Au Putuputuanga no te Akatupu Anga i te Aroa e te Taokotai

Penei i aere ana koe ki etai au uipaanga o etai putuputuanga o te au Kite o Iehova i te ngai vaitata e noo ra koe. E au tangata no te au tu oraanga ravarai—te au pupu ngutuare, te aronga takaua, te aronga ruau e te aronga ou—i reira. Kua taokotai katoaia i ta ratou akamorianga e te manako ra kia tauturu i etai ke.

I roto i te akapapaanga e maata te aronga te umuumu ra i te angaanga taokotai, e mea anoanoia tetai akaaere. Ko te Atua e Atua no te au; no reira ko te reira tu au ka tau kia akakiteia ki roto i te putuputuanga o tona iti tangata. Mei to te anere mataiti mua rai, pera katoa i teia tuatau te aronga tau, e te pakari, e te au tane Kerisitiano kite te akataoongaia ra ei aronga pakari, me kare ei au akaaere. Na ratou e akaaere i te putuputuanga e te akono i te au mea anoanoia i te pae vaerua. Na etai atu au tane tiratiratu tei matauia e e tavini orometua e tauturu ana ia ratou. Kare teia aronga e tutaki iana me kare e koi ana i te moni tauturu mari ra te rave angaanga ua ra, ma te tutaki anga i ta ratou uaorai au apinga no ta ratou ngai angaanga mai.—1 Korinetia 14:33, 40; Philipi 1:1; 1 Timoteo 3:8, 9.

Akapeea te iki anga i teia aronga? Ka anoanoia ratou ei tavini tiratiratu no te Atua ei aronga akakitekite i etai atu tu tau no te Tuatua Tapu. Ko etai o teia au tu anoanoia koia oki: ‘ei tangata mako, e te akono meitaki, e te noo marie, e te kite i te tangata ke ke, e te tau kia apii, ei tangata maru ra, eiaa ei noinoi moni; ei arataki meitaki i tona uaorai ngutuare ra, auraka ei tangata akarongo ou ua mai; ei rongo meitaki oki tona i te aronga ki vao ra e tikai’; ‘ei tangata tapu marie i te tuatua e te karape i te apiianga.’—1 Timoteo 3:1-15; Tito 1:7-9.

Kare na te putuputuanga teia au tangata i iki no te reira taoonga, e e penei e Kerisitiano putuputu ou ua te maataanga o ratou ra. Mari ra, na te aronga manako maroiroi e te kite ko ratou te aronga pakari ko tei kite marama meitaki tikai e eaa te turanga o te aronga te manakonako iara i te pae o te umuumuanga a te Tuatua Tapu. Ei reira te akataoonga anga o te aronga pakari e te au diakono e raveiaʼi i raro ake i te akaaere a te Pupu Akaaere o te au Kite o Iehova, te aru nei teia i te akaraanga tei akanooia e te putuputuanga Kerisitiano i te anere mataiti mua ra.

Kare teia aronga pakari, me kare au akaaere, i te pupu orometua takake; kare ratou i te au pu i rungao i etai atu. Mei ta Iesu i tuatua ra e, ko te tangata arataki i o kotou na ka tau ia ei tavini no te katoatoa. I roto i te putuputuanga o te au Kite o Iehova, e taeake rave angaanga tikai te aronga pakari no te Basileia o te Atua.—Mataio 20:26, 27; 23:8-11; Roma 12:8; 1 Korinetia 3:5; 4:1, 2; Kolosa 4:11; 1 Tesalonia 5:12-14.

Ei au akaaere, te arataki ra ratou i te apiianga tei orongaia i te au uipaanga e te aere ra ki mua i te rave anga i te tutu aere. Ko te akakoroanga mua a te putuputuanga ko te tutu aere i te tuatua meitaki o te Basileia takapini te kotinga tei akapapaia. Ei au tiaki katoa oki te au akaaere, tei tutaka aere i te aravei i te au mema o te putuputuanga no te akamaroiroi atu ia ratou i te au mea anoanoia ra.—Mataio 24:14; Angaanga 1:8; 1 Tesalonia 2:11, 12; 5:14, 15; 2 Timoteo 2:24-26; Ebera 13:17; Iakobo 5:13-16; 1 Petero 5:1-4.

Tei runga katoa oki i te aronga pakari te apainga no te akatikatika e te ako i te aronga te aru ra i te arataa tarevake e penei ka akatupu i te kino no te tu akono viivii kore e te tika i te pae vaerua e te taokotaianga o te putuputuanga.

Na te kapiti putuputu ki te putuputuanga ka rauka ia koe te pirianga taeake meitaki e te au puapinga e manganui i te pae vaerua.—Salamo 35:18; 84:10.

• Naai e arataki ana i te au angaanga a te au putuputuanga tatakitai?

• Na runga i teea tumuanga te iki anga i teia au akaaere?

• Eaa ta ratou au apainga?

[Au Tutu i te kapi 13]

Na te au akaaere e apii i te putuputuanga, e arataki i te tutu aere mei tera are i tera are, akamaroiroi na te tutaka aere ei tiaki, oronga anga i te ako e te akatikatika i te tuatau tei anoanoia