. 65:21-23) Inara, kare ko te vaa tuatua ua te ka rauka i te oronga i tetai akakiteanga i ko i teia akakoroanga. E atianga to te katoatoa tei tae mai kia oronga i tetai akakiteanga meitaki na te ariki pumaana atu anga i te au manuiri.—Roma 15:7.
2. Ka akapeea tatou i te ariki pumaana atu anga i te au manuiri?
2 I to te aere tika ua atu i te kimi nooanga noou e oti noo marie ki raro i te tiaki kia akamata te porokaramu, kore ei koe e aere atu e aravei i te aronga i te pae mai ia koe? Penei te ru ua ra te au manuiri e kare i papu e ka akapeea ratou. Ka riro to tatou mata katakata e te oaoa i te aravei anga atu ia ratou ei akapumaana ia ratou. Me kite koe e i aere mai tetai tangata no tei patiia atu aia, penei e ui atu e me ko tona taime mua teia ki ta tatou uipaanga, e me kua matau aia i tetai tangata i roto i te putuputuanga. Penei e pati atu iaia kia noo mai i te pae ia koe kia rauka iaia te aru mai taau Pipiria e te puka imene. Me tei roto i te Are Uipaanga, penei ka rauka i te apai iaia kia tutaka aere. Me oti te akoanga, paupau atu i tana au uianga. Me ka akaruke vave ua kotou kia va te ngai no tetai putuputuanga ke mai, karanga atu kiaia e: “Ka inangaro au kia kite e eaa toou manako no runga i te porokaramu. Eaa te mataara meitaki e aravei akaou ei au ia koe?” E oti akanoo i tetai taime i te aravei akaou iaia a tetai ra ke. Ka anoanoia tikai te aronga pakari kia akamaroiroi atu i te au papuritia paruparu i te pae vaerua tei tae mai.
3. Eaa i puapinga ai kia tauta tatou i te ariki atu i te au manuiri?
3 No te maataanga o te au manuiri, teia to ratou taime i kite ei i te rekareka, te au, e te tu rotai i roto i te parataito pae vaerua e noo nei te iti tangata o Iehova. (Sala. 29:11; Isa. 11:6-9; 65:13, 14) Eaa ra te ka maara i te au manuiri a muri ake? Tei runga ua i ta tatou ka rave i te ariki atu anga ia ratou.