7 Tu Tau

EAA TE AITEANGA

Ko te tu tau, ko te tu teia ta te tangata ka iki kia aruia. Ei akaraanga, te tauta ra ainei koe i te rave i te tika i roto i te au mea katoatoa? Ka inangaro i reira koe kia apiiia teia tu i roto i taau tamariki.

Ko te tu tau, ka kapiti katoa mai te au tu tika. Ei akaraanga, ko te tangata e tu tika tona ka angaanga pakari aia, ka manako papakitai kore e ka akamanako i tetai ke​—mea meitaki kia akatupuia teia au tu i roto i te au mapu.

KAVEINGA PIPIRIA: “E apii i te tamaiti i te arataa e tikaʼi iaia kia aere ra; e kia pakari aia ra, kare e akaruke i taua arataa ra.”​—Maseli 22:6.

EAA I PUAPINGA AI

Teia tuatau o te technology ka anoanoia te au tu tau. “Ka kiteaia te au akakeuanga kino i tetai ua atu taime i runga i ta tatou tereponi apaipai,” i karanga ai tetai metua vaine ko Karyn. “Ka akarakara ta tatou tamariki i tetai au apinga tau kore ia ratou e noo maira i te pae ia tatou!”

KAVEINGA PIPIRIA: “Te tangata pakari . . . [tei] mātau i kite ei to ratou ngakau i te meitaki e te kino.”​—Ebera 5:14.

E puapinga katoa te au tu tika. Te kapiti maira te reira i te akaarianga i te tuatua meitaki (mei te tuatua anga “ine” e te “meitaki”) e te akamanakoanga i etai ke​—e tu kare e kitea akaouia ana i teia tuatau, no te mea te akamanako ra te tangata i ta ratou apinga electronic e kare i etai ke.

KAVEINGA PIPIRIA: “E ta kotou e inangaro ia etai ke ra, ka akapera katoa atu kotou kia ratou.”​—Luka 6:31.

TAAU KA RAVE

Akaari i toou tu tau. Ei akaraanga, akakite mai te au aronga kimikimi e kare te au mapu e rave i te pirianga ainga i mua ake ka akaipoipo ei, me mārama tikai ratou e e tarevake te reira.

RAVE I TEIA: E taangaanga i tetai tupuanga ei akamata i tetai uriurianga no runga i te tu tau. Ei akaraanga, me akakite mai te nuti i tetai takinokino anga makitakita penei ka tuatua koe: “E vinivini tikai te kite i te tangata te akaarianga i te riri ki etai ke. Eaa ra teia au tangata i rave i te reira?”

“Ka ngata te tamariki i te iki i te meitaki e te kino me kare ratou i kite eaa te mea meitaki e eaa te mea kino.”​—Brandon.

Apii i te tu tika. Ka rauka katoa i te au tamariki rikiriki i te tuatua “ine” e te “meitaki,” e te akamanako atu i etai ke. “Me kite te tamariki e tuanga ratou no tetai apinga maata atu ia ratou uaorai mei te​—kopu tangata, te apii, e te oire​—ka rauka i reira ia ratou i te akaari i te au tu takinga meitaki te ka puapingaia te katoatoa e kare ko ratou anake ua,” i karanga ai te puka Parenting Without Borders.

RAVE I TEIA: Oronga i tetai angaanga na te tamariki i te ngutuare kia kite ratou i te puapinga o te tauturu anga i etai ke.

“Me matau ta tatou tamariki i te rave i te au angaanga i teianei, kare ratou e poitirere me mamaata mai e me akono i to ratou uaorai oraanga. Ka riro teia au apainga ei mea māmā kia ratou.”​—Tara.