Te Oraanga ki Roto i te Ao Ou ki i te Au

Me akara koe i te tutu i roto i teia puka rikiriki, eaa toou manako? Kare ainei toou ngakau e inangaro i te au, te mataora, e te puapinga te akaraia ra i reira? E mea papu e te pera ra ia. Inara e moemoea ua ainei te reira, me kare e manako ua, kia irinakiia e ka tupu te reira au tu ki runga i te enua nei?

Penei te maataanga o te tangata te manako akapera ra. Te au tupu anga i teia tuatau e tamaki, e rave kino, e onge, e maki, te ruau aere anga—e tokoiti ua teia i taikuia nei. Inara te vaira te tumu no te manakonakoanga. I te akara anga i te tuatau ki mua, te akakite maira te Pipiria kia tatou, e “te tatari nei ra tatou i te rangi ou e te enua ou tana [ta te Atua] i tuatua maira, i te vai tika anga o te tuatua-tika ra.”—2 Petero 3:13; Isaia 65:17.

Ko te reira “rangi ou” e te “enua ou,” i ta te Pipiria akataka anga, kare i te rangi kopapa me kare enua ou tikai. Kua angaia te enua e te rangi kopapa ra ei au mea apa kore, e te akaari maira te Pipiria e ka vai rai e tuatau ua atu. (Salamo 89:36, 37; 104:5) Ko te “enua ou” e taiate tangata tuatua tika te ka noo ki te enua, e ko te “rangi ou” ko te patireia apa kore ua i te rangi, me kare kavamani, te ka tutara i rungao i te taiate tangata i te enua nei. Inara e mea tau ainei kia irinaki e e “enua ou,” me kare e ao ou kaka, e rauka mai?

Ina, e akamanako ana i te tika e ko te reira au tu meitaki e tuanga no ta te Atua ra akakoroanga mua no te enua nei. Kua tuku aia i nga tokorua mua ki te enua Parataito i Edene e kua oronga atu i te akauenga meitaki rava: “Kia anau korua, e kia maata roa, e e akaki i te enua nei, e e akavi.” (Genese 1:28) Ae, ko ta te Atua akakoroanga kia anau tamariki raua e i te openga kia totoa to ratou Parataito kia takapini te ao katoa. Noatu rai e kua iki raua i muri akera i te akarongo kore ki te Atua, riro akera kia kore e tau no te ora mutu kore, kare i tauiia ta te Atua akakoroanga. E ka akatupuia ra te reira i roto i te ao ou!—Isaia 55:11.

Ko te tika, me pure koe i te pure a te Atu ra, me kare to Matou Metua, e te pati anga kia tae mai te Patireia o te Atua, te pure ra koe no tona kavamani i te rangi ra kia takore atu i te rave kino i te enua nei e kia tutara ki rungao i te reira ao ou. (Mataio 6:9, 10) Ka tau ra tatou kia irinaki e ka pau mai te Atua i te reira pure, i te mea te taputou maira tana Tuatua e: “Ka riro te enua no te aronga tuatua-tika, ka noo tamou rai ratou i reira.”—Salamo 37:29.

Te Oraanga i Roto i te Ao Ou a te Atua

Kua apai mai te Patireia o te Atua i te au puapinga ki te enua nei kare e rauka te akaaiteia atu, i te akatupu anga i te au mea memeitaki ravarai tei akakoroia e te Atua i te akamata anga mairai kia rekareka tona au tangata i runga i te enua nei. Ka kore atu te makitakita e te akariri, e i te openga ra ka riro te au tangata ravarai i te enua nei ei au taeake mou ki etai katoa atu. Te taputou maira te Atua i roto i te Pipiria e e ‘akakore aia i te tamaki e tae rava akenei ki te openga enua.’ “Kare tetai enua e tamaki mai ki tetai enua i te koke, kare oki ratou e apii akaou i te tamaki.”—Salamo 46:9; Isaia 2:4.

Ka akariroia te enua katoa kia aite te tu ki te kainga parataito. Te na ko ra te Pipiria e: “Te medebara, e te ngai vaiavare ua, e rekareka ia no ratou ra; e rekareka rai te enua ngangaere, e pua oki mei te tiare. . . . e pupu oki te vai na te medebara, e te au mata vai i te ngai tuamarō ra. E riro te vai pikikaa ua ei roto, e te enua keremarō ra ei vai pupui.”—Isaia 35:1, 6, 7.

E maata te au tumu no te rekareka i te enua Parataito ra. Kare te au tangata e onge akaou no te kore manga. “Ei reira e ua maata mai ei te enua,” i na te Pipiria ei. (Salamo 67:6; 72:16) Ka rekareka te katoatoa i te au ua o ta ratou uaorai angaanga, mei ta Tei Anga mai ia tatou i taputou maira: “Na ratou e tanu i te au kainga vine, ka kai ei i te kai i reira . . . kare ratou e tanu, e na tetai ke e kai.”—Isaia 65:21, 22.

I roto i to te Atua ao ou, kare te au tangata e noo piri rava i roto i te au are mamaata e to ratou au pia aere me kare au are viivii ua, no te mea kua akakoro te Atua e: “E patu ratou i te au are, e na ratou uaorai e noo . . . Kare ratou e patu, e na tetai ke e noo.” Te totou katoa maira te Pipiria e: “Kare ratou e angaanga puapinga kore ua.” (Isaia 65:21-23) No reira ka tu te au tangata i te angaanga puapinga, e te angaanga marekaia. Kare te oraanga e riro ei mea maromaroa.

Kia tae te tuatau ka akaoraia mai e te Patireia o te Atua te pirianga au ua tei matauia i te kainga i Edene ra i rotopu i te au manu, e i rotopu i te au manu e te tangata. Te tuatua ra te Pipiria e: “Ei reira te luko e noo katoaʼi raua ko te punua mamoe; e te nemera e te punua puakanio, e kapiti katoa ia ki te moe anga; e te punua puakatoro, e te liona ou, e te puakatoro angaiia ra, okotai rai kapiti anga mai; e na tetai tamaiti meangiti e arataki.”—Isaia 11:6-9; Hosea 2:18.

E akamanako ana, i roto i te enua Parataito ka rapakauia te au maki katoatoa e pera katoa oki te au tu kopapa kino ra! Te akapapu maira te Tuatua a te Atua kia tatou: “Kare oki to reira e karanga e, Kua maki au.” (Isaia 33:24) “E [na te Atua] e orei i te roi-mata katoatoa, e e kore rava te mate, e te aue, e te mii; e te mamae oki, e kore katoa ia; no te mea kua kore te au mea taito.”—Apokalupo 21:4.

Akapeea e Raukai ia Koe te Reira

E mea papu ka akakeuia toou ngakau e te au taputou a te Atua ra no runga i te oraanga ki roto i te ao ou no te tuatua tika. E i te mea te manako ra tetai papaki e e meitaki rava te reira akameitakianga no te akatupuia, kare ra te reira i meitaki rava no te aere mai mei ko mai i te rima o Tei Anga mai ia tatou ra.—Salamo 145:16; Mika 4:4.

Tera ra, e au umuumuanga etai no te akono me ko te ora ua atu tatou e tuatau ua atu ki roto i te Parataito te aere maira ki runga i te enua. Kua akaari mai a Iesu i tetai apinga maata, i te na ko anga i roto i tana pure ki te Atua: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.”—Ioane 17:3.

No reira me te anoano tika ra tatou kia ora ki roto i to te Atua ao ou, ka na mua tatou i te apii i to te Atua ra anoano e ka rave ei i te reira. No te mea ko te tika te reira e: “Te ngaro ke nei teianei ao, ma ta to reira katoa e anoano nei: ko tei akono ra i to te Atua ra anoano, e tika ia i te ora anga e tuatau ua atu,” kia rekareka mutu kore i te au akameitakianga te akamaringiia mai e Tei Anga aroa maira ia tatou.—1 Ioane 2:17.

Me kare i akakiteia atu te reira, te au taiku anga Pipiria katoatoa no roto mai i te Reo Kuki Airani, urianga 1888.