TUA 37
Puakapa Akamorianga
KUA kite koe e eaa teia are? E puakapa puapinga no te akamori ia Iehova. E kapiki katoaia ana e e tapenakara. Kua oti i te iti tangata i te akatu i teia, okotai mataiti i muri ake i to ratou akaruke anga ia Aiphiti. Kua kite koe e noai te manako i akatuia ai te reira?
No Iehova te manako. Ia Mose i runga i te Maunga ko Sinai, kua akakite a Iehova kiaia e akapeea me akatu i te reira. Kua akakite aia e kia maani i te reira kia mama ua i te taratara. Na roto i teia tu, ka rauka ua i te apai i te au tuanga ki tetai ngai ke, e kia akatu akaou i te reira. No reira, i te ngati Iseraela e aere ra mei tera ngai ki tera ngai i roto i te metepara, kua apai aere ratou i te puakapa.
Me akara koe ki roto i te pia meangiti i te ope o te puakapa, ka kite koe i tetai pia. E kapikiia ana teia e ko te aruna koreromotu. E rua nga angera me kore nga kerupi auro, tei te nga ope o teia pia. Kua tata akaou te Atua i te Ture Ngauru ki runga i te nga toka paraa, no te mea kua ngaangaa nga toka mua ia Mose. E kua vaooia teia nga toka ki roto i te aruna koreromotu. Tei roto katoa i reira tetai kapu mana. Te maara ra ia koe e eaa te mana?
Ko Aarona, te tuakana o Mose tei ikiia e Iehova ei taunga maata. Nana e arataki ana i te iti tangata i roto i te akamorianga ia Iehova. E au taunga katoa tana au tamariki tamaroa.
Teianei ra, ka akara ana i te pia maata mai o te puakapa. E rua taime maata atu i te pia meangiti. Te kite ra koe i te pia meangiti, e te auai e aere ra ki runga mei roto i te reira? Ko te atarau teia e tutungi ana te au taunga i tetai apinga aunga kakara tei kapikiia e e tapou kakara. Te vai katoa ra te vairanga ramepa e itu ona mori. E ko te kaingakai te toru o te apinga i roto i te pia. E vaooia ana e 12 potonga varaoa ki runga i reira.
I roto i te paepae o te tapenakara e pa maatamaata tetai, tei akakiia ki te vai. E taangaanga ana te au taunga i te reira no te tama anga. Te vai katoa ra te atarau maatamaata. E tauia ana te au kopapa manu mate ki runga i te reira ei atinga kia Iehova. Tei rotopu tikai te puakapa i te ngai nooanga, e te noo ra te iti tangata Iseraela ki roto i to ratou au puakapa takapini i te reira.
Exodo 25:8-40; 26:1-37; 27:1-8; 28:1; 30:1-10, 17-21; 34:1, 2; Ebera 9:1-5.