Pene 96

A Iesu e te Tutara Apinganui Ou Ra

I TO Iesu aere atu anga ki Ierusalema na roto i te tapere o Perea ra, kua oro maira tetai tangata ou, e kua tuku iora i tona nga turi ki mua iaia. Kua karangaia te reira tangata e e tutara, penei te aiteanga e e turanga maata tona i roto i te sunago i reira me kare penei e mema aia no te Sunederi. Pera katoa, e tangata apinganui aia. Kua ui atura aia, “E te Orometua meitaki, e akapeea au nei e raukaʼi iaku te ora mutu kore?”

“Eaa koe i akameitaki mai ei iaku?” Ta Iesu i pau atu. “Ko te Atua anake ra te meitaki.” Penei te taiku atura te reira tangata ou i te tuatua e “meitaki” ei taoonga, no reira kua akakite atu a Iesu kiaia e ko te reira taoonga no te Atua anake ia.

Inara, e na Iesu ei, “kia inangaro ra koe kia rauka te ora, e akono koe i te au ture.”

Kua ui maira te reira tangata, “I teea?”

Kua taiku atura a Iesu i e rima o te Ture Ngauru ra: “Auraka koe e ta ua, Auraka koe e akaturi, Auraka koe e keia, Auraka koe kia riro ei kite pikikaa, E akangateitei i to metua tane, e to metua vaine.” E kua kapiti katoa atu i tetai akauenga maata roa atu, kua na ko atura Iesu: “E aroa atu i to tangata tupu mei te aroa ia koe uaorai.”

“Kua ope te reira i te akonoia e au, mei toku ou anga mai,” te pau anga ia a te reira tangata ma te ngakau tae tikai. “Eaa ua te toe iaku?”

I te akarongo atu anga ki te pati akatenga a te reira tangata, kua aroa atura a Iesu kiaia. Inara kua kite a Iesu i tona manako maata no tana au apinga, e kua tou atu ki tei anoanoia nona ra: “Te toe nei rai tetai mea ia koe; ka aere ka oko i taau apinga, ka apai atu ei na te putaua; e apinga taau i reira i te rangi; ka aere mai ei ka aru mai iaku.”

Kare e ekoko anga e, kua akara atu a Iesu ma te tangi, i te tu anga te reira tangata ki runga e kua ariu ke atu ma te mii oonu. Na tona au apinga i akamatapo iaia ki te puapinga o te apinga mou ra. Kua tuatua tangi a Iesu, “te akao ngata o te aronga apinga nui ki roto i te basileia o te Atua e!”

Kua va ua iora te au pipi i taua tuatua na Iesu ra. Inara kua tere atu to ratou poitirere i tana tuatua ua atu anga i tetai tika tei matauia: “E akao ngoie ake te kamela na roto i te puta nira, i te tangata apinga nui kia akao ki roto i te basileia o te Atua ra.”

“Koai oki te ka ora?” kua anoano te au pipi kia kite ratou.

Kua pau atura a Iesu, ma te akara anga tika atu kia ratou ra: “Kare ïa e tika i te tangata nei; e tika ra te au mea katoa i te Atua.”

I te kite anga e e tuke roa ta ratou ikianga i ta te tangata ou tutara apinga nui ra, kua tuatua maira Petero: “I na matou, kua akaruke matou i te au mea katoa, e kua aru mai ia koe.” E kua ui atura: “Eaa te ka rauka ia matou?”

“Kia tae i te anga akaou anga ra,” ta Iesu i taputou atu, “kia noo te Tamaiti a te tangata ki runga i tona terono kakā, e noo katoa kotou, ko tei aru mai iaku, ki runga i te terono raungauru e rua ara, i te akava anga i te au kopu o Iseraela raungauru e rua ara.” Ae, te akaari atura a Iesu e e anga akaou anga tetai no te au tu ki runga i te enua nei kia riro te au mea kia aite atu ki te tu i te kainga i Edene ra. E ka rauka ia Petero ratou ko etai katoa atu pipi ra te tutaki i te tutara anga ma te Mesia ki runga ake ia Parataito o te enua katoa. E tika rava, e mea puapinga te tuku atinga no te reira tu tutaki meitaki.

Inara, noatu i teianei te vaira te au tutaki, mei ta Iesu i tuatua ngaueue kore maira: “Kare e tangata i akaruke i te are, e te au taeake, e te au tuaine, e te metua tane, e te metua vaine, e te vaine, e te tamariki e te kainga, noku, e no te evangelia nei, E kore ei e rauka iaia e anere ua atu, i teianei ao, te are, te taeake, e te tuaine, te metua vaine, e te tamariki, e te kainga oki, ma te takinga kinoia, e i te ao a muri nei, ko te ora mutu kore ïa.”

Mei ta Iesu i taputou maira, noatu i teea ngai i teianei ao e aere ei tana au pipi, ka rekareka ratou i te pirianga ma te au Kerititiano tei piri vaitata atu e tei meitaki atu i te au mema no te ngutuare tangata tikai. Kua ngere te tangata ou tutara ra ma te apinga nui i teia tutaki e pera katoa i te ora mutukore i roto i te Patireia o te Atua i te rangi ra.

I muri akera kua kapitiia atu e Iesu: “To mua e manganui ra e riro no muri; e to muri ra, e riro ïa no mua.” Eaa te aiteanga o tana tuatua ra?

Ko teia te aiteanga o tana tuatua e manganui te au tangata “no mua” ratou i te rekareka anga i te au ravenga akonoanga atua, mei tera tangata ou tutara apinga nui ra, kare e tomo i te Patereia. Ka riro ratou “no muri.” Inara e manganui, te kapiti katoa anga te au pipi taakaaka a Iesu ra, tei akara aviriia ra e te au Pharisea manako ra e ko ratou e tuatua tika, ko te au pipi “no muri”​—⁠e au tangata no te enua, me kare ‘am ha·’aʹrets⁠—​ka riro ko ratou “no mua.” To ratou riro anga “no mua” ka tau e ka rauka ia ratou te tika kia tutara kapiti atu ma te Mesia ra i te Patireia. Mareko 10:​17-31; Mataio 19:​16-30; Luka 18:​18-30.

▪ I te akara anga, eaa ta te tangata ou apinga nui ra i tutara ana?

▪ Eaa ra a Iesu i koreʼi i akatika kia karangaia aia e meitaki?

▪ Akapeea te akakite anga a tei akatutuia maira no tei tupu ki te tutara ou ra i te kino o te apinga nui?

▪ Eaa te tutaki ta Iesu i taputou ki tana au pipi?

▪ Akapeea e riro ei to mua e no muri, e to muri no mua ia?