Pene 26

I te Kainga i Kaperenauma

I TEIANEI kua mamao e te atea te totoa anga i te rongonui o Iesu, e e manganui te au tangata tei aere ki te au ngai i noo ei aia i vao ke atura. I etai ra i muri akera, kua oki mai aia ki Kaperenauma i vaitata i te Tai o Galilea ra. E viviki ua te totoa aere te rongo ki te oire katoa e kua tae mai aia ki te kainga, e e manganui tei aere mai ki te are i noo ei aia. Te au Pharisea e te au puapii o te Ture kua aere mai no te ngai mamao atu mei ia Ierusalema rai.

No te maata i te tangata i reira kua akapiriia atu ratou ki te ara o te ngutupa, e kare e ngai no etai e o atu ei ki roto. Kua papa te reira ngai no tetai tupuanga umere roa. Tei tupu i te reira atianga e mea puapinga maata, no te mea te tauturu ra ia tatou kia ariki e e mana to Iesu no te takore atu i te tumu no te mamaeanga o te tangata e kia akaora i te aronga katoatoa tana ka iki.

Ia Iesu e ako ra i taua aronga tini ra, te apaiia maira tetai tangata akangoru i runga i te roi e nga tangata toko a. Te anoano ra ratou kia akaora a Iesu i to ratou oa, inara no te rai o te tangata, kare ratou i o atu ki roto. Mei teaa ra te mareka kore! Tera ra kare ratou i akaoti ua. Kua kake ratou ki runga i te tapoki o te are e kua uaki akera i te reira, e kua tuku maira i te roi ma te tangata akangoru ra i rungao e vaio maira ki raro i te pae ia Iesu.

Kua riri ainei a Iesu no teia tamanata anga? Kare rava ia! Mari ra, kua manako oonu aia i to ratou akarongo. Kua tuatua atura aia ki taua akangoru ra: “Kua akakoreia taau ara.” Inara ka rauka ainei ia Iesu i te akakore tikai i te ara? Kare te au tata tuatua e te au Pharisea e manako e ka rauka. Te uriuri ra i roto i to ratou ngakau: “Eaa teianei tangata i akapera i te akakino Atua? E matara oki te ara iaai mari ra i te Atua a[n]ake ra?”

I te kiteanga i to ratou manako, kua karanga atura a Iesu kia ratou: “Eaa kotou i eumiumi uaʼi i taua au mea nei i roto i to kotou ngakau? Teea te mea rave ngoie, ko te tuatua ainei ki te akangoru nei e, Kua matara taau ara; e ko te tuatua aina, Ka tu ki runga, ka rave i to roi, ka aere?”

I reira, kua tuku a Iesu kia kite taua aronga tini ra, kapiti katoa te aronga akaapa ra iaia, i tetai akakiteanga umere roa te ka akaari e e mana tona no te akakore i te ara i te enua nei e koia tikai te tangata maata rava tei ora ki konei. Kua ariu atura aia ki te akangoru ra e kua akaue atura: “Ka tu, ka rave i to roi, ka aere ki toou ngutuare.” Kua rave ua aia i te reira, e kua aere atu ki vao ma tona roi i mua ia ratou katoa ra! No te poitirere kua akakaka te au tangata ra i te Atua e kua karanga: “Teia ua nei rai i kiteaʼi e matou teianei ravenga”!

I kite ainei koe e kua taiku kapiti atu a Iesu i te ara ma te maki e ko te akakore anga i te ara te piri atura ki te raukaanga te ora meitaki? Te akataka mai ra te Puka Tapu e ko to tatou metua mua, ko Adamu, kua rave i te ara e kua akatuangaia tatou katoatoa i te utunga no te reira ara, koia oki te maki e te mate katoa. Inara i raro ake i te tutara o te Patireia o te Atua ra, ka akakore atu a Iesu i te ara a te aronga katoa tei inangaro i te Atua ra e te ka tavini atu Iaia, ei reira e takoreia atu ei te au maki katoa. Mei teaa ra te meitaki o te reira! Mareko 2:​1-12; Luka 5:​17-26; Mataio 9:​1-8; Roma 5:​12, 17-19.

▪ Eaa te akanooanga no tetai tupuanga umere tikai ra?

▪ I akapeea te akangoru i tae ei kia Iesu?

▪ Eaa ra tatou katoatoa i tu ei i te ara, inara akapeea ta Iesu oronga mai anga i te manakonakoanga e ka rauka te akakore anga i ta tatou ara e ka rauka oki te ora meitaki?