TUA 17
Nga Maanga tei Tuke
E TUKE takiri teia nga tamaroa i konei, me kare ainei? Kua kite koe i to raua ingoa? Ko Esau te tamaiti kimi manu, e ko Iakoba te tamaiti e akono ra i te mamoe.
Ko Esau e Iakoba te nga maanga a Isaaka raua ko Rebeka. Inangaro maata tikai te papa ko Isaaka ia Esau no te mea e tamaiti kimi manu meitaki aia, e apai mai ana aia i te kai ki te kainga ei kai na te pamiri. Ko Rebeka ra, e akaperepere ana aia ia Iakoba no te mea e tamaiti muteki ua aia e te maru.
Te ora ra rai to raua papa ruau ko Aberahama, e me akamanako ua atu tatou, e mea reka tikai na Iakoba i te akarongo kiaia me tuatua no runga ia Iehova. E 175 mataiti o Aberahama i mate ei, e e 15 o te nga maanga mataiti.
E 40 o Esau mataiti i akaipoipo ei aia i tetai nga vaine no te enua o Kanaana. Kua maromaroa tikai a Isaaka raua ko Rebeka no te mea kare teia nga vaine e akamori ana ia Iehova.
I tetai ra kua tupu tetai apinga tei maani ia Esau kia riri tikai i tona teina ia Iakoba. Kua tae te taime no Isaaka i te oronga i te akameitakianga no tana tamaiti mua. No te mea no mua ake a Esau ia Iakoba, kua irinaki a Esau e nona teia akameitakianga. Inara kua oko a Esau i tona tikaanga no te akameitakianga kia Iakoba i mua atu ana. Tera tetai, i te anau anga te nga tamariki, kua tuatua te Atua e ka aere te akameitakianga kia Iakoba. E ko teia tikai tei tupu. Kua oronga a Isaaka i te akameitakianga ki tana tamaiti ko Iakoba.
Muri mai, i te kite anga a Esau i teia, kua riri aia ia Iakoba. No te maata i tona riri, kua karanga aia e ka aere aia ka tamate ia Iakoba. I te akarongo anga a Rebeka i teia, kua manamanata tikai aia. Kua akakite aia ki tana tane ko Isaaka e: ‘Ka maata roa atu te kino me akaipoipo katoa a Iakoba i tetai vaine Kanaana.’
No teia, kua kapiki a Isaaka i tana tamaiti ia Iakoba e kua akakite kiaia e: ‘Auraka koe e akaipoipo i tetai vaine Kanaana. Aere koe ki te are o toou papa ruau ko Betuela i Harana. Akaipoipo koe i tetai tamaine a tana tamaiti ko Labana.’
Kua akarongo a Iakoba i tona papa, i tera taime rai kua aere aia i tona tere mamao ki tona kopu tangata i Harana.
Genese 25:5-11, 20-34; 26:34, 35; 27:1-46; 28:1-5; Ebera 12:16, 17.