Pene 2

E Akapaapaa ia Iehova ei Atua Mou Ra

1. (a) Koai te Atua mou? (e) Ia tatou e apii ra iaia, akapeea to tatou uaorai au oraanga te akatuke angaia?

KUA tata te apotetoro ko Paulo ki tona au taeake Kerititiano e, noatu rai e e manganui tei karangaia e e atua, “kareka ia tatou nei, okotai rava ïa Atua, ko te Metua . . . okotai oki Atu ko Iesu Mesia.” (1 Kori. 8:5, 6) Te ‘Atua okotai’ ta Paulo i taiku maira ko Iehova ia, ko Tei Anga i te au mea ravarai. (Deu. 6:4; Apokalupo 4:11) Kua kite te aronga manako ariki iaia, i to ratou tapupu kore angaia kia piri atu kiaia, na to ratou kite i tona au tu e pera katoa oki te au mea tana i rave no te au tangata nei. Eaa tei tupu? E mea tau ua rai no ratou kia akapaapaa i Tei manako maataia e ratou ma te rekareka, ma te raveanga i te reira na roto i te au tuatua e te au angaanga katoa oki. I te tupu anga o to ratou aroa no te Atua, kua akakeuia ratou kia tuatua atu kia etai ke no runga iaia, e i te ngai e rauka ia ratou ei tangata nei te anoano ra ratou i te aru iaia. Te akamaroiroi maira te Puka Tapu ia tatou ravarai kia rave i te reira, i te na ko anga e: “E teianei ei aru kotou i te Atua, mei te tamariki akaperepere ra; Ei aerenga aroa to kotou.” (Ephe. 5:1, 2) E raukaʼi ia tatou te rave i te reira apii anga, ka tau tatou kia kite ia Iehova i tona tu tika tikai.

To Iehova tu ei Peretana

2. Eaa etai au tu maata rava atu o te Atua te akakeu ra ia tatou kia akapaapaa iaia?

² I roto i te Puka Tapu katoa ka kitea te au tuatua tika tikai e manganui i te akatakaanga i te au tu meitaki maata rava o te Atua. Me tatau koe i te reira, e rave marie koe i te tamanako no runga i te aite anga tikai o te reira au tu e eaa te puapinga o te reira kia koe. Ei akaraanga: “ko te Atua oki te aroa.” (1 Ioane 4:8) “Ko tei tau katoa tona au aerenga.” (Deu. 32:4) “Tei iaia oki te pakari.” (Iobu 12:13) “E te mana maata” katoa oki tona. (Isaia 40:26) Ia koe e akamanako ra i teia au tu, kare ainei koe e akakeuia, kia akapaapaa iaia no te mareka anga i te Atua?

3. Eaa etai atu au akaraanga o to Iehova ra tu te rekareka maataia ra?

³ Pera katoa oki i te akamatauanga ia tatou ki tona tu marekaia, te akakite maira te Puka Tapu kia tatou e ko Iehova “e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou.” (Exodo 34:6) “Ko koe, E Iehova, tei meitaki ra e tei papa ra no te akakore ara.” (Sa. 86:5, NW) “Te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.” (2 Para. 16:9) “Kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.” (Angaanga 10:​34, 35) Ko Iehova “tei oronga ua mai” e koia “te Atua mataora.” (Iakobo 1:5; 1 Timo. 1:11, NW) Mei teaa ra te mataora i te tavini atu i teia Atua aite koreia e kia kite i tana utuutuanga aroa!

4. (a) Eaa te tu akono ta Iehova e umuumu maira, e eaa te puapinga o te reira? (e) Eaa ta Salamo 34:3 e pati maira ia tatou kia rave?

⁴ Te tau ra ki tona au tu te tika e “e Atua aia te anoano ra kia akono iaia anake ua.” (Exodo 20:5, NW) E raukaʼi i te tavini iaia ma te arikiia mai ka tau tatou kia oronga kiaia i to tatou ngakau katoa i te akamori anga. Kare katoa oki tatou e tau kia anoano i teianei ao ko Satani te atua. (1 Ioane 2:​15-17; 2 Kori. 4:3, 4) Ka kite a Iehova i te tu akameamea ua no te tuatua tika. Te kite papu ra aia kare i ta tatou angaanga anake ua mari ra i to tatou manako ngakau katoa oki no runga i te reira e eaa te tu tangata ta tatou e tauta ra kia pera. Me te anoano papu ra tatou i te tuatua tika, ka tauturu aia ia tatou. (Iere. 17:10; Maseli 15:9) No runga i to Iehova ra tu, e au mirioni ua atu au tangata i te ao katoa kua ariki rekareka i te pati anga a te tata salamo o te Puka Tapu tei tata ra e: “E akamaata tatou ia Iehova; tatou katoa e akateitei i tona ingoa.” (Sa. 34:3) Ko koe ainei tetai i o ratou ra?

5. Eaa te ka tauturu ia tatou kia puapinga maata ravaia i ta tatou apii anga no runga i to Iehova ra tu?

⁵ Ka akaoonuia atu toou anoano i te tuatua no runga i te Atua, e ka tauturu maataia koe i taau tauta anga i te aru iaia me ka akara matatio tikai koe i tona ra tu teitei. E kimi (1) eaa tikai tona au tu tatakitai, penei eaa te tumu i tuke ei i to etai atu au tu, (2) akapeea ta Iehova akakite anga mai i te reira e kiaai ma, pera katoa (3) e akapeea taau akaari anga i te reira me kare akapeea te akatupu anga tau a te reira ki toou manako.

6. Na te tukuanga i te aroa ei akaraanga, e akakite mai e e akapeea taau akara matatio anga i to Iehova ra au tu. E rave i teia na te pauanga i te au uianga i te openga o teia parakarapa nei, kapiti katoaia te au irava tuatua tapu i roto i taau au pau anga.

⁶ E akamanako ana e okotai ua akaraanga. I ta te Puka Tapu tuatua anga, “Ko te Atua oki te aroa,” eaa tikai tona aite anga? (1 Ioane 4:8) Te vaira, etai, au tu o te aroa. Ko te tuatua Ereni tei taikuia i teia irava ko te a·gaʹpe te akataka maira i te tu aroa teitei rava, tei akakiteia maira i roto i te Atua uaorai ia Iehova ra. Ko te reira aroa e akakite anga i te tu noinoi kore papu tikai. Ma te manako anga i te reira, e akanoo i taau uaorai au pau anga no te au uianga i raro ake nei, ma te manakoanga i te au tuatua tapu i tataia ra.

Akapeea te akakite anga a teia tu i ta Iehova au angaanga i anga? (Angaanga 14:​16, 17)

Eaa te akaraanga maata rava no to Iehova ra aroa no te au tangata? (Ioane 3:16) No te tu memeitaki ainei o te tangata i rave ei a Iehova i te reira? (Roma 5:8)

Eaa ra i tau ei kia mana ta Iehova i rave na roto i tana Tamaiti ki runga i te mataara ta tatou ka akono i to tatou oraanga? (2 Kori. 5:​14, 15, 18, 19)

Na teea au mataara ta tatou akaari anga ei Kerititiano e tei ia tatou taua tu aroa rai no to tatou au taeake Kerititiano? (1 Kori. 13:​4-7; 1 Ioane 4:​10, 11; 3:16-18)

Ka tau katoa oki tatou kia akaari i te aroa kiaai ma, e akapeea? (Mata. 5:​43-48; 28:​19, 20; Gala. 6:10)

7. I taau uaorai apii anga, akapeea e kiteaʼi e koe etai au tumu mei te reira rai no runga i etai atu au tu o Iehova?

⁷ Ka inangaro ainei koe i te akara katoa i etai atu au tu o Iehova? Ei akamata anga, i te apii naau uaorai e tamata i te “tika” e te “pakari,” e penei ko te “takinga-meitaki” e te “aroa ua.” Na te akara anga i te au papaanga o te au puka a te Watch Tower (Punanga Tiaki Anga) e te papaanga irava Puka Tapu, ka kiteia e koe e maata te au apinga no te akamaramaanga.

E Tauturu ia Etai Atu Kia Kite i te Tuatua Mou no Runga i te Atua

8. (a) Eaa te au atua te akamoriia ra e te aronga o teianei ao? (e) Koai tei muri i teia au tu oripu anga katoatoa, e eaa ra koe i tuatua akaperaʼi?

⁸ I te tua patoi i te akamori no te Atua mou ra, e mirioni ua atu au atua ke ke te akamoriia ra e te au tangata. I te a anere mataiti, kua akamata to Kerititome i te irinaki i te “Toru Tai,” tei apiiia e to Babu­lonia, e to Aiphiti, te Initu e te Buda i mua ake i te reira tuatau. Kapiti atu ki te reira manako no te Atua, ko te au tutara mana ririnui, te aronga maroiroi maata i te tarekareka e te aronga imene tei akamoriia mei te au atua rai. Te moni, te tangata uaorai e te ainga kua riro katoa ei au atua tei orongaia atu te manako maata. Koai ra tei muri i te reira? Ko “te atua o teianei akatereanga o te au mea nei,” koia a Satani te Tiaporo. (2 Kori. 4:4, NW; 1 Kori. 10:20) Na te au ravenga kikite ravarai, te tauta ra aia i te tarurike i te au tangata kia aere ke mei ia Iehova, me kare kia akatakake i to ratou manako.

9. Eaa te mataara meitaki rava atu no te tauturu i etai ke kia kite i te tuatua mou no runga i te Atua?

⁹ Akapeea ra e raukaʼi ia tatou te tauturu i te reira au tu tangata, noatu me e aronga te manako ra e e Kerititiano ratou me kare ko etai atu, kia kite i te tika no runga i te Atua ra? Ko tetai mataara meitaki rava na te akaari atu kia ratou na roto i te tu tauturu i ta te Puka Tapu uaorai tuatua no runga i te akataka anga i te Atua mou ra e tona tu ei peretana. Ka tau katoa tatou i reira kia turu i te reira na te tu akono te akaata maira i te au tu akono i te Atua i to tatou uaorai oraanga.​—1 Pe. 2:12.

10. Me te tuatua atura ki te tangata irinaki i te Toru Tai, eaa ra i kore ei i te mea pakari kia manako ua e te kite papu ra tatou eaa tikai tona irinaki anga?

¹⁰ Inara peea me ka maro mai ia koe tetai papaki o te au mema no te au akonoanga Kerititome, ma te tuatuaanga e ko to ratou irinaki i te “Toru Tai” no te Tuatua Tapu mai ia? Ko te mea mua, kia marama e, noatu rai e e au akakite anga matauia etai no te apiianga “Toru Tai,” te vaira te aronga e manganui e manako ke to ratou uaorai. E pati atu ia ratou kia akamarama mai ia ratou uaorai, e ei reira ka tauturu atu ei ia ratou kia akaaiteia atu to ratou irinaki anga ki te au tuatua i roto i ta ratou uaorai Puka Tapu. I muri akera, e akamaroiroi ia ratou kia akaaite atu i ta te au akonoanga apiianga ki te Tuatua a te Atua ra.

11. E rave okotai ua o nga tumu maata e rima i te taime, e uriuri i te au uianga e te au irava tuatua tapu tei akapapaia ki roto i teia parakarapa ei manako anga no runga i te tau kore ki ta te tuatua tapu o te apiianga “Toru Tai.”

¹¹ I te tamouanga ki roto i toou manako i te anoano no te tauturu i te aronga ngakau tae, e akamanako ana e ka akapeea koe i te taangaanga anga i te au irava tei tataia i raro akenei no te uriuri manako anga no runga i te au tumu tei akaari kapitiia atu ma teia au tuatua tapu:

(1) Te akaketaketa ra tetai papaki o te aronga apii Toru Tai i te manako e e toru katoa Peretana i te rangi (Metua, Tamaiti e te Vaerua Tapu) mari ra okotai ua Atua.

Inara te akakite maira ainei a Angaanga 2:4, 17 e e peretana te “Vaerua Tapu”?

Eaa ra i puapingaʼi te akara eia nga peretana tei taikuia i roto i te au irava tuatua tapu te aru mai i raro akenei? (Ioane 17:​20-22; Angaanga 7:56; Apokalupo 7:10)

(2) Te irinaki ra tetai papaki e, nga mema o te “Toru Tai” e aiteite te kaka, e kare tetai i maata atu me kore i mea ngiti mai i tetai, te aiteite kapiti ra ratou e te aiteite katoa ra te mutu kore.

Te akatika ra ainei te au Tuatua Tapu? (No te pau anga, e akara ia Ioane 14:28; Mataio 24:36; Apokalupo 3:14.)

(3) Te tou ra tetai aronga kia Ioane 1:1 ei akapapu i te “Toru Tai.” Te maro ra ratou e kare te tuatua (“e”) i roto i te tata anga Ereni o teia irava, e no reira ka tau kia tatauia e: “ko te Atua oki te Tuatua,” kare e “e atua.”​—“NW.”

Inara eia nga peretana te tuatuaia ra ia Ioane 1:1? E toru? Me kore e rua? Akapeea katoa oki te patoi anga a Ioane 1:18 i te apiianga “Toru Tai”?

E tika rai e kare e tuatua akataka papu kore o te reo Ereni, inara tei roto i te au reo e manganui, e te tuatuaia ra i roto i te reira au reo ei akataka papu i te au manako. Me te manako ra tetai papaki e e tarevake te taiku i te tuatua akataka papu kore i te urianga ia Ioane 1:1, ka anoano katoa ainei aia i te akaruke i te reira ki vao ia Angaanga 28:6 i ta te King James Version e etai atu uri anga? (Ko tetai atu urianga ia Ioane 1:1, tei akakiteia maira i roto i te An American Translation, koia oki e “tu atua to te Tuatua,” tera te tu tei iaia te au tu atua mei to te Atua rai.)

(4) Te maro katoa ra te aronga apii i te Toru Tai e ia Genese 1:1, 26 ko te tuatua Epera tei uriia ko te “Atua” ko “El·o·himʹ” e ko teia ko te tere atu i te okotai i te reo Epera e ko tona aite anga tikai e “au Atua.”

Eaa ra i kore ei te reira e turu i te apiianga o te toru Peretana tu atua i roto i te ‘Atua okotai’?

Me te akakite maira i te “Toru Tai” i roto ia Genese 1:1, eaa te akakiteia maira i roto i Te Au Akava 16:23, te taiku ra ia el·o·himʹ no te “atua,” ma te verepa Epera i roto i te akataka anga e e okotai ua, kare i tere atu?

Eaa ra te tu tere atu i taikuiaʼi i roto i teia au irava i te reo Epera? Ko tetai mataara teia a te reo Epera i te akakite anga i te manako no te teitei me kore te ngateitei. Me e tere atu i te okotai ua peretana te tuatuaia ra, ka riro katoa te au verepa ei akataka e e tere atu te reira, inara i roto i te au tataanga i mua akenei kare ia i pera.

(5) Na runga i te akateitei maata anga a te au akonoanga i tuku ki rungao ia Iesu (e pera katoa oki te kiriti anga i te ingoa o Iehova ki vao i te au uri anga Puka Tapu e manganui), kua manako tetai aronga no Iesu anake ua me ka taikuia te Atua.

Inara eaa te akaraanga no te akamori ta Iesu i oronga mai no tatou kia aru? (Luka 4:8)

12. Eaa ra i tau ei ta Iesu taiku anga i tona Metua e ko “te Atua mou anake ua”?

¹² Noatu rai e te tuatuaia ra a Iesu i roto i te au Tuatua Tapu e “e atua,” pera katoa oki e ko te “Atua Mana,” inara kua akamaata aia i tona Metua, na te tuatuaanga nona e ko “toku Atua, e ki to kotou Atua ra.” (Ioane 1:1, NW; Ioane 20:17; Isaia 9:5) Kua akatika aia i ta Mose, i tuatua i mua akera e: “Ko Iehova te Atua; kare atu, koia anake ra, i kite ei koe.” (Deu. 4:35) E tuke rava to Iehova ki to te au apinga akamoriia mei te itoro rai, te au tangata akateiteiia e pera katoa a Satani te Tiaporo ra. Ei tuke anga kia ratou katoa, ko Iehova “te Atua mou anake ua” mei ta Iesu i tapa iaia ra.​—Ioane 17:3, NW.

“Aaere i te Ingoa o Iehova”

13, 14. Eaa te kapitiia atu ra ki te “kite” e te ‘aaere i te’ ingoa o Iehova?

¹³ I muri ake i te au mataiti e manganui o te oripu ua anga te manako i te akataka anga i te Atua, e manganui te aronga tei rekareka i to ratou kite mua anga i te ingoa tikai o te Atua, i roto i ta ratou Puka Tapu, koia a Iehova. (Exodo 6:3) Inara e tamouiaʼi to ratou puapinga i te reira kite na te akono anake i te ‘aaere i te ingoa o Iehova e tuatatau ua atu.’ (Mika 4:5) E maata ua atu i te kite ua anga i te ingoa o Iehova me kore i te karangaanga e e Kite ratou no Iehova tei kapitiia mai ki te reira.

¹⁴ No runga i te maata o to te Atua ra ingoa, te na ko ra a Salamo 9:10 e: “Te aronga i kite i toou ra ingoa, ka irinaki ia koe; . . . e Iehova.” Eaa ta te reira i kapiti mai? E tere atu i te kite ua anga i te ingoa o Iehova tei o mai ki te reira, kare tona aite anga e e irinakianga te reira ia Iehova. Ko te aite anga o te “kite” i to te Atua ra ingoa i konei ko te arikianga i to Iehova tu ei Atua, te akangateiteianga i tona mana taoonga, e te akarongoanga i tana au akauenga. Pera katoa oki, ko te ‘aaere i te ingoa o Iehova’ te akataka maira kia akatapuia kiaia e te komonoanga iaia ei tangata akamori iaia, ma te akonoanga tikai i te oraanga kia rotai ki to te Atua ra anoano. (Luka 10:27) Te rave nei ainei koe i te reira?

15. Eaa, i te pae atu i te manako ua no te angaanga, te anoanoia ra me ka tavini tatou ia Iehova e tuatau ua atu?

¹⁵ Me ka tavini tatou ia Iehova e tuatau ua atu, e mea tau kia tere atu i te manako ua no te angaanga te ka akakeu ia tatou. Kua raurau atura te apotetoro ko Paulo ia Timoteo, koia tei manganui tona mataiti i te tavinianga ia Iehova e: “E akamatau ia koe uaorai i te akakoroanga kia akono i te atua.” (1 Timo. 4:7, NW) No ko mai i te ngakau te akono anga; kua akaaraaraia e te ariki anga i te peretana tei orongaia atu ra kiaia te reira. Ko te “akono i te Atua” ra e akangateitei papu no Iehova uaorai. Te akakite ra i te inangaro mou piri tikai kiaia no te manako ariki anga iaia e tona ra au arataa. Ka akakeu te reira ia tatou kia anoano i te au tangata ravarai kia mou i te manako akangateitei anga i tona ingoa. E mea tau kia tatanu tatou i te “akono i te Atua” ra ei akakoroanga me kare ei re i to tatou oraanga me ka aaere tatou i te ingoa o Iehova, koia te Atua mou ra, e tuatau ua atu.​—Sa. 37:4; 2 Pe. 3:11.

Uriuri Akaou Anga

● Eaa to Iehova ra tu ei peretana? Akapeea tatou e puapingaiaʼi te raukaanga te maramaanga papu i tona au tu tatakitai?

● Akapeea e raukaʼi ia tatou te tauturu ia etai tangata ke kia kite i te tuatua mou no runga i te Atua?

● Eaa te kapitiia maira i te “kite” ia Iehova e te ‘aaere anga i tona ra ingoa’?