TUA 19
To Iakoba Pamiri Maata
AKARA ana i teia pamiri maata. Teia te au tamariki tamaroa 12 a Iakoba. E au tamariki tamaine katoa tana. Kua kite koe i te ingoa o tetai au tamariki? Ka apii tatou i tetai pae ia ratou.
Kua anau a Lea ia Reubena, Simeona, Levi e Iuda. Te kite anga a Rahela e kare aia e anau tamariki, kua maromaroa tikai aia. No reira kua oronga aia i tona tavini vaine ia Bila ei vaine na Iakoba, e kua anau a Bila e rua nga tamaroa ko Dana e Naphatali. I reira kua oronga katoa a Lea i tona tavini vaine ia Zilipa ei vaine na Iakoba, e kua anau a Zilipa ia Gada e Asera. Kua anau akaou a Lea i te openga, e rua nga tamaroa ko Isakara e Zebuluna.
I te openga kua anau mai tetai tamaiti na Rahela. Kua tapa aia i tona ingoa ko Iosepha. Ka apii maata atu tatou no runga ia Iosepha a muri mai, no te mea kua riro mai aia ei tangata puapinga tikai. Ko teia i reira te au tamariki tamaroa e 11, tei anauia kia Iakoba i tona noo anga i ko ia Labana, te papa o Rahela.
E au tamariki tamaine katoa ta Iakoba, tera ra okotai rai tamaine tei akakiteia mai tona ingoa i roto i te Pipiria. Ko Dina tona ingoa.
Kua tae te tuatau no Iakoba kia akaruke ia Labana i te oki atu ki Kanaana. No reira kua akaputuputu mai aia i tona pamiri maata e tana au anana mamoe e te au anana puakatoro, e kua akamata atu i teia tere mamao.
Muri mai i te noo anga a Iakoba e tona pamiri i Kanaana no tetai taime, kua anau akaou a Rahela i tetai tamaiti. Kua tupu teia ia ratou e aere ra i to ratou tere. Kua ngata te anau anga o Rahela, e i te openga kua mate aia no te reira. Meitaki ua ra oki te pepe tamaroa. Tapa a Iakoba i tona ingoa ko Beniamina.
Ka inangaro tatou i te akamaara i te ingoa o te au tamariki tamaroa e 12 a Iakoba no te mea, i na roto mai te iti tangata pouroa o Iseraela ia ratou. Ae, kua kapikiia te kopu tangata e 12 o Iseraela i te ingoa o te au tamariki e 10 a Iakoba, e te nga tamariki e rua a Iosepha. Kua noo ana a Isaaka no tetai au mataiti i muri ake i te anau pouroa anga teia au tamaroa, e kare e kore e kua mataora aia i te maata o tana au mokopuna. Inara ka akara ana tatou e eaa tei tupu ki tana mokopuna ko Dina.
Genese 29:32-35; 30:1-26; 35:16-19; 37:35.