Pene 12
Te Aiteanga o Toou Papetito Anga
1, 2. (a) Eaa ra i tau ei kia riro te papetito anga ki te vai ei apinga manakoia e tatou tatakitai? (e) Na te tapoto ua, akapeea taau pau i nga uianga o te parakarapa 2?
I TE mataiti 29 T.N., kua tarukuia a Iesu ki roto i te Kauvai i Ioridana ra. Te akara ra a Iehova uaorai e kua akakite i te marekaanga. (Mata. 3:16, 17) E toru e te apa mataiti i muri mai, i muri ake i tona tuakaouanga, kua oronga a Iesu i te au ikuiku anga ki tana au pipi, i te na ko anga: “Ko te mana katoa o to te rangi e te ao katoa nei, kua tukuia mai, tei iaku anake. E teianei, ka aere kotou, e akariro i to te pa enua katoa ei pipi; ka bapetizo atu ei ia ratou.” (Mata. 28:18, 19) Kua oti ainei koe i te papetitoia kia tau ki ta Iesu i akaue maira? Me kare te akateatea mamao ra ainei koe i te rave i te reira?
2 No eia tu e mea puapinga maata te marama meitaki i te aite anga o te papetito anga. Nga uianga tau kia akamanakoia ko tei kapitiia mai nei: E aiteite ainei te papetito anga o te au Kerititiano i teia tuatau ki to Iesu ra? Te piri ra ainei kia koe te au mea ravarai ta te Puka Tapu e tuatua ra no runga i te papetito anga? Eaa te kapitiia ra ki te oraanga e tau ei ki te aite anga o te papetito anga o te Kerititiano ki te vai?
Te Papetito Anga ta Ioane i Rave Ra
3. Noai ma anake ua ta Ioane ra papetito anga?
3 Vaitata i te ono marama i mua ake i to Iesu papetito angaia, kua aere atu a Ioane Papetito ki te metepara i Iudea ra, ma te tutu aere anga e: “Kia tataraara, no te mea kua vaitata mai te patireia o te au rangi ra.” (Mata. 3:1, 2, NW) Kua akarongorongo te aronga katoa no te reira ngai i ta Ioane i tuatua, kua aaki ua ra i ta ratou ara e kua papetito iora aia ia ratou i Ioridana. No te ngati Iuda te reira papetito anga.—Angaanga 13:23, 24; Luka 1:13-16.
4. (a) Eaa ra i anoanoiaʼi kia rapurapu te ngati Iuda i te tataraara? (e) Eaa tei umuumuia no ratou kia rave ei kopae ke atu i te ‘papetitoia ki te ai’?
4 Tei roto te reira aronga ngati Iuda i te tu anoanoia e te rapurapu no te tataraara. I te mataiti 1513 M.T.N. i te Maunga i Sinai kua o atu to ratou ai tupuna ki roto i te koreromotu a te iti tangata ma te Atua ko Iehova katoa. Inara kare ratou i akono i ta ratou apainga i raro ake i te reira koreromotu e no reira kua akaapaia ratou e te reira ei aronga ara. E kino rava to ratou turanga. Kua vaitata roa “taua rā maata e te mataku o Iehova” tei totouia e Malaki ra, e i te 70 T.N. kua rokoia Ierusalema e te akapou anga viviki. E tu totomapu to Ioane Papetito no te akamori mou mei to Elia rai, e kua tonokia mai aia na mua ake i te akapou anga ra “ei akonokono i tetai pae tangata e tau no te Atu ko [Iehova].” Kua anoanoia ratou kia tataraara no ta ratou au ara ki te Ture koreromotu ra e kia papa to ratou ngakau e te manako no te ariki i te Tamaiti a te Atua, koia ta Iehova e tono maira kia ratou. (Malaki 4:4-6; Luka 1:17; Angaanga 19:4) Mei ta Ioane i akataka maira e, ka papetito te Tamaiti a te Atua i te vaerua tapu (ko te papetito anga ia tei tupu i mua ra ki te au pipi tiratiratu ra i te Penetekote o te 33 T.N.) e i te ai (tei rokoia ra ki te aronga kare i tataraara ei akapou anga i te 70 T.N.). (Luka 3:16) Ei kopae i te tupu anga te reira ‘papetito anga i te ai’ kia ratou tatakitai kua anoanoia te reira aronga ngati Iuda o te anere mataiti mua ra kia papetitoia i te vai ei akatutu anga i to ratou tataraara anga, e kia riro ratou ei pipi na Iesu Karaiti i te tuera anga te reira tuatau.
5. (a) I to Iesu aere anga kia papetitoia aia, eaa ra a Ioane i ekoko ei i te reira? (e) Eaa tei akatutuia i to Iesu papetito anga i te vai? (ng) Peea to Iesu ra manako papu tikai no runga i te akatupuanga i to te Atua ra anoano nona uaorai?
5 Ko Iesu uaorai tetai i o ratou ra tei aere maira kia Ioane kia papetitoia. Inara no teaa? Kua kite a Ioane e kare a Iesu ra ara no te aaki, e no reira kua karanga aia e: “Ko au oki taau e bapetizo e tikaʼi, e e aere mai oki koe kiaku nei?” Inara e akatutu anga to Iesu ra papetito anga no tetai apinga ke. No reira kua pau atura aia: “Ka tuku ua mai na: e pera oki tatou i te akatika i te au tuatua-tika katoa e tau ei.” (Mata. 3:13-15) Kare to Iesu papetito anga e tau ei akatutu anga i te tataraara i te ara; kare katoa oki aia e tau kia akatapu iaia uaorai ki te Atua, no te mea e mema aia no te iti tangata kua oti ke ana i te akatapuia kia Iehova. Mari ra, ko tona papetito anga, i te taeanga te tangata ngati Iuda ki te pakari anga o te 30 mataiti ra, e akatutu anga te reira i tona orongaanga iaia uaorai ki tona Metua i te rangi kia rave ua atu i Tona anoano. Ko to te Atua anoano no te “tangata ra, ko Iesu Mesia,” i kapiti katoa i te angaanga tei piri atu ki te Patireia, pera katoa oki te atinga o tona ra oraanga tangata apa kore ua ei oko e ei tumuanga no te koreromotu ou. (Luka 8:1; 17:20, 21; Ebera 10:5-10; Mata. 20:28; 26:28; 1 Timo. 2:5, 6) Kua rave akatenga a Iesu i tei akatutuia ra e tona papetito angaia i te vai. Kare rava aia i tuku i etai atu manako kia akatapae ke iaia uaorai. Tae roa ki te openga o tona oraanga i te enua nei kua tamou aia i te raveanga i te anoano o te Atua.—Ioane 4:34.
Papetito Anga ki Roto i te Mate
6. Eaa tetai atu papetito anga i o atu a Iesu ki roto e eaa te roa o te tuatau?
6 Kia rotai ei ki te aite anga o te akatutu anga i to Iesu papetito anga i te vai, kua o katoa aia ki tetai atu papetito anga. Kua kite aia e ko te angaanga tei akanooia e te Atua ki mua iaia ka taki atu ki tana tukuanga i tona oraanga tangata kia mate ei atinga, inara ka akatuia aia ei vaerua i te ra toru. Kua tuatua aia e e papetito anga te reira. Kua akamata te reira “bapetizoanga” i te 29 T.N. mari ra kare i akaotiia e tae roa ki tona mate anga tikai e te akatu angaia. No reira rai e vaitata i te toru mataiti i muri ake i tona taruku angaia ki te vai kua tau aia kia tuatua e: “E bapetizoanga ra toku e bapetizoiaʼi au nei, e kare rai toku mamae kia oti!”—Luka 12:50.
7. (a) Koai ma etai atu tei papetitoia ki roto i te mate ra? (e) Naai e rave i te reira?
7 Pera katoa oki te aronga te ka tutara kapipiti atu kia Karaiti ra ki te rangi ka tau katoa kia papetitoia ki roto i te mate. (Mareko 10:37-40; Kolosa 2:12) Kia mate ratou ra ka vaio ratou i to ratou oraanga tangata e tuatau ua atu, mei ta Iesu rai i rave ra. E i to ratou tuakaouanga ka kapitiia atu ratou kiaia i te tutara anga ki te rangi ra. E papetito anga te reira, kare e riro na tetai tangata e rave, mari ra na te Atua na roto i tana Tamaiti i te rangi ra.
8. Eaa oki te aite anga no ratou kia “bapetizoia ki roto i te Mesia ra”?
8 Ko te aronga tei papetitoia ki roto i to Iesu ra mate te tuatua katoaia ra e kua “bapetizoia ki roto i te Mesia ra ia Iesu.” Na te vaerua tapu tei akatikaia mai na roto ia Karaiti ra kua riro ratou kia taokotaiia atu kiaia, ki to ratou upoko, ei au mema no tona putuputuanga tei akatainuia ra ki te vaerua, ei “kopapa” nona. I te mea na te reira vaerua i raukaʼi ia ratou i te akaata i to Karaiti ra tu meitaki rava, ka rauka kia tuatuaia no ratou e kua riro “okotai rai oki kotou katoa i roto i te Mesia ra ia Iesu.”—Roma 6:3-5; 1 Kori. 12:13; Gala. 3:27, 28; Angaanga 2:32, 33.
Papetito Anga i te au Pipi Kerititiano ki te Vai
9. (a) I naea i akamata muaʼi te papetito anga tei raveia mei ta Mataio 28:19 i akataka maira? (e) Na te uriuri anga i te au uianga e te au tuatua tapu i roto i teia parakarapa nei, e akataka mai e eaa ta Iesu akakite anga i ta te aronga papetitoia ka tau kia kite.
9 Na Ioane i papetito i te au pipi mua a Iesu ki roto i te vai e kua takiia atu kia Iesu ei au mema tei tau ei vaine akaipoipo ou nana i te pae vaerua. (Ioane 3:25-30) I raro ake i ta Iesu arataki anga kua rave katoa ratou i te papetitoanga, tei tau ki ta Ioane papetito anga. (Ioane 4:1-3) Inara, kua akamata atu ia Penetekote 33 T.N., kua akamata ratou i te akatupu i te akauenga kia papetito “i te ingoa o te Metua, e no te Tamaiti, e no te Vaerua Tapu.” (Mata. 28:19) Ka kitea e koe e e puapinga maata te akamanako akaou e eaa te aite anga o te reira, i roto i te marama o te au tuatua tapu tei tataia ma te au uianga te aru mai nei:
E papetitoiaʼi “i te ingoa o te Metua,” eaa te mea ka tau te tangata kia kite no runga i te Metua? (2 Ariki 19:15; Sa. 3:8; 73:28; Isaia 6:3; Roma 15:6; Ebera 12:9; Iakobo 1:17)
Te papetito anga i te ingoa “no te Tamaiti” te anoanoia ra kia kite i teaa? (Mata. 16:16, 24; Philipi 2:9-11; Ebera 5:9, 10)
Eaa ta te tangata ka tau kia irinaki e tikai kia papetitoia aia i te ingoa “no te Vaerua Tapu”? (Luka 11:13; Ioane 14:16, 17; Angaanga 1:8; 10:38; Gala. 5:22, 23; 2 Pe. 1:21)
10. (a) Eaa te akatutuia ra e te papetito anga Kerititiano i te vai i teia tuatau nei? (e) Eaa te tuke anga o te reira i to Iesu uaorai papetito anga? (ng) Me oti i te papetitoia te aronga tei tau i ta te Tuatua Tapu ra, ka riro mai ratou ei aa?
10 Te aronga mua tei papetitoia kia tau ki te reira au ikuiku anga na Iesu e au ngati Iuda (e te aronga tei aru i te akonoanga ngati Iuda), ko ratou tei riro ke ana ei iti tangata tei akatapuia ki te Atua e kua akono takakeia e ia tae roa mai ki te 36 T.N. Inara, i te akatotoa angaia te tika no to Samaria e te au Etene kia riro katoa ei pipi Kerititiano, i mua ake i to ratou papetito angaia kua anoanoia ratou tatakitai kia tia i te akatapu anga i te katoaanga kia Iehova kia tavini atu kiaia ei pipi na tana Tamaiti. No te katoatoa, kapiti katoa te ngati Iuda, te vai tamou ra te reira ei aite anga no te papetito anga i te vai e tae roa mai ki to tatou tuatau nei. Ko teianei “okotai bapetizo” te tau ra no te aronga katoatoa tei riro mai ei Kerititiano mou. Ka riro ratou i reira ei au kite Kerititiano no Iehova, ei au orometua akataoongaia no te Atua.—Ephe. 4:5; 2 Kori. 6:3, 4.
11. (a) Te tau ra te papetito anga Kerititiano i te vai ki teaa, e akapeea ra? (e) Ka akaoraia te Kerititiano i teaa?
11 E maata te puapinga o te reira papetito anga ki mua i nga mata o te Atua. I muri ake i te taiku anga i ta Noa ra maanianga i te araka i akaoraia ra aia e tona ngutuare tangata i te Vaipuke, kua taki te apotetoro ko Petero i te manako no te reira. Kua tata aia e: “Ko tei tau i te reira ra, ko te bapetizo ïa e ora katoaʼi tatou i teianei, (eiaa i te kopae anga i te viivii o te kopapa nei, i te tuatua ra i te akava-ngakau meitaki ra i te Atua,) i te tuakaouanga o Iesu Mesia ra.” (1 Pe. 3:21) E akapapu anga tika tikai te araka e kua akatapu a Noa iaia uaorai kia rave i to te Atua ra anoano e kua oti tiratiratu tikai iaia te rave i te angaanga tei akaueia ra e te Atua. Na te reira i taki atu ki tona akaoraanga. Na roto i te mataara aiteite, ko te aronga tei akatapu ia ratou uaorai kia Iehova na runga i te tumuanga i te akarongo ia Karaiti tei akatuia mai ra, e kua papetitoia ratou ei akatutu anga i te reira e kua rave ua atu i to te Atua anoano no tana au tavini i to tatou tuatau nei te ka akaoraia i teianei ao kino. (Gala. 1:3, 4) Kare ratou e takiia atu no te akapou anga kapitiia ki te tuanga o teianei ao. Kua akaoraia ratou mei te reira mai e kua orongaia atu e te Atua te akava ngakau meitaki no ratou.
Te Raveanga i ta Tatou au Apainga
12. Eaa i kore ei te papetito anga anake ua e riro ei i akapapu anga i te ora?
12 E tarevake kia manako e ko te papetitoia anake e akapapuangaia i te ora. E puapinga anake te reira me kua akatapu mou tikai te tangata iaia uaorai kia Iehova na roto ia Iesu Karaiti e ka rave ua atu ei i to te Atua ra anoano i muri ake, kia tiratiratu e tae roa ki te openga ra.—Mata. 24:13.
13. (a) Eaa to te Atua anoano no te au Kerititiano tei papetitoia kia akono i to ratou uaorai oraanga? (e) Eaa te manako maata tei tau i to tatou oraanga ei pipi Kerititiano?
13 Kua kapitiia atu ta te Atua i anoano no Iesu ki te mataara no tana akono i tona uaorai oraanga ei tangata. Kua akapapaia te reira kia tukuia atu ki te mate ei atinga. No tatou, ka tau to tatou au kopapa kia orongaia ki te Atua, kia rave ua atu i te oraanga akaatingaia. Ka taangaangaia i te rave anga anake i to te Atua ra anoano. (Roma 12:1, 2) E mea papu e kare tatou e rave ana i te reira, me i etai tuatau, ka akono akakoro tatou ia tatou uaorai kia aite atu ki to teianei ao takapini ia tatou me kare me ka akono tatou i to tatou oraanga kia aruaru i te tu noinoi apinga e ka rave mea ngiti ua i te angaanga ki te Atua ra. (1 Pe. 4:1-3; 1 Ioane 2:15-17) I te ui anga tetai ngati Iuda e eaa tana ka tau kia rave e raukaʼi te ora mutu kore, kua akamaaraara atu a Iesu kiaia i te puapinga maata o te akono anga i te oraanga ma e i reira kua tou atu aia i tei tau kia akariroia ei pipi Kerititiano, kia aru ia Iesu, ko te apinga mua ia i te oraanga. Kare e tau kia riro ei tuanga rua mai ki te aruaru anga i te apinga kopapa nei.—Mata. 19:16-21.
14. (a) Eaa te apainga no te Patireia te vai ra ki runga i te au Kerititiano katoatoa? (e) Mei tei akatutuia ra i te kapi 101, eaa etai au mataara meitaki no te rave i te reira angaanga? (ng) Me ka rave tikai tatou i te reira angaanga ma te ngakau katoa, eaa ta te reira e akapapu maira?
14 E mea tau katoa oki kia akamaaraaraia e kua kapitiia atu to te Atua ra anoano no Iesu ki te angaanga tei piri atu ki te Patireia. Kua akatainuia a Iesu uaorai ei Ariki. Inara iaia i te enua nei e kite totomapu aia no te Patireia. E angaanga aiteite ta tatou no te rave i te akakitekite aere e e mea tau katoa oki no tatou kia rave i te reira ma te ngakau katoa. Na te raveanga i te reira te akakite ra tatou i te manako ariki i to Iehova ra ngateitei e to tatou aroa no to tatou au tangata katoa. Pera katoa oki te akaari ra tatou e te taokotai ra tatou ma to tatou au taeake akamori i te ao katoa nei, pouroa ratou e au kite anake no te Patireia, i te tauta anga kia tae ki te akakoro anga no te ora mutu kore i te tuanga o te reira Patireia.
Uriuri Akaou Anga
● Eaa te au tu tei aiteite e te au tuke anga i rotopu i to Iesu papetito anga e te papetito anga i te vai i teia tuatau nei?
● Noai ma ta Ioane ra papetito anga? Koai ma te papetitoia ra i te mate? E koai ma tei “bapetizoia ki roto i te Mesia ra”?
● Eaa te kapitiia atu ra ki te akono anga i te au apainga no te papetito anga Kerititiano ki te vai?
[Pia/Au Tutu i te kapi 101]
Na Teea au Mataara Taau Tutu Aere Anga i te Patireia?
Mei tera ngutupa ki tera ngutupa
Na te oki akaou anga i te aravei i te aronga inangaro mai
I te apii Puka Tapu i te ngutuare
I te pae mataara
Ki te au taeake i te apii
Ki te au taeake i te angaanga