TUMATETENGAIA TEIANEI AO

3 | Paruru i Toou Pirianga

E PUAPINGA TE REIRA

No te taitaia maata o te au tumatetenga i teianei ao, kua riro te reira ei akatakake i te au pirianga oa.

Akatakake tetai pae ia ratou mei te au oa.
Taumāro te au tokorua ia raua.
Manako kore te au metua i te au taitaia o te tamariki.

Taau ka Anoanoia Kia Kite

E puapinga te au pirianga oa i te pae kopapa e te manako ngakau i te tuatau taitaia.
Me tupu te apiapi no te maata o te kino i teianei ao ka pekapeka te ngutuare.
Ka riro te nuti kino i akarongoia e te au tamariki ei akataitaia ia ratou.

Taau ka Rave i Teianei

Karanga te Pipiria: “E aroa mairai te taunga i te au tuatau katoa ra, i anau maira te taeake no te tuatau e tumatetengaʼi ra.”—Maseli 17:17.

Akamanako i te tangata tei tauturu e tei oronga mai i te tauturu tau. Te kiteanga e te manako maira tetai ia koe ka akamaroiroi ia koe kia autu i te au manamanata.

KIA AUTU—Tauturu Tau

I te au tuatau tumatetenga, e paruru i toou pirianga ma te aru i teia au takainga

AKONO I TOOU AKAIPOIPO

Akono i toou akaipoipo

Karanga te Pipiria: “E meitaki nga tangata toko rua i te takitai . . . Kia inga oki tetai ra, na te tokorua e rave e akatu ki runga.” (Koheleta 4:9, 10) Ka tau nga tokorua kia angaanga kapiti mei te pilot e tona tauturu ma te okotai akakoroanga, kare ei nga pairere tamaki ia raua.

E akamou kia kore korua e akataitaia i tetai. E akakoromaki maata e te tamou marie.
E tai taime i te epetoma, uriuri ki toou tokorua i te au manamanata kia akatikatikaia. E akamou ki runga i te manamanata—kare ia korua.
Akapae i tetai taime kia mataora korua i te angaanga kapiti.
Akamaara i to korua tuatau mataora, penei te akara i te au tutu akaipoipo e tetai atu au atianga mataora.

“Penei kare te manako o te nga tokorua e au ana, inara ka rauka ia raua te angaanga kapiti. Ka rauka ia raua te tuku i te ikianga e kia angaanga kapiti kia tupu te reira.”—David.

AKONO I TOOU PIRIANGA

Akono i toou pirianga

Me rauka te tauturu a te au oa, akamanako akapeea koe me oronga i te tauturu. Na te akamaroiroi anga i tetai, te akamaroiroi katoa ra koe ia koe.
E tuatua ki te au oa i te au rā kia kite e te peea maira ratou.
E ui ki te au oa akapeea ratou te autu anga i te au mea ngata tei aite ki toou.

“Me rokoia koe e te uriia manamanata, ka riro te au oa ei tauturu. Ka akakeuia koe na te mataara tau, noatu ka akamaara mai ratou i taau i kite takere. Te aroa maira te au oa ia koe, e te aroa katoa ra koe ia ratou.”—Nicole.

TAUTURU TE AU METUA

Tauturu te au metua

Karanga te Pipiria: “Kia rapurapu ua te tangata ravarai i te akarongo, kia tavarevare i te tuatua.” (Iakobo 1:19) I te akamata anga, ka emiemi te tamariki i te akakite mai i to ratou mataku, me akarongo marie ra kotou, ka tuatua mai ratou.

Me tau te ngai no te tamariki, ka akakite mai ratou i to ratou manako. Me kite ratou i te maru, ka tuatua ua mai te tamariki, me oro motoka, me aere aere, kare e noo ua ki te pae i te metua kia akara i tetai e tetai.
Matakite kare taau tamariki e taitaiaia e te au nuti tumatetenga.
Akakite ki taau tamariki eaa ta korua i rave no te paruru i te ngutuare.
Akanoo i tetai parani me tupu te tumatetenga, e akapapa i te reira ki taau tamariki.

“Tuatua ki taau tamariki, e akarongo i to ratou manako. Penei te uuna ra ratou i to ratou mataku, taitaia, e te riri. Akakite kia ratou e te mataku katoa ra koe, e e akakite i taau i rave.”—Bethany.