Kua Kite Ainei Koe?

Eaa te pereoo ta te eunuka Etiopia i na runga ana te aravei anga aia ia Philipa?

TE AITEANGA o te tuatua “kariota,” kua uriia ki roto i te New World Translation ei au pereoo tukeke. (Anga. 8:​28, 29, 38) Inara, i te akaraanga te na runga ra te tangata Etiopia i tetai kariota maatamaata e kare i te kariota tamaki me kore taemoemo. Akamanako ana i te au tumu no teia.

E tutara teitei te tangata Etiopia tei teretere ki te au ngai mamao. Koia te “tangata mana ki o Kanedake i te ariki vaine no Etiopia ra, koia te tiaki i te apinga tini nona ra.” (Anga. 8:27) Ko Etiopia i taito, kua kapiti mai a Sudan e te tua apatonga o Aiphiti i teia tuatau. Penei kare aia i akaoro e tai ua pereoo i tona tere, no te maata i tana au apinga ka apai. Ko te pereoo tei taangaangaia i te anere mataiti mua T.N. no te apai i te tangata, e ā ona uira e te apinga tapoki i runga ake. Akakite te puka Acts—An Exegetical Commentary, “Ko teia kariota, e maata tana ka rauka i te apai, kia maru e kia meitaki ua te tere noatu te mamao.

Te tatau ra te tangata Etiopia i te Pipiria ia Philipa e oro maira. Karanga te irava, “Oro aturā Philipa i reira, e akarongo atura [i te eunuka] i te tatau anga i ta te peroveta ra i ta Isaia.” (Anga. 8:30) Kare teia au kariota i akakoroia kia oro viviki. Mari ra no te marie i te tere anga kua rauka i te tangata eunuka i te tatau e kua rokonaia aia e Philipa.

“Kua tuatua maira [te tangata Etiopia] kia Philipa e kake ki runga noo ei raua katoa.” (Anga. 8:31) I roto i te au kariota taemoemo, ka tu ua te aronga akaoro. Inara i roto i te pereoo teretere, e ngai nooanga tetai no te tangata eunuka e Philipa.

Kia tau ki te au tuatua akauruia i roto ia Angaanga pene 8 e te au akapapuanga taito, kua akaari mai ta tatou au puka e te au tutu i te tangata Etiopia e akaoro ra i te kariota maatamaata, e kare i te pereoo tamaki me kore taemoemo.