Pene 4
Kua Nui Inara Kare i Akaipoipoia
TEI roto a Maria i te toru o tona marama i te nui anga. Ka maara ia koe e i pou te tuanga mua o tona tuatau nui anga i ko ia Elisabeta ra, inara kua oki atu aia i teianei ki tona kainga i Nazareta. E roa poto ake kua kite puia tona tu i tona uaorai oire kainga. Tei roto tikai aia i tetai turanga taitaia!
I kino roaʼi te turanga no te mea kua momokoia a Maria kia riro ei vaine na te kamuta na Iosepha. E kua kite aia e, i raro ake i te Ture a te Atua ki to Iseraela, ko te vaine tei momokoia ra na tetai tangata mari ra kua akatika kia piri atu ki tetai tangata ke no te ainga ka peiiaia ki te toka kia mate. Akapeea aia me akakite atu i tona nui anga kia Iosepha?
I te mea e toru marama te aere anga o Maria, ka papu ia tatou e te inangaro ra a Iosepha kia aravei iaia. I to raua aravei anga penei kua akakite atu a Maria kiaia i te tuatua no tei tupu ra. Penei kua rave aia i te akataka meitaki atu e na te vaerua tapu o te Atua aia i nui ei. Inara, mei taau ka rauka ra kia tamanako, e apinga ngata roa teia no Iosepha kia irinaki.
Kua kite ra a Iosepha i te tu meitaki tikai o Maria. E e mea papu te inangaro ra aia iaia ma te akaperepere. Inara, noatu rai tana i akakite atu, te akaraanga tikai te to ra aia na tetai tangata. Tera ra, kare a Iosepha i anoano kia peiia aia ki te toka kia mate me kare kia aviriia e te au tangata. No reira kua manako aia kia kopae muna atu iaia ra. I taua tuatau ra, te manakoia ra nga tangata momokoia e mei te mea rai kua akaipoipoia, e te umuumuia ra te kopae anga ei akaoti atu i te momokoia anga.
I muri akera, ia Iosepha te akamanako ra i teia au tumu, kua moe aia. Kua mama atura te angera a Iehova na roto i te moemoea e kua na ko atura: “Auraka koe e mataku i te arataki mai i to vaine ia Maria ki o ou ra: no te Vaerua Tapu i nui ei aia. E tamaiti tana e anau, e ko Iesu te ingoa taau e tapa nona: e akaora oki aia i tona au tangata i ta ratou ara.”
I te ara ake anga a Iosepha, mei teaa ra tona akameitaki anga! Kare i taroaroa kua rave tikai aia i ta te angera i akaue atura. Kua rave atu aia ia Maria ki tona kainga. Ko teia angaanga nana i rave ra, te aite ra ki te akaipoipo anga, i te akakite anga e kua akamanaia te akaipoipo anga o Iosepha raua ko Maria. Inara kare a Iosepha i piri atu kia Maria no te ainga iaia e nui ra ia Iesu.
I na! Te teimaa ra a Maria i te tamaiti inara te tuku ra a Iosepha iaia ki runga i te atini. Te aere ra raua kiea, e eaa raua ka aere ei ia Maria te vaitata ra i te anau? Luka 1:39-41, 56; Mataio 1:18-25; Deuteronomi 22:23, 24.
▪ Eaa te tu o to Iosepha manako i te kiteanga e kua nui a Maria, e no teaa ra?
▪ Eaa ka raukai ia Iosepha i te kopae ia Maria noatu rai e kare raua i akaipoipoia ake?
▪ Eaa te angaanga i raveia ei akakite anga e kua akaipoipoia a Iosepha raua ko Maria?