TUMATETENGAIA TEIANEI AO

4 | Paruru i Toou Manakonakoanga

E PUAPINGA TE REIRA

Ka taitaia rai te tangata i te pae kopapa e te manako ngakau no te au tumatetenga i teianei ao. Kua maromaroa te manganui no teia e kua tuku i te ‘au. Eaa to ratou manako?

Kare tetai pae e inangaro i te akamanako atu i te tuatau ki mua.
Kua uri tetai pae ki te inu kava e te apinga akakona no te tamaru i to ratou apiapi.
Kua manako tetai pae e ngari ake te mate. “Eaa oki te puapinga?” na ratou ei.

Taau ka Anoanoia Kia Kite

E aere ua rai ka ngaro toou manamanata e ka maru mai te oraanga.
Noatu me kare te turanga e taui, ka rauka rai ia koe i te rave i tetai apinga ei tauturu.
Te oronga maira te Pipiria i te manakonakoanga mou—te rapakauanga i to te tangata tumatetenga.

Taau ka Rave i Teianei

Karanga te Pipiria: “Auraka e apiapi i to apopo ra; na apopo e apiapi i tana uaorai. Ko te rā ko tona uaorai kino, oti ra ua ïa.”—Mataio 6:34.

E akono i to te rā okotai. Auraka e apiapi eaa to apopo e akono i to te rā okotai.

Te manata anga i te au mea papu kore penei ka akamaata atu i toou taitaia e ka akaparuparu ia koe kia kore e tapapa i te au mea meitaki ki mua.

KIA AUTU—Tauturu Tau

KIA PAPU UA

Karanga te Pipiria: “E rā kino anake to te tangata tumatetenga ra: kareka tei mataora te ngakau ra, e pokai tamou ïa tana.” (Maseli 15:15) Ka arai te manako papu kore ia koe kia kore e kite i te au ravenga meitaki. Tuke ki te manako papu, ka tauturu ia koe kia kimi ravenga.

Akaiti i toou taime no te akara i te nuti.
I te openga o te rā okotai, akapapa e rua me kore e toru mea ka akameitaki koe.
Akapapa i taau ka rave, e ka rave ua i te rā okotai. Ta tuanga i te au angaanga maata e te meangiti kia kite koe e kua oti te reira i te rave.

PATI I TE TAUTURU

Karanga te Pipiria: “Ko tei akatakake iaia uaorai . . . te patoi pouroa ra aia i te pakari tau.” (Maseli 18:1, NW) Kare e rauka ia koe te piki mai ki vao i tetai vaarua oonu, ka inangaroia te rima tauturu, e ka autu rai koe.

E pati i te tauturu a te kopu tangata e te au oa.
E kimi i te au ravenga ka rauka ia koe te tauturu ia ratou. Rave i te angaanga na tetai ke, ei tauturu kia rauka ia koe te manako tau.
Me kua ngere koe i te manakonakoanga e kua puapinga kore te oraanga, e aravei atu i te taote. Tetai taime me kino roa te manako apiapi e akairo ïa no te maki taitaia. Maata te tangata kua rauka ia ratou te rapakauanga.a

a Kare te E Ara! e māro ana i tetai ua atu rapakauanga.

Manakonakoanga Mou o te Pipiria

Tuatua te tata salamo i roto i tana pure ki te Atua: “E lamepa taau tuatua i toku nei vaevae, e turama no toku nei arataa.” (Salamo 119:105) Akamanako i te Pipiria—te Tuatua a te Atua—mei te reira.

I te po poiri, na te lamepa e arataki ia koe ki te ngai ka aere. Koia katoa, te au kaveinga Pipiria ka tauturu ia tatou kia rave i te au ikianga meitaki.

Ka turama te mori i to tatou arataa kia kite mamao. Pera katoa te Pipiria, ka turama i to tatou manakonakoanga meitaki a te tuatau ki mua.

E puka tapu te Pipiria tei apii mai i te oraanga o te tangata mei te akamataanga e te oronga maira i te manakonakoanga mou no te tuatau ki mua. Te pau maira i teia au uianga:

Akapeea?

Akapeea te mamae i tupu ei: Karanga te Pipiria e “no te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.”—Roma 5:12.

Eaa te tumu?

Eaa te tumu kare e rauka i te tutaraanga tangata: Karanga te Pipiria “kare tei te tangata e aere nei, i te akono i tona uaorai takainga tapuae.” (Ieremia 10:23) Akapapuia teia e te au tupuanga o teianei ao.

Eaa?

Eaa ta te Atua ka rave: Karanga te Pipiria e “nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”—Apokalupo 21:4.