E Oronga Ua

EAA I PUAPINGA AI

Ka tupu te mataora me oronga ua tatou ki tetai ke, noatu e meangiti ua te reira. Karanga tetai au taote, me mātau ua koe i te oronga ua, ka meitaki atu toou turanga kopapa e toou manako. Ei akaraanga, ka akaiti mai i te tu taitaia, te apiapi, te toto kake e pera te au mamae o te kopapa. E ka akameitaki atu i taau moe.

Me tauturu tatou i tetai ke, na te oronga anga i te moni me kore te apinga ta ratou e anoano ra, ka māmā ua ia tatou i te āriki i te tauturu a tetai ke. Karanga a Howard, e noo ra i England: “Me tauta maua i te tauturu i tetai ke, kare maua ko taku vaine e akamā me orongaia mai te tauturu kia maua.” E tika, ko te aronga tei oronga ua ma te ngakau tae, kare ratou e inangaro kia tutakiia mai. Inara, ka rauka ia ratou te au oa piri mou te ka tauturu ia ratou i te tuatau tumatetenga.

TAAU KA RAVE

Oronga i taau ka rauka. Noatu kare e maata ana taau, ka rauka rai ia koe i te oronga atu ki tetai ke. Penei ka oronga koe i tetai manga kai. E noo ana a Duncan e tona ngutuare tangata i Uganda. Noatu e aronga putaua ratou, kua mataora ratou i te oronga ua. Karanga a Duncan, “I te au Tapati, ka pati maua ko taku vaine i tetai au taeake kia aere mai ki te kainga no tetai manga katikati. Mataora maua i te kapiti atu kia ratou.”

E mea meitaki kia oronga ua, inara kia tau te reira. No te mea, kare koe e inangaro kia ngere toou ngutuare tangata i te au mea tei anoanoia.—Iobu 17:5.

Tamata i teia: Oronga i tetai manga kai me kore tetai apinga ei inu. Me e au apinga taau kare koe e inangaro, e oronga atu ki toou au oa me kore toou tangata tupu. Ka mareka ua ratou i te reira.

Oronga na roto i tetai ravenga ke. Tetai au apinga aroa, kare e anoanoia te moni. Ei akaraanga, ka rauka ia tatou i te oronga i to tatou taime e kia akaari i to tatou inangaro, na te tauturu anga i tetai ke. E pera te au tuatua meitaki, e apinga aroa teia! No reira, e akakite ki tetai ke te akaperepere ra koe ia ratou.

Tamata i teia: E tauturu i tetai ke na te raveanga i tetai au angaanga i to ratou kainga. Tata i tetai kāti akapumaana me kore tuku i tetai karere ki toou oa, kia akaari e te manako ra koe iaia.

Me e tu oronga ua toou, ka mataora atu toou oraanga.