Pene 105

Akamata Anga o Tetai Ra Puapinga Maata

I TO Iesu akaruke anga ia Ierusalema i te aiai Monite ra, kua oki akaou atura aia ki Betania i te tuanga o te itinga ra o te Maunga i Oliveta ra. E rua ra no tana angaanga orometua i Ierusalema tei oti ua akera. E kare e ekoko anga kua noo aia ki tona taeake kia Lazaro i taua po ra. Mei tona tae atu anga mei Ieriko ra i te Varaire, ko te po a ia iaia ki Betania.

I reira, i te popongi roa o te Ruirua, ia Nisana 11, tei runga akaou ratou ko tana au pipi i te mataara. Kua riro te reira ei ra puapinga maata no ta Iesu angaanga orometua, e maata tikai te angaanga. Ko te ra openga ia nona ki te iero ra. E ko te ra openga ia no tana angaanga i te ngai tangata i mua ake i tona timata anga e te tamate anga.

Kua aere ratou na taua mataara rai i te Maunga i Oliveta ra e aere atu ei ki Ierusalema. I te pae i taua mataara mei Betania maira, kua kite atura a Petero i te rakau ta Iesu i akakino ra i te popongi i mua akera. Kua karanga atura aia: “E te Orometua, i na, te suke taau i akakino ra, kua mae rava.”

Inara eaa a Iesu i tamate ei i te reira rakau? Kua akakite maira aia i te tumu i tana tuatua ua atu anga: “Koia mou taku e karanga atu kia kotou nei, Ei akarongo ekoko kore to kotou, kare tei raveia i teianei suke anake ra ta kotou e rave, kia karanga atura kotou ki teianei maunga [koia te Maunga i Oliveta te ngai ia ratou e tu ra], Kia kiritiia koe, e kia titiriia koe ki raro i te tai, e tika ïa: E te au mea katoa, ta kotou e pati atu i te pure, ma te akarongo, ka rauka ïa ia kotou.”

No reira, na te akariro anga kia mae te rakau ra, te oronga ra a Iesu i te apiianga akara mataia no tana au pipi kia kite i tei anoanoia no ratou kia akarongo i te Atua ra. Mei tana i tuatua atura: “E te au mea katoatoa, ta kotou e pati kia pure ra, kia manako e, e rauka taua au mea ra, kare ïa e kore i te rauka mai.” E apiianga meitaki te reira no ratou kia kite, no te akara atu anga i te au timataanga mataku te vaitata ra i te tupu. Inara, e tumu ke atu tetai no runga i te mae anga o te tuke ra e te tu o te akarongo.

Ko te iti tangata o Iseraela ra, mei te reira tuke rai, e akaraanga pikikaa ua tona. Noatu rai ko te reira iti tangata e pirianga koreromotu to ratou ma te Atua ra e ko te akara anga i vao ua te akono ra i tana au ture, kua akapapuia e kare e akarongo, kare e ua meitaki. No te kore e akarongo, te akono ra i te kopae anga i te Tamaiti a te Atua uaorai! No reira, na te akariro anga i te tuke uua kore ra kia mae, te akakite maira a Iesu e eaa te openga no te reira iti tangata kare ra ona ua, e kare katoa oki e akarongo.

I muri poto akera, kua tae atu a Iesu e tana au pipi ki Ierusalema, e mei ta ratou e matau ana, kua aere atura ratou ki te iero, kua akamata a Iesu i te ako. Kare e ekoko anga te vai ra te manako anga o te kau taunga nunui e te aronga pakari o te iti tangata ra no ta Iesu i rave i te ra i mua akera i te tuaru anga i te aronga okooko moni, e kua akaao atura ratou iaia: “Koai te tumu i rave ei koe i teianei au mea? e naai i oronga mai i te mana ia koe?”

Kua karanga atura a Iesu: “E ui katoa anga taku ia kotou e, kia akakite mai kotou kiaku, e akakite katoa atu au kia kotou i te tumu i rave ei au i taua au mea nei. Noea te bapetizo a Ioane nei? No te rangi mai aina? e na te tangata aina?”

Kua eumiumi iora te kau taunga e te aronga pakari i rotopu ia ratou uaorai e eaa ta ratou ka pau. “Kia karanga atu tatou, No te rangi mai; e riro aia i te tuatua mai, Eaa iora kotou i kore ei i akarongo iaia? E kia tuatua oki tatou, Na te tangata; te mataku nei tatou i te tangata; te manako ra te tangata katoa e, e perovetā Ioane.”

Kare te au arataki i kite eaa ta ratou ka pau atu. No reira kua karanga maira ratou kia Iesu e: “Kare matou i kite.”

Kua karanga atura a Iesu: “Kare katoa au e akakite atu kia kotou i te tumu i rave ei au i taua au mea nei.” Mataio 21:​19-27; Mareko 11:​19-33; Luka 20:​1-8.

▪ Eaa i puapinga maataʼi te Ruirua, Nisana 11 ra?

▪ Eaa nga apiianga ta Iesu i oronga i tana akariro anga kia mae te tuke ra?

▪ Akapeea ta Iesu pau anga i te aronga tei ui ra e noea mai te mana i rave ei aia i te au mea tana i rave ra?