1 Pirianga Tiratiratu

EAA TE AITEANGA

Ka akamanako te au tane e te au vaine tei akaipoipo e e pirianga mutukore to ratou e ka akatupu i te tu irinaki ki tetai e tetai. Kua papu e ka vai tiratiratu te nga tokorua i roto i to raua pirianga akaipoipo, noatu te au turanga ngata.

Kua maroia tetai au tokorua akaipoipo e te kopu tangata kia noo kapiti raua e auraka e tatara. Inara e meitaki atu te pirianga tiratiratu tei akatumuia ki runga i te aroa e te akangateitei.

KAVEINGA PIPIRIA: “Eiaa te tane e tuku ke atu i tana vaine.”​—1 Korinetia 7:11.

“Me tiratiratu koe ki toou tokorua akaipoipo, kare koe e viviki i te riri. Ka viviki ra koe i te akakore i te tarevake e te tataraara. Ka riro te au manamanata ei arairaianga, e kare ei tumu no te tatara.”​—Micah.

EAA I PUAPINGA AI

Me tupu te manamanata, e manako ana te au tokorua akaipoipo kare e tiratiratu ana, ‘Kare paa maua e tau kia noo kapiti’ e ka kimi i te au ravenga kia tatara mei to raua akaipoipo.

“E maata te aronga e akaipoipo nei ma te manako e me kare to ratou akaipoipo e meitaki, ka rauka ua ia ratou i te tatara. Me te manako akapera ra ratou, kua puapinga kore to ratou akaipoipo mei te akamataanga.”​—Jean.

TAAU KA RAVE

TIMATA IA KOE UAORAI

Me tupu tetai pekapeka . . .

• Ka tataraara ainei koe no tei akaipoipo koe i toou tokorua?

• Te moemoea ra ainei koe kia piri atu ki tetai tangata ke?

• Ka tuatua ainei koe e, “Ka akaruke au ia koe” me kore “Ka kimi au i tetai tangata ke te ka akaperepere iaku”?

Me pau koe e ae ki tetai o teia au uianga, ko teia te taime no te akaketaketa i toou pirianga akaipoipo.

URIURI KI TOOU TOKORUA

• Kua paruparu ainei te pirianga tiratiratu i roto i to taua akaipoipo? Me koia ia, eaa te tumu?

• Eaa ta taua ka rave i teianei kia akaketaketa i to taua pirianga akaipoipo?

RAVE I TEIA

• Tata i tetai reta akainangaro ki toou tokorua

• Akaari i toou pirianga tiratiratu na te tukuanga i te au tutu o toou tokorua i ko i taau ngai angaanga

• Tuatua me kore e tuku karere ki toou tokorua i te au rā ravarai

KAVEINGA PIPIRIA: “Ta te Atua i topiri ra, auraka te tangata e akataka ke atu.”​—Mataio 19:6.