Te Mamae Ngakau no te Mii

“Kua akaipoipo maua ko Sophiaa tere atu i te 39 mataiti te takake anga aia no tetai maki roa. Tauturu maata te au oa iaku, e kua tavarenga au iaku uaorai ki taku angaanga. Inara no tetai mataiti katoa, kua mamae tikai toku ngakau. Ka tauiui ua toku manako e kare e rauka iaku i te akatere i te reira. I teianei kua vaitata e toru mataiti i muri ake i tona matenga, ka tupu poitirere ua te mamae ngakau i te taime manako koreia.”​—Kostas.

Kua mate ainei tetai tei akaperepereia e koe? Me koia ïa, penei ka āriki koe i te tuatua a Kostas. Kare e aite te taitaia e te mamae ngakau me mate tetai tokorua, tetai mema o te ngutuare, me kore tetai oa piri. Āriki katoa te aronga kite tei apii i te mamae ngakau tei tupu no te mii i tera manako. Akakite tetai atikara tei neneiia i roto i The American Journal of Psychiatry e “ko te mate tetai tumatetenga tinamou e te pakari.” Me tupu te mamae otooto no te reira tumatetenga, penei ka ui tetai e mii ra: ‘Eaa te roa i teia mamae ngakau? Ka mataora akaou ainei au? Akapeea e rauka ai te akapumaana?’

Ka pauia teia au uianga i roto i teia makatini E Ara! I te atikara ka aru mai, ka uriuri tatou eaa taau ka tapapa atu me kua takake atu toou akaperepere. E oti i te au atikara ka aru mai, ka uriuri tatou i te au ravenga te ka tauturu ia koe kia akaiti i toou mamae ngakau.

To matou inangaro ngakau tae, kia riro te au atikara ka aru mai ei akapumaana e te tauturu i tetai ua atu te na roto ra i te mamae ngakau no te mii.