11 Angaanga Pakari

EAA TE AITEANGA

Kare te aronga angaanga pakari e kopae ana i te angaanga, mari ra te mataora ra ratou i te angaanga pakari no te akono ia ratou uaorai e tetai ke​—e ka rave katoa i te au angaanga kare ratou e akameitakiia mai.

EAA I PUAPINGA AI

E maata te au apainga i roto i to tatou oraanga. Maata te tangata i teia tuatau kare ratou e reka ana i te angaanga pakari, inara ko te aronga te angaanga pakari ra ko ratou te ka puapingaia​—Koheleta 3:13.

“Kua apii mai au e me angaanga pakari koe, ka tupu te rekareka e te mataora. Kua akakeu teia tu iaku kia angaanga pakari. Me rave koe i te reira ka rauka ia koe tetai ingoa meitaki.”​—Reyon.

KAVEINGA PIPIRIA: “E puapinga anake rai tei te au angaanga katoa.”​—Maseli 14:23.

TAAU KA RAVE

Akatupu i te manako meitaki no te angaanga na te aru anga i teia au takainga.

Kia mataora e kia mako i taau e rave ra. Me te rave ra koe i taau angaanga i te kainga, me e tuanga no te apii, me kore i te ngai angaanga, e rave ma te maroiroi. E me mako taau angaanga, e akara akapeea koe me rave viviki i te reira me kore kia meitaki atu. Te karape ia koe i te rave anga i teia ka mataora atu koe i te angaanga.

KAVEINGA PIPIRIA: “Te akara ra koe i te tangata i maroiroi i tana taoonga? ei mua i te aroaro o te ui ariki aia e tu ei; kare aia e tu ki mua i te aroaro o te aronga tarevakaua ra.”​—Maseli 22:29.

Akamanako i te puapinga. Me rave meitaki koe i taau angaanga pouroa, ka puapingaia tetai ke. Ei akaraanga, me maroiroi koe i taau angaanga i te kainga, ka mama mai te apainga o te ngutuare.

KAVEINGA PIPIRIA: “E mea meitaki i te oronga atu i te rave mai.”​—Angaanga 20:35.

E rave maata atu. Auraka e rave ua i taau tuanga, e tauta kia rave maata atu i tei umuumuia e koe. Na roto i teia tu, naau uaorai e akaaere i toou oraanga​—kua iki koe e ko teia taau i anoano, e kare no te mea kua māroia koe.​—Mataio 5:41.

KAVEINGA PIPIRIA: “Kia riro toou takinga-meitaki no te inangaro mou, auraka no tetai mea ke.”​—Philemona 14.

Tu tau. Kare te aronga angaanga pakari e kope ana, e kare katoa ratou e akapou ua i to ratou taime ki te angaanga. Inara no to ratou tu tau, ka mataora atu ratou me angaanga pakari e me akangaroi.

KAVEINGA PIPIRIA: “E ngari ake te rima, okotai kia ki i te manga ma te au i nga rima katoa e rua kia ki ma te pekapeka e te kai i te matangi ra.”​—Koheleta 4:6.