Eaa ra te Taitaia?

Me na roto koe i tetai turanga ngata ka akatupu te reira i te taitaia. Ka akatupu toou roro i te au hormone i roto i toou kopapa. Ka pamu viviki i toou pukuatu, ka taui i te aere anga viviki o te toto, ka akamaata atu me kore ka akaiti mai i toou ate mama, e ka akaketaketa i toou uaua. I te taime e kite ei koe i te reira, kua tupu takere teia au mea i roto i toou kopapa. Me ngaro te turanga taitaia, ka ngaro katoa te “au akamatakiteanga” a te kopapa e ka meitaki te au mea ravarai.

TE TAITAIA MEITAKI E TE KINO

Ko te taitaia, e tu natura teia te ka akakite mai kia koe me tupu tetai turanga ngata e te kino. Ka akamata mai te reira ki roto i toou roro. Ka akakite mai te reira kia rave koe i tetai apinga e kia paruru viviki ia koe. Ka akatupu te reira i taau i akakoro i te rave me kore i te akameitaki atu i toou turanga, penei i te tuatau o te tarere, kimi ngai angaanga, e te tuatau tarekareka.

Inara, me taitaia koe no tetai tuatau roa ka pakari atu te kino. Me tupu putuputu teia “au akamatakiteanga” i roto i toou kopapa, ka tupu mai te au maki mamae kopapa, ngakau e te maki manako. Ka taui toou tu me akono koe i tetai ke. Te taitaia anga roa ka akakeu i tetai tangata kia kai i te au apinga akakona e tetai ua atu apinga kino. Te ka akatupu i te maki manako kiaia, te roiroi, e te manako tamate iaia uaorai.

Noatu kare teia e tupu ana ki te katoatoa, ka akatupu ra te reira i te au maki kino tukeke. E ka tupu te reira ki te au mero katoatoa o te kopapa.