Pene 103

Aere Akaou Anga ki te Iero

KOI pou ua akera te po toru o Iesu e tana au pipi ki Betania i muri ake i te taenga atu mei Ieriko atura. I te mamaiata o te popongi o te Monite, Nisana 10, kua akamata ke ana ratou i te aere na te arataa ki Ierusalema. Kua pongi a Iesu. Akara akera aia i tetai tuke e rau tona, aere atura aia ki taua tuke ra kia akara me e kai to runga.

E viviki tikai te rau i te tupu no te reira tuatau, no te mea ko te tuatau no te tuke kia tae roa kia Tiunu, e i teianei ko te au ra openga ua o Mati. Inara, kua manako a Iesu e i te mea kua viviki te tupu anga tona rau, penei ka viviki katoa tona ua. Inara kua mareka kore aia. Kua oronga te rau i te akara anga pikikaa. Kua taumaa atura a Iesu i te reira tuke, i te na ko anga: “Auraka e tangata e kai akaou atu i te kai no rungao ia koe na e tuatau ua atu.” I roto i te makatini te ka aru mai i teia, ka inangaro tatou kia kite eaa tei tupu i ta Iesu taumaa anga i te reira tuke e eaa oki te aite anga puapinga maata o te reira.

I te aere ua atu anga, kare i roa ana kua tae atu a Iesu e tana au pipi ki Ierusalema. Kua aere atura aia ki te iero, tana i tutaka ra i te aiai avatea i mua akera. Inara, i teia ra, kua rave aia i te angaanga, mei tana i rave e toru mataiti i mua akera, i tona aere atu anga ki te Pasa i te 30 T.N. Kua tuaru atura ki vao te aronga i oko atura e oko maira i roto i te iero ra, tatipoki atura i te au papa a te aronga oko moni ra, e te au nooanga o te aronga i oko i te kukupa ra. Kare rava aia i tuku i te tangata kia apai i te kapu ariki na roto i te iero ra.

I te akaapa anga i taua aronga oko moni ra e te oko manu ra i roto i te iero, kua na ko atura aia: “Kare aina kua tataia e, ‘Toku nei are, e karangaia ïa e are pure no te pa enua ravarai?’ Kua akariroia io nei ra e kotou ‘e ana no te aronga keia ra.’ ” E aronga keia tikai ratou no te mea kua pati ratou i te tutaki maata mei te aronga e mea ngiti ua te ka rauka ia ratou kia rave ke mari ra kia oko mai i ta ratou au manu te anoanoia ra ei atinga. No reira i ta Iesu akara anga ko te reira au ravenga e morimori apinga me kare e keia.

I te rongo anga te kau taunga nunui, te au tata tuatua e te aronga mana o te iti tangata ra e eaa ta Iesu i rave, kua kimi akaou ratou i te ravenga no te tamate anga iaia. Kua akapapu maira ratou e kare o ratou taui anga kia meitaki mai. Tera ra kare ratou i kite e akapeea a Iesu e mate ei, i te mea te mou ra te au tangata katoa iaia kia akarongorongo kiaia ra.

Kapiti katoa i te au ngati Iuda, kua aere katoa atu oki te au Etene ki taua Pasa ra. E aronga teia tei taui i to ratou akarongo, tera te aite anga kua taui atu ratou ki te akonoanga o te ngati Iuda. E aronga Ereni etai, penei e aronga tei taui i to ratou akarongo, kua aravei atu ia Philipa e kua pati kia kite ratou ia Iesu. Kua aere atura a Philipa kia Anederea, penei e ui atu me e mea tau te reira aravei anga no ratou. Te vaira a Iesu i te iero i reira, te ngai ia e tau ei no te au Ereni kia kite atu iaia ra.

Kua kite a Iesu e e tokoiti ua nga ra toe no tona oraanga, no reira kua akatutu meitaki atura aia i tona turanga: “Kua tae ki te ora e akakakāiaʼi te Tamaiti a te tangata nei. Tika, tika tikai taku e karanga atu kia kotou, Kia tukuia tetai ua sitona ki raro i te one, kia kore e mate ra, kua vai tai ua ïa; kia mate ra, kua maata atura ïa te uua anga.”

E mea ngiti ua te puapinga o te ua titona okotai. Inara, akapeea me ka tukuia ki roto i te one e ka “mate,” ei ma te akaope anga i tona oraanga ei ua? Ka tupu mai i reira ei rakau rikiriki e ka tupu mai e manganui, e manganui ua atu te ua titona. Mei te reira katoa oki, e okotai ua tangata apa kore ko Iesu ra. Inara me ka mate tiratiratu aia ki te Atua ra, ka riro aia ei tumu anga no te oronga anga ora mutu kore ki te aronga tiratiratu tei ia ratou taua tu vaerua tuku atinga ia ratou uaorai mei tona rai. No reira, kua karanga a Iesu: “Ko tei anoano ua ki tona ora, ka ngere ïa i te ora: ko te kore e anoano i tona ora i teianei ao, ei ora mutu kore tona ra.”

E mea papu e kare a Iesu i manako ua ana nona uaorai, no te mea kua akataka maira aia: “Ko tei anoano ei tavini aia noku ra, ka aru mai ïa iaku; e te ngai taku e noo ra, ei reira katoa taku tavini; e kia tavini tetai tangata iaku ra, na toku Metua e o mai i tana [akangateitei, NW].” Mei teaa ra te meitaki i te reira tutaki no te aru anga ia Iesu e te tavini anga kiaia! Ko te tutaki ia koia te akangateiteiia e te Metua ra kia kapitiia atu ma te Mesia i roto i te Patireia ra.

I te tamanako anga i te mamae maata anga e te matenga mamae kino roa tei tapapa maira iaia, kua tuatua ua atura a Iesu: “Kua taitaia rava toku vaerua i teianei; e ka akapeea ra au? E taku Metua, ka akaora mai koe iaku i teianei ora.” Inara, kare, mei tana i tuatua maira e: “I aere mai ei ra au no teianei rai ora.” Te rotai ra to Iesu manako ki ta te Atua akanoonoo anga katoatoa, kapiti katoa oki tona uaorai matenga ei atinga. Mataio 21:​12, 13, 18, 19; Mareko 11:​12-18; Luka 19:​45-48; Ioane 12:​20-27.

▪ Eaa ra a Iesu i manako ei ka kitea te ua o te tuke noatu rai kare i tae te tuatau no te reira?

▪ Eaa ra a Iesu i karangaʼi e “keia” te aronga tei okooko ra i roto i te iero?

▪ Na teea tu a Iesu i aite ei ki te ua titona tei mate ra?

▪ Akapeea to Iesu manako ngakau no te mamae anga e te mate tei tapapa maira iaia ra?