TUA 39
Puera Tiare te Rakau a Aarona
AKARA ana i te tiare e te tekati para e tupu ra i runga i te rakau. Na Aarona teia rakau. Kua puera teia au tiare e kua para te tekati i runga i te rakau a Aarona i roto ua i te po okotai! Akara tatou e eaa i akapera ai.
Kua aaere ua ana te tamariki a Iseraela i roto i te metepara no tetai taime i teianei. Kua manako tetai pae tangata e kare a Mose e tano ana ei arataki, e ko Aarona te ka tau ei taunga maata. Ko Kora tetai i manako akapera, pera rai a Datana, Abirama e te au arataki e 250 o te iti tangata. Kua aere pouroa mai ratou e kua karanga kia Mose e: ‘Eaa koe i tuku ei ia koe kia teitei ki runga ake ia matou?’
Kua akakite a Mose kia Kora e tona au tangata e: ‘Apopo i te popongi e rave i te au vairanga ai e e tuku i te tapou kakara ki roto i te reira. E oti aere mai ki te tapenakara o Iehova. Ka akara tatou e koai ta Iehova ka iki.’
Tera mai ra kua aere mai a Kora e tona au tangata e 250 ki ko i te tapenakara. Manganui te au tangata ke tei aere mai i te turu i teia aronga. Riri tikai a Iehova. ‘Akaatea mai mei te au puakapa o teia aronga kino,’ i karanga ai a Mose. ‘Auraka e amiri i tetai ua atu o ta ratou au apinga.’ Kua akarongo te tangata, e kua akaatea mai mei te au puakapa o Kora, Datana, e Abirama.
I reira kua karanga a Mose e: ‘Na teia e kite ei kotou e koai ta Iehova i iki. Ka ngaa te enua e ka apuku i teia aronga kino.’
I te oti anga te tuatua a Mose, kua ngaa te enua. Kua topa te puakapa e te au apinga a Kora, a Datana e Abirama pera te aronga i ko ia ratou ki raro, e kua tapokiia ratou e te enua. I te akarongo anga te tangata i te aue a te aronga tei topa ki raro i te enua, kua ava ratou e: ‘E oro! Ka apuku katoaia aea tatou!’
Ko Kora e tona au tangata e 250, tei te pae rai i te tapenakara. I reira kua tuku mai a Iehova i te ai, e kua pou katoatoa ratou i te ka. Kua akakite i reira a Iehova ki te tamaiti a Aarona ko Eleazara, kia apai i te au vairanga ai a te aronga i mate e kia maani i tetai tapoki angiangi no te atarau. Ka riro teia tapoki atarau ei akamatakite i te tamariki a Iseraela e, kare e tangata ke atu mari ua ko Aarona e tana au tamariki tamaroa te ka tavini ei au taunga no Iehova.
Inara kua inangaro a Iehova kia akataka meitakiia e ko Aarona e tana au tamariki tamaroa tana i iki ei au taunga. No reira aia i akakite ei kia Mose e: ‘E karanga ki te au arataki tataki tai o te kopu o Iseraela kia apai mai i ta ratou rakau. No te kopu o Levi, karanga koe kia Aarona e nana e apai mai i tana rakau. E oti e tuku i teia au rakau tataki tai ki roto i te tapenakara i mua i te aruna koreromotu. Ka tupu te tiare ki runga i te rakau a te tangata taku i iki ei taunga.’
I te akara anga a Mose i tera mai popongi, ae, kua puera te tiare e kua para te tekati i runga i te rakau a Aarona! Te kite ra koe i reira i teianei e, eaa a Iehova i akatupu ei te puera tiare ki runga i te rakau a Aarona?
Numero 16:1-49; 17:1-11; 26:10.