TUA 1
Akamata te Atua i te Maani Au Apinga
POUROA ta tatou au apinga meitaki no ko mai i te Atua. Kua maani aia i te ra kia marama tatou i te ao, te marama e te au etu ei turama ia tatou i te po. E kua maani te Atua i te enua no tatou kia noo i reira.
Inara kare e ko te ra, te marama, te au etu e te enua, te au mea mua ta te Atua i maani. Kua kite koe e eaa te mea mua? Kua maani te Atua i tetai au mea ora mei iaia rai na mua. Kare tatou e kite ia ratou, mei ia tatou rai kare e kite ana i te Atua. I roto i te Pipiria e kapikiia ana ratou e e au angera. Kua maani te Atua i te au angera kia noo kapiti ratou e ia, i runga i te rangi.
Te angera mua ta te Atua i maani, e mea akaperepere maata nana. Koia te Tamaiti mua a te Atua, e kua angaanga aia i te pae i tona Metua. Kua tauturu aia i te Atua i te maani i te au apinga ravarai. Kua tauturu rai aia i te Atua i te maani i te ra, te marama, te au etu pera katoa to tatou enua.
Mei teaa rai te enua i taua taime ra? I te akamataanga kare e meitaki kia nooia te enua. Kare takiri e apinga tera ua, kua ki te enua katoa i te vai. Inara kua inangaro te Atua i te tangata kia noo ki runga i te enua. I reira kua akamata aia i te akapapa i te reira no tatou. Eaa tana i rave?
Te mea mua ka inangaroia kia marama a runga i te enua. No reira kua maani te Atua kia iti mai te marama o te ra ki runga i te enua. Kua maani aia i nga mea e rua, te po e te ao. Muri mai kua maani te Atua kia maranga te enua ki runga ake i te vai.
Te akamataanga kare takiri e apinga i runga i te enua. Mei te tutu rai e kite ra koe i konei. Kare e tiare, kare e pu rakau, kare e manu. Kare katoa okotai ika i roto i te moana. E maata atu ta te Atua angaanga ka rave i te akamanea i te enua no te au manu e te tangata kia noo i reira.
Ieremia 10:12; Kolosa 1:15-17; Genese 1:1-10.