Akapapaia te au Putuputuanga no te Tutu Aere i te Basileia o te Atua
Ia Iesu Mesia i te enua nei, kua tutu aere aia i te Basileia o te Atua, kua aere aia mei tetai vila ki tetai vila e mei tetai oire ki tetai oire. Kua apii katoa aia i tana au pipi e kua akaunga atu ia ratou kia rave i taua angaanga rai. I mua ake i tona aere anga ki te rangi, kua akaue aia i tana au pipi kia akariro i to te pa enua ravarai ei pipi. Mei te akamata anga mairai kua akapapaia te putuputuanga Kerisitiano mua ra no te tutu aere i te tuatua meitaki. Te au ngai ravarai i aaereia e te au pipi ra, kua kitea ratou i te tutu aere anga i te Basileia o te Atua.—Mataio 4:17, 23; 10:1-16; 28:19, 20; Luka 4:43, 44; 8:1; 10:1-9; Angaanga 1:8; 4:31; 5:42; 8:12; 19:8; 28:23, 30, 31; Roma 10:9, 10, 14.
I ta Iesu totou no te openga o te akatereanga o te au mea nei, kua akakite aia: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ia i reira ra.” Ko teia angaanga tutu aere ko tetai apainga maata ia a te putuputuanga Kerisitiano i teia tuatau.—Mataio 24:14; Mareko 13:10.
Takapini te ao katoa, kua papa te au putuputuanga o te au Kite o Iehova no te rave kia oti to ratou ngai katoatoa te tutu aere i te tuatua meitaki o te Basileia o te Atua ma te mako tikai. Kia raukai te rave ma te tu tau tikai, kua oronga te au opati manga o te Watch Tower Society i te au enua tatakitai i te kotinga enua na te au putuputuanga tatakitai no te akakitekite aere anga. Na te putuputuanga e tipupu i te reira ngai ki roto i te au tuanga mea ngiti mai, e ka orongaia te reira au tuanga ki te aronga te ka rave i te apainga no te aravei i te au tangata katoatoa i roto i reira.—1 Korinetia 14:33, 40.
Te mea matauia e te au Kite ko te aravei i te au tangata na te aere anga mei tera are i tera are. I te au uipaanga o to ratou putuputuanga kua apiiia te au Kite o Iehova kia rave poto ua i te oronga anga i te tuatua no te Basileia i te au ngutupa, ma te tatau anga i ta ratou Puka Tapu. E apai ana te au Kite o Iehova i te au puka apii Puka Tapu ei oronga ki te au ngutuare tangata tei anoano kia maata atu te kite i te Tuatua a te Atua.
Kia raukai te oronga i te tuatau no te katoatoa i roto i te ngai kotinga no te akarongorongo i te tuatua puapinga no te Basileia, te rave nei te au Kite i te tataanga taka meitaki ia ratou e aere ra mei tera are i tera are, ma te akakite anga i te au are kare e tangata i te kainga me kare penei no tetai atu tumu kare i rauka te akakite marie atu. Ka oki akaou atu a tetai taime ke. Te ngai ka akaari mai te tangata i te manako inangaro, ka tataia te reira, e ka oki akaou atu te au Kite i te oronga atu i etai atu akakitekite anga no te Tuatua Tapu. Me ka anoanoia, ka rave putuputuia te apii Puka Tapu. Pouroa teia ka raveia ma te tutaki kore ua.
Te oronga katoa ra te au Kite i te au makatini ki te aronga te aaere ra i te au mataara. Na teia ravenga ka rauka ia ratou te aravei i te au tangata e manganui penei kare e kitea e ratou i te ngutuare. E tautaanga pakari tikai ka raveia kia itae atu ki te katoatoa te ka akarongorongo mai.—Angaanga 17:17; Apokalupo 14:7; 22:17.
Eaa ra te au Kite ka rave ei i te oki akaou anga noatu ko te maataanga o te tangata kare e akaari mai ana i te manako ariki? Kua kiteaia e ko te turanga o te au tangata tatakitai e putuputu te tauiia e ka akarongo meitaki ratou a tetai atu aravei anga, me kare penei ko tetai tangata ke i taua ngutuare rai te ka araveiia te ka akaari mai i te manako ariki.
I tuatua a Iesu ki tana au pipi: “E na mua kotou i te kimi i te basileia o te Atua, e te tuatua tika nana ra.” E tuanga maata ta te tutu aere i te Basileia o te Atua ka akatupu i ta tatou kimi anga i te Basileia na mua, e te mou nei te au Kite o Iehova i te reira ei akakoroanga puapinga maata rava i to ratou oraanga.—Mataio 6:33; 2 Timoteo 4:2.
• Eaa te angaanga a Iesu e te au Kerisitiano mua ra tei totouia e ka rave katoaia i to tatou tuatau nei?
• Akapeea te akapapa anga i te angaanga tutu aere a te au Kite o Iehova?
• Eaa ra te au Kite ka rave ei i te oki akaou anga ki te aravei i te au tangata noatu e kare te maataanga e akaari mai i te manako ariki?
[Au Tutu i te kapi 16, 17]
Tutu aere ra te au Kite o Iehova i te Basileia o te Atua i te au enua ke ke
Thailand
Mexico
Netherlands
Korea
Curaçao
Ghana
Peritane
Otereria