TUA 4
Tumu i Ngere ei Raua i to Raua Kainga
AKARA ana e eaa te tupu ra i teianei. Te tukuia ra a Adamu raua ko Eva ki vao ake i te kainga manea i Edene. Kua kite koe eaa te tumu?
No te mea kua rave raua i tetai apinga kino tikai. No reira te akautunga ra a Iehova ia raua. Kua kite koe i te apinga kino a Adamu raua ko Eva i rave?
Kua rave raua i tetai apinga i akakite te Atua kia raua e, auraka e rave. Kua akakite te Atua kia raua kia kai i te kai o te au rakau o te kainga. Inara okotai pu rakau kua tuatua te Atua e auraka e kai, ka mate aea raua. Kua vaoo aia i taua pu rakau ra nana anake ua. E kua kite tatou e e tarevake te rave i te apinga a tetai ke, me kare ainei? Eaa ra tei tupu?
Tetai ra, ia Eva i roto i te kainga koia anake ua, kua tuatua mai tetai ovi kiaia. Akamanako ana i tera! Kua akakite te reira kia Eva kia kai i te ua o te rakau i akakite te Atua kia raua e auraka e kai. Tera ra, i te maani anga a Iehova i te au ovi, kare aia i maani ana e kia tuatua mai te reira. Te aiteanga ua rai, e mea ke atu tetai e maani ra i te ovi kia tuatua mai. Koai ra?
Kare e ko Adamu. Ka tano rai e ko tetai o te au mea ora ta Iehova i maani i mua roa atu i tona maani anga i te enua. Ko taua aronga ra, e au angera, kare tatou e kite ia ratou. Teia angera okotai, e akaparau tikai aia. Kua akamata aia i te manako e ka tau aia ei tutara mei te Atua rai. E kua inangaro aia i te tangata kia akarongo iaia, kare ia Iehova. Koia te angera tei maani i te ovi kia tuatua.
Kua akavare teia angera ia Eva. Tona akakite anga kiaia e ka riro aia mei te Atua rai me kai i te ua rakau, kua irinaki aia. No reira kua kai aia, pera katoa a Adamu. Kua akarongo kore a Adamu raua ko Eva i te Atua, e ko te tumu tera i ngere ei raua i to raua kainga manea.
A tetai ra, ka akariro te Atua i te enua katoa ei ngai manea mei te kainga rai i Edene. Ka kite tatou a muri mai e akapeea koe i te piri atu anga ki te akatupu anga i teia. Teianei ra, ka akara tatou e eaa tei tupu kia Adamu raua ko Eva.
Genese 2:16, 17; 3:1-13, 24; Apokalupo 12:9.