Pene 107

Akatutuanga o te Oroa Akaipoipoanga

NA NGA akatutuanga e rua, ta Iesu akakite anga i te apa o te au tata tuatua e te aronga kau taunga maata ra, e kua umuumu ratou e ta iaia. Inara kare takiri i oti ake ta Iesu akono anga ia ratou. Kua rave atura aia i te akakite i tetai atu akatutuanga, i te na ko anga:

“E tau te patireia o te au rangi ra ki tetai tangata, e ariki, tei akono i tetai oroa akaipoipoanga no tana tamaiti. E kua tono atura i tona au tavini e kapiki i te aronga tei patiia ra kia aere mai ki te oroa akaipoipoanga, e kare ratou i inangaro i te aere mai.”​—NW.

Ko te Atua ko Iehova taua Ariki tei akapapa ra i te oroa akaipoipoanga no tana Tamaiti, koia Iesu Mesia. Kia tae te tuatau, ka taokotaiia atu te vaine akaipoipo ou e 144,000 au pipi akatainuia ma Iesu katoa ki te rangi. Ko te aronga i raro ake i te Ariki ra ko te iti tangata Iseraela ia, ko ratou tei kapitiia maira ki roto i te Ture koreromotu i te 1513 M.T.N., kua rauka ia ratou te tika kia riro “ei basileia taunga.” No reira, i te reira atianga, ko ratou te aronga mua tei orongaia te patianga kia aere ki te oroa akaipoipoanga.

Inara, ko te kapiki anga mua ki te aronga tei patiia ra kare i raveia e tae roa mai ki te tuanga openga o te 29 T.N., i to Iesu e tana au pipi (koia te au tavini o te ariki) akamata anga i ta ratou angaanga tutuanga i te Patireia. Inara ko te ngati Iseraela kopapa tei rauka ra ia ratou teia patianga i orongaia atu e te au tavini mei te 29 T.N. ki te 33 T.N. kare ratou i keu i te aere. E kua oronga akaou atura te Atua i tetai atu tuatau no taua iti tangata tei patiia ra, mei ta Iesu i tuatua ra:

“Kua akaunga akaou atu rai aia i tetai aronga tavini ke, na ko atura, E karanga atu ki te aronga i karangaia ra, I na, taku nei kaingakai kua vave, e taku puakatoro, e taku aronga puaka angai, kua koia, kua vave roa: ka aere mai ki te oroa akaipoipoanga.” Ko te rua teia e ko te kapiki anga openga no taua aronga i patiia ra kua akamataia ia Penetekote 33 T.N., i te riringi anga i te vaerua tapu ki rungao i ta Iesu au pipi ra. Kua raveia te reira e tae roa ki te 36 T.N.

Inara ko te tuanga maata o to Iseraela kua kopae ke i te reira patianga. Kua karanga a Iesu e: “Kare ra ratou i akono mai, aere ke atura i to ratou aerenga, tetai ki tona kainga, tetai ki tona oko anga: Opu maira tetai papaki i taua aronga tavini ra, kua takinga-kino maira, e kua tamate rava atura.” Kua karanga katoa a Iesu e: “Kia kite ra taua ariki ra, riri rava akera; tono atura i te au nuku toa nona, e ta takiri rava atura i taua aronga ta tangata ra, e taʼu atura i to ratou oire ki te ai.” Kua tupu te reira i te 70 T.N., i to Ierusalema akapururu angaia ki te enua e to Roma ra, e kua tamate ravaia taua aronga ta tangata ra.

Kua akataka maira a Iesu i reira e eaa tei tupu: “Kua karanga atura aia [te ariki] ki te au tavini nona ra, Kua vave rava te oroa akaipoipoanga nei, kare ra e tau te aronga i karangaia ra. E teianei, ka aere kotou ki te au ara metua, e te aronga katoa i kitea ia kotou, e karanga atu, e aere mai ki te oroa akaipoipoanga.” Kua rave te au tavini i te reira, e “ki akera taua oroa akaipoipoanga ra i te manuiri.”

Ko teia angaanga akaputuanga i te manuiri no te au ara metua i vao mai i te oire o te aronga tei karangaia ra kua akamataia i te 36 T.N. Ko te rangatira vaeau o Roma ko Korenelio e tona ngutuare te aronga mua e etene, kare i peritomeia tei akaputuia maira. Kua rave tamouia te reira akaputuanga i teia aronga etene, tae roa mai ki teia 20 anere mataiti nei ko ratou te au mono no te aronga tei kopae ra i te karanga anga i mua ana.

No te tuatau o te 20 anere mataiti nei i ki ei te ngai no te oroa akaipoipoanga. Kua akakite maira a Iesu i tei tupu i reira, i te na ko anga: “E kia aere maira taua ariki ra ki roto, kia akara i te manuiri, kite iora aia i tetai tangata kare ona kakau akaipoipoanga: Kua karanga atura aia kiaia, E tama, eaa koe i tae mai ei i ko nei, e kare e kakau akaipoipoanga? Kua muteki atura aia. Kua karanga atura taua ariki ra ki te au tavini, Ka ri iaia te rima e te vaevae, ka rave ke atu iaia, opara atu ei ki vao i te poiri: tei reira te aue, e te pakati anga nio.”

Te akatutu maira te reira tangata kare ona kakau akaipoipoanga i te au Kerititiano akameamea ua o Kerititome ra. Kare roa te Atua i kite atu ia ratou e e akataka anga tika to ratou i te Iseraela vaerua ra. Kare roa te Atua i akatainu ia ratou ma te vaerua tapu ei tuanga no te Patireia. No reira kua tiria ratou ki te poiri i vao ko te ngai ia e akapouia ratou.

Kua taopenga atura a Iesu i tana akatutuanga i te na ko anga: “Toko rai oki tei karangaia, e iti ra tei ikiia.” Ae, e manganui tei karangaia mei te iti tangata Iseraela kia riro ei au mema no te vaine akaipoipo ou a te Mesia ra, inara e tokoiti ua to Iseraela kopapa ra tei ikiia. Ko te maataanga o te 144,000 e manuiri tei rauka ia ratou te tutaki no te rangi kua papu e e au etene. Mataio 22:​1-14; Exodo 19:​1-6; Apokalupo 14:​1-3.

▪ Koai ma te aronga mua tei karangaia ra ki te oroa akaipoipoanga, e i naea i raveiaʼi te karanga anga ia ratou ra?

▪ I naea te pati anga i aere muaʼi ki te aronga tei karangaia ra, e koai te au tavini tei taangaangaia ei rave i te reira?

▪ I naea te rua o te patianga i raveiaʼi, e koai ma tei karangaia i muri akera?

▪ Koai ma tei akatutuia maira e te tangata kare ra ona kakau akaipoipoanga?

▪ Koai ma te aronga toko rai tei karangaia ra, i koai te aronga iti tei ikiia ra?