Pene 19

Apiianga i Tetai Vaine Samaria

I TO ratou aere anga mei Iudea mai ki Galilea, kua na te tapere o Samaria mai a Iesu ratou ko tana au pipi ra. No te roiroi i te aere anga, i te avatea kua tapu ratou e akaangaroi i te pae o tetai ruavai i vaitata i te oire ko Sikara. Na Iakoba i ko taua ruavai ra i te au anere mataiti i mua akera, e te vaira te reira e tae roa mai ki teia tuatau, i vaitata i te oire ou o Nablus.

Ia Iesu i noo ei i reira, kua aere atura tana au pipi ki te oire e oko i te manga. I te aere mai anga tetai vaine Samaria e uti i te vai, kua karanga atura aia: “Ka o mai ana e inu.”

Kare e pirianga i rotopu i te ngati Iuda e to Samaria no te manako patoi i roto ia ratou. No reira no te poitirere, kua karanga atu taua vaine ra: “Eaa ua koe, te ngati Iuda na, i pati mai ei iaku i te vaine Samaria nei i te vai?”

Kua karanga atura a Iesu: “Naringa koe i kite ana . . . e tei karanga atu koe na e, Ka o mai na e inu; kua pati mai ïa koe iaia, e kua oronga aia i te vai ora naau.”

Kua tuatua maira taua vaine ra: “E te Atu, kare aau apinga e uti ei, e rua oonu teia; eiea taau vai ora e raukaʼi? E maata ainei koe ia Iakoba i to matou metua, ko tei oronga mai na matou i teianei ruavai, e kua inu aia uaorai, e tana au tamariki, e te au puaka?”

“Ko te inu i tenana vai, ka kaki akaou ïa,” ko ta Iesu i pau atu. “Kareka te ka inu i te vai e orongaia atu e au nei, kare rava atura aia e kaki akaou; ka riro ra taua vai e orongaia atu e au nana ra, ei vai pupui ua i roto iaia, e tika i te pupui anga, e tae ua atu ki te ora mutu kore ra.”

Kua karanga atura taua vaine ra: “E te Atu, ka o mai ana i taua vai ra naku, kia kore au e kaki akaou, kia kore oki e aere mai i ko nei e uti.”

Kua karanga atura a Iesu kiaia, “Ka aere, ka tiki i to tane, ka oki mai ei.”

Kua tuatua maira aia: “Kare aku tane.”

Kua akatika atura a Iesu i tana tuatua anga. “E tika taau i tuatua maira e, Kare aku tane: Ka toko rima akenei oki aau tane, e tenana taau e moe ana, kare ïa te tane naau.”

“E te Atu, e peroveta koe,” ta taua vaine ia i tuatua ma te umere. I te akakiteanga i tona manako i te pae vaerua, kua karanga aia e ko to Samaria e “akamori ana . . . ki runga i teianei maunga [i Gerezima, i te pae maira]; e te karanga nei kotou [te ngati Iuda] e, tei Ierusalema te ngai e tikaʼi kia akamori.”

Inara, kare ko te ngai akamori te mea maata, ta Iesu ia i akakite atu. “Kua vaitata . . . oki taua ora ra,” e nana ei, “e akamori ei i te Metua te aronga akamori tika ra, ma te vaerua e te tuatua-mou: ko te tu ïa o te tangata akamori ta te Metua e anoano ra. E Vaerua te Atua, e te aronga e akamori iaia ra, kia akamori ma te vaerua e te tuatua-mou ra e tikaʼi.”

Kua oonu te manako anga o taua vaine ra. “Kua kite au e, te aere maira te Mesia, ko te Akatainuia ra ïa: kia riro mai aia ra, nana e akakite mai kia matou i te au mea ravarai,” ko tana ia i tuatua mai.

Kua akakite atura a Iesu: “Ko au ïa e karanga atu kia koe na.” E tamanako ana i te reira! Ko teia vaine tei aere maira i te avatea tikai e uti vai, penei kia kore aia e aravei atu i te au vaine o tona oire te akara akavaavaa ra iaia no tona tu oraanga, kua akaperepereia aia e Iesu ra na te mataara meitaki roa. Kua akakite tika tika atura aia kiaia i tana kare ra i aaki atea ana ki tetai ke atura. Eaa ra tei tupu mai?

E Manganui to Samaria i Akarongo

I te oki anga mai te au pipi ma te manga mei Sikara maira, kua kite atura ratou ia Iesu i te ruavai a Iakoba ra te ngai i akaruke maira ratou iaia, e te tuatua ra aia i reira ma tetai vaine Samaria. I te taenga mai te au pipi, kua aere atu taua vaine ra, vaio ua iora ra i tana ariki vai, aere atura ki roto i te oire.

I te oonu o tona manako anga i te au apinga ta Iesu i tuatua atu kiaia ra, kua karanga atura aia ki te au tangata o te oire ra: “Ka aere mai, ka akara i te tangata i akakite mai kiaku i taku au peu katoa nei.” Ei reira, na te tu akakeu i te kimi anga manako, kua ui atura aia: “Kare ainei tera ake te Mesia?” Kua tupu te akakoroanga a te reira uianga​—⁠kua aere atura te au tangata kia kite ratou uaorai.

I reira, kua raurau atura te au pipi ia Iesu kia kai i te manga ta ratou i rave mai no te oire ra. Inara kua tuatua maira aia kia ratou: “E kai taku kia kai, kare ua kotou i kite.”

“I apai mai ainei te tangata i te kai nana?” kua tuatua iora te aronga pipi ia ratou uaorai. Kua akataka atura a Iesu: “Teia taku kai, ko te akono i tona anoano, to tei tono mai iaku ra, ma te akaoti i tana angaanga. Kare kotou i karanga e, e a marama toe e mou ei?” Inara, i te tou atu anga ki te mou i te pae vaerua ra, kua na ko atura a Iesu: “Ka akateitei i to kotou mata, ka akara i te au koro ra; kua teatea ïa i teianei kua mou. Te tangata e kokoti ra, e tutaki tana, e kua akaputu i te meitaki no te ora mutu kore: kia rekareka kapipiti, ko te ruru e ko te kokoti.”

Penei kua kite ke ana a Iesu i te tupu anga meitaki no tana tuatua anga ma taua vaine Samaria ra​—⁠e e manganui te tuku ra i to ratou akarongo kiaia no te akakiteanga a taua vaine ra. Te akakitekite ra aia ki te au tangata o te oire, ma te na ko anga: “Kua akakite mai aia kiaku i taku au peu katoa ra.” E no reira, i te aere anga mai te au tangata o Sikara kiaia i te ruavai ra, kua tapu ratou iaia kia noo mai e tuatua ua atu kia ratou. Kua ariki a Iesu i ta ratou patianga e kua noo iora aia i reira e rua ra.

I te akarongo anga to Samaria ra kia Iesu, e manganui atu tei irinaki. Kua tuatua akera ki taua vaine ra: “Kare no te tuatua aau i tuatua maira, i akarongo atu ei matou: kite ua akenei matou iaia uaorai, kua kite atura matou e, ko te ora mou teia o to te ao.” E tika tikai kua oronga mai taua vaine Samaria ra i te akaraanga meitaki e akapeea ka raukai ia tatou i te akakitekite anga no te Mesia ra na te akakeuanga i te kimi anga manako kia maata atu te kimi anga a te aronga te akarongo maira!

E manako ana e a marama toe i mua ake i te mou ra​—⁠penei ko te mou kerite, te raveia ra i Paretaina i te tuatau tupu anga rau. E no reira i teianei ko Noema me kare ko Titema. Tera te aite anga i muri ake i te Pasa o te 30 T.N., i noo a Iesu e tana au pipi no nga varu marama ki Iudea i te apiianga e te papetitoanga. Kua akaruke atu ratou i teianei no to ratou kainga enua i Galilea. Eaa te tapapa maira ia ratou i reira? Ioane 4:​3-43.

▪ Eaa te vaine Samaria i poitirere ei i to Iesu tuatua anga kiaia?

▪ Eaa ta Iesu i apii atu iaia no runga i te vai ora e i te ngai no te akamori anga?

▪ I akapeea ta Iesu akakite anga kiaia e koai aia, e eaa i riro ei te reira akakite anga ei mea umere roa?

▪ Eaa te akakitekite anga ta taua vaine Samaria ra i rave e eaa te tupu anga?

▪ Akapeea te piri anga o ta Iesu kai ki te mou?

▪ Akapeea ka raukai ia tatou te akataka te roa o ta Iesu angaanga orometua ki Iudea i muri ake i te Pasa o te 30 T.N.?