TUA 22
Tukuia a Iosepha ki Roto i te Areauri
TE APAI angaia a Iosepha ki Aiphiti e 17 rai ona mataiti. Iaia i reira kua okoia atu aia ki tetai tangata ko Potiphara te ingoa. E angaanga ana a Potiphara na te ariki o Aiphiti, tona ingoa ko Pharao.
Angaanga pakari a Iosepha na tona pu ko Potiphara. No reira i te maata anga mai a Iosepha, kua tuku a Potiphara iaia ei akaaere i tona ngutuare. Eaa i reira ta Iosepha angaanga i konei i roto i te areauri? No te vaine oki a Potiphara.
E tangata manea tikai a Iosepha i te maata mai anga, e kua inangaro te vaine a Potiphara i te moe kiaia. Inara kua kite a Iosepha e e tarevake teia, e kare aia i rave i te reira. Kua riri tikai te vaine a Potiphara. No reira i te oki anga mai tana tane ki te kainga, kua pikikaa atu aia e: ‘Kua aere mai tera tangata kino ko Iosepha kia moe aia kiaku!’ Kua irinaki a Potiphara i tana vaine, e kua riri tikai aia ia Iosepha. No reira kua titiri atu aia iaia ki roto i te areauri.
Kare i roa, kua kite mai te tangata akaaere o te areauri e e tangata meitaki ua a Iosepha. I reira kua tuku aia iaia ei akaaere i te au mou auri pouroa. Muri mai kua riri a Pharao i tona nga akaaere uaina e te kai, e kua tuku ia raua ki roto i te areauri. I tetai po kua moemoeaia raua, tera ra kare raua i kite i te aiteanga o ta raua moemoea. I tera mai ra karanga atu a Iosepha e: ‘Akakite mai ra i ta korua moemoea kiaku.’ E i to raua akakite atu anga, kua akamarama a Iosepha i te aiteanga o ta raua moemoea, ma te tauturu a te Atua.
Ki te tangata akaaere uaina kua karanga a Iosepha e: ‘I te toru o te ra ka tukuia atu koe ki vao i te areauri, e ka riro akaou mai koe ei tangata akaaere uaina na Pharao.’ I reira kua karanga a Iosepha e: ‘Me tae koe ki vao, akakite atu koe iaku kia Pharao, e tauturu mai koe kia tukuia au ki vao i teia ngai.’ Ki te tangata akaaere kai ra, kua akakite a Iosepha e: ‘I roto ua i te toru ra ka akaue a Pharao kia tipuia toou katu.’
I te toru o te ra kua tupu tikai te reira mei ta Iosepha i tuatua. Kua akaue a Pharao kia tipuia te katu o te tangata akaaere kai. Ko te tangata akaaere uaina ra, kua tukuia mai mei roto i te areauri e kua akamata akaou i te tavini i te ariki. Tera ra kua ngaropoina takiri i te tangata akaaere uaina a Iosepha! Kare aia i akakite ana kia Pharao no runga ia Iosepha, no reira a Iosepha i noo ei ki roto i te areauri.