Pene 106

Na te Akatutuanga i te Kainga Vine te Akakite Angaia

TEI te iero a Iesu. Koi oripu ua ake ra te manako o te au arataki akonoanga atua iaia, no ta ratou pati anga kia akakite atu a Iesu e noai te tika i rave ei aia i taua au mea ra. I mua ake i te kore anga to ratou manako oripu ua, kua ui atura a Iesu: “Eaa ra to kotou manako?” E i reira na tetai akatutuanga, kua akakite atu aia e eaa tikai to ratou tu.

“Ko tetai tangata toko rua ana puke tamariki tamaroa,” e na Iesu ei. “Kua aere atura aia ki te tama mua, e kua karanga atura, E tama, ka aere koe akonei e angaanga ki roto i taku kainga vine. Kua tuatua maira aia, na ko maira, [E aere au, e taku pu; e kare i tae]. Aere katoa atura aia ki te teina, e kua akapera katoa atura. Kua tuatua maira aia, na ko maira, [Kare au e ano: e muri ake, tataraara iora, aere atura]. Koai ia raua i akono i te inangaro o to raua metua ra?” Ta Iesu ia i ui atu.

“Ko te rua o tana tama,” ta te aronga patoi iaia ra i pau mai.

Kua akataka maira a Iesu: “Koia mou taku e karanga atu kia kotou, Ko te au telona, e te au vaine akaturi, te ka o ana ki roto i te basileia o te Atua ra na mua ia kotou.” I te akamata anga ko te au terona e te au vaine akaturi kare i akatikaia kia tavini i te Atua ra. Inara, mei te rua o nga tama ra, kua tataraara ratou e kua tavini atura iaia. I tetai pae, ko te au arataki akonoanga atua, mei te tama mua ra, tei karanga e te tavini ra i te Atua, inara, mei ta Iesu i akakite maira: “I aere mai oki a Ioane [Papetito] ia kotou nei ma te tuatua-tika, e kare akenei kotou i akarongo atu iaia; te aronga telona ra, e te au vaine akaturi, kua akarongo ratou iaia: kotou ra, kite ua rai i te reira, kare kotou i tataraara, ka akarongo atu ei iaia.”

Kua akaari atura a Iesu e ko te tarevake o taua aronga arataki o te akonoanga atua ra, kare ko te kore anake e tavini i te Atua. Kare, mari ra e aronga rave kino tikai ratou ra. Kua akakite katoa maira a Iesu: “Kua tanu tetai tangata kainga i te kainga vine, kua akapini ki te koro, ko iora i te taomianga vine i roto, akatu iora i te are tapapa anga, tuku atura ki te aronga unga, aere atura ki te enua mamao: E vaitata akera te tuatau vine ra, kua tono maira aia i tona au tavini ki te aronga unga ra, kia o mai ratou i te kai o te reira ra. Kua opu iora te aronga unga i te au tavini nona ra, kua pāpā iora i tetai, kua tamate rava i tetai, kua peî oki tetai ki te toka. Kua tono akaou maira oki aia i tetai aronga tavini ke, e rai ïa i tei muatangana; e kua akapera katoaia ratou.”

Ko te “au tavini” ko te au peroveta ratou ta te “tangata kainga” koia te Atua ko Iehova ra, tana i tono atu ki te “aronga unga” i tana “kainga vine” ra. Ko teia “aronga unga” ko te ui rangatira ratou o te iti tangata Iseraela ra, ko ratou te iti tangata ta te Puka Tapu i akataka maira e ko te “kainga vine” ia a te Atua.

I te mea e kua takinokino e kua ta te “aronga unga” ra i te “au tavini,” kua akataka maira a Iesu: “E i te openga iora, kua tono atura aia [te pu o te kainga vine ra,] i tana uaorai tamaiti, na ko akera, Ka riro ratou i te oo mai i taku tamaiti. Kia akara maira te aronga unga i te tamaiti, kua tuatua iora ratou ratou uaorai, Ko te tangata [tuanga] kainga teia: e aere mai, ka ta tatou iaia, ka tāpu ei i tona kainga. Kua opu maira ratou iaia, kika atura ki vao i taua kainga vine ra, tamate rava atura iaia.”

Ei reira, i te tuatuaanga ki te au arataki akonoanga atua ra, kua ui atura a Iesu: “E kia aere maira te pu o taua kainga vine ra, ka akapeea maira aia i taua aronga unga ra?”

“Kua na ko maira ratou,” koia te au arataki o te akonoanga atua ra, “e tamate rava aia i te reira aronga tangata kikino i te mate maata rava, ka tuku atu ei i te kainga vine ki tetai aronga unga ke, te ka apai mai iaia i te kai i te tuatau tikai.”

Kua tuku kite kore ua ratou i te akavaanga no ratou uaorai, no te mea te kapitiia ra ratou ki roto i taua “aronga unga” ra o Iseraela i ta Iehova “kainga vine” o te iti tangata Iseraela ra. Ko te ua ta Iehova e tapapa atura mei taua aronga unga ra ko te akarongo ia i tana Tamaiti, koia te Mesia mou ra. No to ratou kore i oronga mai i te reira au ua, kua akamatakite atura a Iesu: “Kare kotou i tatau i tei tataia ra [ia Salamo 118:​22, 23] e, ‘Ko te toka i akarukeia e te aronga patu are ra, ko tei akariroia ei toka tiavā: na te Atu na Iehova teia i rave, e te akara atu nei tatou ma te umere’? E teianei, e karanga atu au kia kotou, E apai keia te basileia o te Atua nei ia kotou, e tukuia atu ki te aronga e akaua mai i te ua ra. Ko te inga ki rungao i taua toka ra, e paruparu ïa; kareka te topaia e taua toka ra, e ungaungātiti rava ïa.”

Ei reira kua kite te au tata tuatua e te kau taunga maata e te tuatua ra a Iesu no ratou, e kua umuumu ratou e ta iaia, koia te ‘tangata tuanga’ tikai. No reira ko te taoonga ei tutara i te Patireia o te Atua kua rave keia atu mei ia ratou ei iti tangata, e ka angaia e iti tangata ou ei ‘aronga unga i te kainga vine ra,’ ko te ka akatupu mai i te ua tau ra.

No te mataku i te au arataki o te akonoanga atua i te aronga tini, tei manako ra ia Iesu e e peroveta, kare ratou i tauta e tamate iaia i te reira atianga. Mataio 21:​28-46; Mareko 12:​1-12; Luka 20:​9-19; Isaia 5:​1-7.

▪ Koai ma tei akatutuia maira e nga tamaroa e rua i ta Iesu akatutuanga mua ra?

▪ I te rua o te akatutuanga, koai ma te akatutuia maira e te “tangata kainga,” te “kainga vine,” te “aronga unga” ra, te “au tavini” e ‘te tangata tuanga’?

▪ Eaa te ka tupu ki te ‘aronga unga o te kainga vine ra,’ e naai e mono ia ratou?